Республикæ Хуссар Ирыстоны Президент Гаглойты Алан ацыд сæрмагонд æфсæддон операцийы зонæмæ æмæ уым фембæлд ирон дæлхæйтты хæстонтимæ.
Уый тыххæй фехъусын кодта Президенты пресс-секретарь Босыкты Наталья.
«Фембæлды рæстæджы Президент хæстонтæн радта «Нива» маркæйы æхсæз автомашинæйы æмæ автомобиль УАЗ хæстон хæслæвæрдтæ æххæст кæныны тыххæй. Лæппуты тынг хъуыд машинæтæ», – загъта Босыкты Наталья.
Уымæй дарддæр, пресс-секретары ныхæстæм гæсгæ, сæрмагонд æфсæддон операцийы хайадисджытæ æнæмæнгхъæуæг æрмæджытæ – хæстонтæн индивидуалон предметтæ, фыццаг медицинон æххуыс бакæнынæн тактикон афтектæ, фынæйгæнæн голджытæ, генератортæ, хæлцадон продукттæ æмæ æндæр æрмæджытæй конд гуманитарон уæзтæ радтой хæстонтæн.
Гаглойты Алан аныхас кодта æфсæддон службæгæнджытимæ æмæ сын бузныг загъта, службæйон-хæстон хæслæвæрдтæ æххæст кæныны рæстæджы æхсардзинад æмæ удуæлдайдзинад кæй æвдисынц, уый тыххæй.
«Республикæ уæ алкæмæй дæр сæрыстыр у, сымах стут нæ дуджы хъайтартæ. Æз уæ сæрыстыр дæн», – загъта сын Президент.
Гаглойты Алан банысан кодта, зæгъгæ, уын паддзахад уæхицæн дæр æмæ уæ бинонтæн дæр дарддæр дæр алыварсон æгъдауæй æххуыс кæндзæн.
Куыд загъта, афтæмæй йæ ныфс ис, сæрмагонд операцийы хайадисджыты раз цы хæслæвæрдтæ ис, уыдон æххæст кæй æрцæудзысты, уымæй. Загъта сын тагъд уæлахизæй сæ хæдзæрттæм æрæздæхыны фæндиæгтæ.
Сæрмагонд операцийы рæстæджы хæстон хæслæвæрдтæ æххæст кæнгæйæ, æхсардзинад æмæ хъæбатырдзинад кæй æвдисынц, уый тыххæй ирон дæлхæйтты хæстонты Гаглойты Алан схорзæхджын кодта «Фыдыбæстæ хъахъхъæнæджы» майдантæй.
