1-æм мартæй йæ дуæрттæ байгом уыдзысты, Згъуыбиры цы хосгæнæн пансионат арæзт æр-цыд, уымæн.
Амалиуæггæнæг Босыкты Владимир нырмæ дæр нæ республикæйы зындгонд уыд, куыд минералон дон «Аландон»-ы уадзæн куыстуаты сæргълæууæг. Цалдæр азы размæ уый Згъуыбиры суаргуырæны бындурыл бакодта ацы куыстуат, паддзахадæй кредит райсгæйæ. Йæ саразыны фæнд та йæм фæзынд, Згъуыбиры суарæй цалдæр азы размæ Пятигорскы курортологийы зонад-иртасæн институтмæ, иртасынмæ куы ахаста æмæ йæ анализтимæ куы базонгæ, уый фæстæ. Иртасæн институты зонадон кусджытæ лæмбынæг сахуыр кодтой доны пайдайы æууæлтæ æмæ сарæзтой ахæм хатдзæг, зæгъгæ, Згъуыбиры суары дон «Ессентуки», «Кисловодск» æмæ æндæр дæттæй бирæ хуыздæр у.
Ныртæккæ ацы дон реализаци цæуы «Роспотребнадзор»-ы сертификаты бын Белорусси, Казахстан, Сомихстон æмæ Хъыргъызтаны. Алы ран дæр æй æлхæнынц зæрдиагæй.
Амалиуæггæнæг куыд зæгъы, афтæмæй ацы дон цæуы Кавказы хохрагъæй æмæ йæм никæцы дон хæццæ кæны. Йæ ныхæстæм гæсгæ дон æххуыс кæны ахæм низтæй хос кæнынæн, куыд артроз, диабет æмæ цармы низтæй дæр бирæтæн.
Босыкты лæппу зæгъы, зæгъгæ, хистæр фæлтæр куыд зæгъынц, афтæмæй советон дуджы дæр ацы донмæ хæстæг Гуырдзыстоны хицауад план кодтой егъау завод саразын Згъуыбиры, фæлæ йæм стæй йæ хъус ничиуал æрдардта.
Ныртæккæ ам цы пансионат сырæзт, уым ис 8 бынаты. Ардæм æрмæст хос кæнынмæ нæ цæудзысты. Сæрдæй-зымæгæй кусдзæн пансионат, уымæ гæсгæ ардæм баулæфынмæ сæ бон уыдзæн æрбацæуын, кæй фæнды, уыдоны.
Пансионаты арæзт æрцыд æппæт уавæртæ дæр. Ифтонг у, улæфæн зонæйы цахæм хиирхæфсæнтæ вæййы, уыдонæй. Босыкты Владимир куыд зæгъы, афтæмæй пансионат цы бынаты арæзт æрцыд, уый денджызы æмвæзадæй у 1 551 метр бæрзонддæр.
Амалиуæггæнæджы куы фарстам, пансионат саразыны хъуыды йæм цы хуызы æрцыд, уæд загъта: «Доны хосгæнæн миниуджытæ зыдтон, фæлæ мæ тынгдæр та бауырныдтой, мæ хæстæг зæронд ус йæ уæрджытæн ацы донæй куы схос кодта, уæд. Иу хатт мæм æрбахатыд, Згъуыбирæй, дам, куы рацæуай, уæд мын демæ суарæй ралас мигæнæны. Сылгоймагæн уыд уæраджы артроз, сæвæрдта дзы компресстæ æмæ фервæзт йæ низæй. Уый фæстæ та мæм æрбахатыд сыхаг, кæцыйæн уыд сæкæрниз. Уымæн дæр-иу æрластон дон æмæ уый дæр йæхи иттæг хорз хатын райдыдта. Мæ сæкæрниз, дам, кæд бынтон нæ фесæфт, уæддæр мын хæрдмæ нал хизы».
Гъе, афтæ райгуырд Згъуыбиры суаргуырæны бындурыл хосгæнæндон саразыны хъуыды Босыкты Владимирмæ.
Пансионат арæзт æрцыд амалиуæггæнæгæн йæхи фæрæзтæй. Æххуыс ын кодта йе ‘фсымæр лæгдыхæй. Æхцайы фæрæзтæ фаг кæй нæ уыд, уымæ гæсгæ арæзтад ныддаргъ, фæлæ арæзт цыд бæстон, цæмæй ардæм улæфынмæ æмæ хос кæнынмæ чи æрбацæуа, уыдон здæхой райгондæй.
Ам чи улæфа, уыдон хæрзиуæгæн арæзт æрцыдысты сæрдыгон бонты тезгъогæнæн бынæттæм аив къахвæндæгтæ. Бæхтыл тезгъо кæнын чи уарзы, уыдонæн фадат уыдзæн экскурсийы Урстуалтæм бацæуынæн дæр. Зымæгон бонты куыд сывæллæттæ, афтæ хистæр кары адæмæн дæр сæ бон уыдзæн лыжæтыл бырын.
Улæфджытæн менюйы цы хæринæгтæ уыдзæн, уыдон уыдзысты экологон æгъдауæй сыгъдæг продукттæ. Сæрдыгон бонты улæфджытæн фадат уыдзæн, Урстуалтæ æмæ Сыбайы комы цы хосгæнæн кæрдæджытæ зайы, уыдон æрæмбырд кæнынæн. Згъуыбиры комы бирæ историон цыртдзæвæнтæ ис æмæ уыдонмæ экскурситæ аразгæйæ, улæфджыты зонгæ кæндзысты ивгъуыд цардимæ. Ам ма амалиуæггæнæг хъавы саразын цад дæр, цæмæй дзы ауадза кæсæгтæ æмæ пансионаты чи улæфа, уыдонæн сæ фынгыл уа кæсаг дæр. Фидæны ам арæзт æрцæудзæнис фермерон хæдзарад дæр, цæмæй улæфджытæ хæрой бынаты æркæнгæ урсаджы продукттæ. Æппæт уыдæттæ нысан æрцыдысты Босыкты лæппуйы бизнес-проекты, кæцы кусæн бынæттæй сифтонг кæндзæн 15 адæймаджы.
Ныридæгæн амалиуæггæнæг пансионатæн интернеты бакодта сайт «ALANDON. RU». Уым æвдыст цæуынц, пансионат цы уавæрты кусдзæн æмæ йæ бакæныны нысан цы уыд. Уый руаджы дзæвгар адæм бацымыдис кодтой ацы пансионатмæ «Мæскуы æмæ Санкт-Петербурджы цæрæг ирон лæппутæ ныридæгæн сæхицæн бынæттæ æрцæттæ кæнын кодтой æмæ сæм æнхъæлмæ кæсæм марты мæйы кæрон», – зæгъы Босыкты Владимир. Уый ма загъта, зæгъгæ, Ирыстоны хæхты хъæбысы баулæфын кæй фæнды, уыдон æхсæн ис æндæр нациты минæвæрттæ дæр. Пансионаты цы уавæртæ ис, уыдонæй та хъуамæ баззайой райгондæй, спутникон телеуынынад æмæ интернетæй дæр æххæст кæй сты, уымæ гæсгæ.
УАЗÆГТЫ Марфа
Comments are closed, but trackbacks and pingbacks are open.