Женевӕйаг  дискусситы радон раунд… Женевæйы

Ацы мæйы райдианы 5-6 декабры уагъд æрцыд Женевæйы дунеон дискусситы ра-дон 59 раунд, кæцытæ уагъд цæуынц 2008 азы сентябрæй фæстæмæ уæды Уæрæсе æмæ Францы президенттæ Медведев – Саркозийы сразыдзинадмæ гæсгæ. Хуссар Ирыстон æмæ Абхазы æдасдзинад ифтонг кæныны фæдыл дунеон дискусситы фæлгæтты куыст цæуы Хуссар Ирыстон, Абхаз, Уæрæсе, Гуырдзыстон æмæ дунеон орга-низациты минæвæртты хайадистæй.

Фембӕлды рӕстӕджы йӕ хайадисджытӕ женевӕйаг форматы нысаниуӕджы тыххӕй ӕрцыдысты иумиаг хъуыдымӕ, кӕцы йӕ уӕвынадӕй фӕстӕмӕ ссис ахсджиаг фактор регионы ӕдасдзинады проблемӕты фӕдыл бадзырдон фӕзуаты хуызы.

Сæйраг у ахсджиаг

документыл бакусын

Абоны онг дӕр ацы нысаниуӕгджын дискусситы сӕйраг нысаниуӕг у – Хуссар Ирыстон æмæ Абхазмæ ахасты Гуырдзыстоны ‘рдыгæй æдасдзинад ифтонг кæныны фæдыл документыл бакусын æмæ къорд гуманитарон фарстытæ, кæцытæ фæзындысты нæ бæстæйы ныхмæ Гуырдзыстоны агрессийы фæстæ.

Женевӕйаг дискусситы хуссарирыстойнаг делегацийы хъусынгӕнинагмӕ гӕсгӕ Хуссар Ирыстон ӕмӕ Гуырдзыстоны ‘хсæн паддзахадон арӕнты ӕхсӕн уавӕрӕн ацы раунды аргъ цӕуы, куыд стабилон, кӕд дзы хынцыд ӕрцыд хицӕн ӕндыгъддзинады цаутӕ, уӕддӕр.

Хъусынгӕнинаджы ма куыд дзырдӕуы, уымӕй, традицимӕ гӕсгӕ, дискусситӕ уагъд цыдысты дыууӕ къорды: ӕдасдзинад ӕмӕ гуманитарон фарстыты фӕдыл.

Фыццаг къорды сӕйраг хъусдард здӕхт ӕрцыд регионты ӕдасдзинады уӕвӕг фарстатыл ӕруынаффӕ кӕнынмӕ. Хуссар Ирыстоны делегаци дискусситы хайадисджыты хъусдард аздӕхта Гуырдзыстоны ‘рдыгӕй провокацитӕ кӕй нӕ нымӕг кӕнынц, фӕлӕ дарддӕр арæзт кӕй цӕуынц. Хынцыд цӕуы ахӕм факттӕ – паддзахадон арӕнтӕ нысанмӕздӕхтӕй хӕлд кӕй цӕуынц ӕмӕ паддзахадон арӕнты хӕххытӕ сбӕлвырд кӕнын ахсджиаг кӕй у, цӕмӕй дарддӕр арӕнты фӕтк хӕлд мауал цӕуа.

Уымӕ гӕсгӕ хуссарирыстойнаг фарс ногӕй фӕндон бахаста, цӕмӕй гуырдзиаг фарсимӕ иумӕ ӕрӕвналой Республикӕ Хуссар Ирыстон ӕмӕ Гуырдзыстоны ӕхсӕн паддзахадон арӕнты делимитаци ӕмӕ демаркацимӕ.

Хуссар Ирыстоны минӕвӕрттӕ ма куыд банысан кодтой, уымӕ гӕсгӕ сӕйраг хъусдард здӕхт ӕрцыд Хуссар Ирыстоны ныхмӕ Гуырдзыстоны ӕфсӕддон-политикон ӕмгуыстад дарддӕр кӕй фидар кӕны ӕмӕ сыхаг паддзахады территорийыл Цӕгататлантикон ӕфсӕддон альянсы уӕвынад кӕй фылдӕр кӕны. Уымӕн аргъ цӕуы афтӕ, ӕмӕ Хуссар Ирыстоны ӕдасдзинадӕн ӕмӕ регионалон стабилондзинадӕн серьезон тас кӕй у.

 

Механизмты куыст эффективон у

Хуссар Ирыстон ӕмӕ Абхазы ныхмӕ тыхӕй пайда кӕй нал ӕрцӕудзӕн, уыцы принципыл иузӕрдиондзинады документы проектыл куыст, дискусситы хуссарирыстойнаг хайадисджыты ныхӕстӕм гӕсгӕ, ӕппындӕр размӕ нӕ цӕуы. Уымӕ гӕсгӕ хайадисджытӕ сидынц, цӕмӕй дарддӕр ацы сӕйраг фарстыл уынаффӕ цӕуа.

Ногӕй нысан ӕрцыд, Женевӕйы дискусситы форматы хуссарирыстойнаг-гуырдзиаг арӕнтӕм хӕстӕг уагъдцӕуӕг Инциденттӕ ма ӕруадзын ӕмӕ сӕм хъусдард здахыны фӕдыл механизмты эффективон ӕмӕ нысанмӕздӕхт куыст дарддӕр кӕнын ӕмӕ уӕвӕг «тӕвд хахх»-ы руаджы сӕвзӕргӕ цаутыл ӕрдзурын.

 

Æбæрæгæй сæфт æмбæстæгты хъысмæты фæдыл

Дискусситы дыккӕгӕм кусӕгон къорды фӕлгӕтты хуссарирыстойнаг делегацийы минӕвӕрттӕ, гуырдзиаг хайадисджыты деструктивон позици ӕмӕ хуссарирыстойнаг, уӕрӕсейаг ӕмӕ абхазаг фарсмӕ гуымир ахастмӕ нӕ кӕсгӕйӕ, рӕгъмӕ рахастой къорд ахсджиаг гуманитарон фарстытӕ. Уыдонӕй сӕйраг уыд Хуссар Ирыстонӕй ӕбӕрӕгӕй сӕфт ӕмбӕстӕгты хъысмӕты фӕдыл фарст.

Дискусситы Хуссар Ирыстоны фарсы хайадисджытӕ банысан кодтой, ныры Гуырдзыстоны къухдариуӕгады ныфсӕвӕрӕнтӕ, ома, ӕбӕрӕгӕй сӕфт ӕмбӕстӕгты ссарынмӕ бӕрнон ахаст кӕй уыдзӕн, уый нӕ бандавдзӕн куысты фӕстиуджытыл. Уымӕй дарддӕр нысан ӕрцыд, ацы здӕхты размӕцыды ахсджиаг элемент кӕй уыдзӕн сыхаг паддзахадты ӕхсӕн ӕууӕнкдзинад сфидар кӕнын, кӕцы ӕвӕрццагӕй бандавдзӕн Женевӕйы дискусситыл.

Ногӕй хъусдард здӕхт ӕрцыд, Гуырдзыстон гуымир ӕгъдауӕй кӕй халы ирӕтты – Хъазбеджы (Тырсыгомы) районы цӕрджыты бартæ, кӕцытӕн цалдӕр азы дӕргъы фадат нӕй сӕ райгуырӕн бынӕттӕм бацӕуынӕн.

Хъуыдытӕ ма загъд ӕрцыд къорд ӕндӕр гуманитарон фарстаты фӕдыл дӕр.

Ацы раунды лигъдӕтты проблемӕйы фӕдыл дискусситы дзырд нӕ цыд. Ууыл уынаффӕ цӕудзӕн ӕрмӕстдӕр уӕд, кӕд ӕмӕ Гуырдзыстон ацы проблемӕ барӕй политизаци кӕныны бафӕлвӕрдтытӕ ныууадза, уӕд.

Дискусситы радон раунд нысан ӕрцыд 2024 азы апрелы мӕймӕ.

Нӕ уацх.