Фыдыбæстæ хъахъхъæнæджы бæрæг бонæн стыр нысаниуæг ис нæ чысыл республикæ æмæ адæмы царды. Уый та уымæн афтæ у, æмæ нæ бахъуыд цалдæр хатты нæ фыдæлты зæхх æмæ нæ адæмы лæбурæг знæгтæй бахъахъхъæныны сæр. Æмæ уымæ гæсгæ æрвылаз дæр ацы стыр бæрæгбон нæ республикæйы дзыллæйад банысан кæны цытджын уавæры.

23-æм февралы нæм бæрæгбоны сæраппонд  уагъд фæцæуынц алыгъуызон патриотикон æмæ культурон мадзæлттæ, спортивон ерыстæ, кæцытæ ахъазгæнæг вæййынц фæсивæды патриотон хъомыладæн, цæмæй сомбоны фæлтæрæй макуы уа рох истори.

Фыдыбæстæ хъахъхъæнæджы боны цытæн 22-æм февралы Цхинвалы Анахарсисы номыл республикон библиотекæйы уагъд æрцыдис бæрæгбонон мадзал, цыран хайад райстой Республикæ Хуссар Ирыстоны Культурæйы министрады минæвæрттæ, хæстонтæ-интернационалисттæ, афтæ ма нæ горæты 2-æм æмæ 5-æм астæуккаг скъолаты ахуыргæнинæгтæ. Мадзал бацæуæн ныхасæй байгом кодта библиотекæйы директор Кокойты Валерия. Уый цыбыртæй æрдзырдта, махмæ ацы бæрæгбон кадджын кæй у æмæ йын стыр нысаниуæг кæй ис, уый тыххæй æмæ арфæ ракодта æппæт æрæмбырдуæвджытæн Фыдыбæстæ хъахъхъæнæджы боны цытæн. «Фæнды мæ, цæмæй не ‘ппæт дæр цæрæм сабыр арвы бын æнæниз æмæ æнæмастæй. Мæ зæрдæ уын зæгъы царды æппæт хæрзиуджытæ æмæ амонд. Кæд мах фæлтæр баййæфтой уæззау цард æмæ бавзæрстам хæст, уæд мæ абон сымахæн та фæнды, цæмæй макуы бавзарат хæст æмæ уæ æхсæнгарз райсыны сæр макуы бахъæуа. Хæст адæймагæн æвзæрдзинадæй дарддæр ницы хæссы æмæ дзы кæддæриддæр хызт ут», – банысан кодта библиотекæйы директор. Уый фæстæ æрæмбырдуæвджытæм бахатыд, цæмæй иу уысм æмырæй алæугæйæ ссарой, райгуырæн бæстæйы сæрвæлтау йæ цард нывондæн чи ‘рхаста, уыцы Фыдыбæстæ хъахъхъæнджыты рухс нæмттæ.

Бæрæгбонон мадзалы дарддæр библиотекæйы кусджытæ бакастысты цымыдисон докладтæ нæ республикæйы Гарзджын тыхты сæвзæрды историйы фæдыл æмæ Фыдыбæстæ хъахъхъæнæджы бæрæгбоны нысаниуæджы тыххæй. Ахуырдзау фæсивæд лæмбынæг байхъуыстой хистæрты докладтæм æмæ уый фæстæ сæхæдæг дæр кæрæдзи ивгæйæ аив бакастысты патриотикон темæйыл æмдзæвгæтæ.

Бæрæгбоны раныхас кодта РХИ-йы Кульурæйы министры хæдивæг Къадзты Филипп. Уый адæмы зæрдыл æрлæууын кодта 21-æм февралы Стыр Уæрæсе кæй банымадта Донецкы Адæмон Республикæ æмæ Луганскы Адæмон Республикæйы хæдбардзинад æмæ, зæгъгæ, уыцы хъуыддаг   махæн нæ зæрдыл æрлæууын кодта 2008-æм аз. «23-æм февралы бæрæгбон нысаниуæгджын бæрæгбон у æмæ мах хæсджын стæм, цæмæй кæддæриддæр нæ зæрдыл дарæм æппæт уыдоны, кæцытæ тох кодтой Райгуырæн бæстæйы сæраппонд. Рох кæнын нæ хъæуы зынгхуыст хъайтарты рухс нæмттæ, кæцытæ тох кодтой Райгуырæн бæстæйы сæрыл æмæ нын æрхастой сæрибардзинад. Нæ фæсивæд махæн сты нæ фидæнаразджытæ, сомбон паддзахады чи размæ кæна æмæ сын арфæ кæнын бæрæгбоны сæраппонд, цæмæй зындзинæдтыл макуы æмбæлой æмæ сæ хæцæнгарз райсыны сæр макуы бахъæуа, афтæмæй аразой рæсугъд цард», – загъта Къадзты Филипп.

Хæстон-интернационалист Наниты Отар та фæсивæдæн радзырдта Советон Цæдисы рæстæджы Афганистаны куы службæ кодта, уый тыххæй æмæ сæйраджыдæр банысан кодта адæймаджы царды иууыл кадджындæр æмæ ахсджиагдæр кæй у Райгуырæн бæстæ хъахъхъæнын. «23-æм февралы бæрæгбон махæн у нæ иууыл уарзондæр бæрæгбон æмæ мæ фæнды   раарфæ кæнон ацы стыр бæрæгбоны сæраппонд æппæт нæлгоймæгтæн дæр. Мах кад кæнæм, Райгуырæн бæстæйы сæрвæлтау хæсты быдыры чи фæмард æмæ удæгасæй чи баззад, æхсардзинад æмæ хъайтардзинад чи равдыста, афтæ ма Райгуырæн бæстæйы раз хæстон æмæ æмбæстагон хæс кадимæ чи æххæст кодта, æппæт уыдонæн. Абон мæ фæсивæдæн та фæнды зæгъын, цæмæй ахæм хъахъхъæнджытæй исой дæнцæг æмæ хæстæй та уой кæддæриддæр хызт, уарзой сæ Райгуырæн зæхх æмæ йæ размæ кæной. Мæ зæрдæ сын зæгъы фидар æнæниздзинад æмæ царды æппæт хæрзиуджытæ», – банысан кодта хæстон-интернационалист.

Мадзалы хайадисджытæн ма бæрæгбоны цытæн арфæ ракодта РХИ-йы Культурæйы министры хæдивæг Дзеранты Джульеттæ дæр. Уый дæр банысан кодта бæрæгбоны нысаниуæг æмæ ахуыргæнинæгты бафæдзæхста, цæмæй уарзой сæ Райгуырæн зæхх æмæ йын йæ кадыл ноджыдæр æфтауой кад. Бæрæгбонон мадзалы кæрон ахуыргæнинæгтæн балæвар кодтой зæрдылдарæн лæвæрттæ.

Нæ уацх.

Comments are closed, but trackbacks and pingbacks are open.