Ныртæккæ Ирыстоны магазинты тæрхджытыл фенæн ис цалдæр хуыз минералон дæттæн – «Аландон», «Дзимыр», «Бæгъиат», «Едыс», «Ossetian» æмæ «Санай». Ис сын сæхи хицæн æмæ хицæн хиæдтæ. Уымæ гæсгæ алчи дæр йæхæдæг хъуамæ равзара кæцы дон æм хуыздæр кæсы æмæ йын йе ‘нæниздзинадæн ахъаздæр чи у, уый.
Минералон дæттæй иууыл рагондæр у «Дзау-суар». Уымæн йæ пайдайы миниуджытæ ахуыргæндттæ сбæрæг кодтой 1925 азы. Суар популярон уыд сыхаг Гуырдзыстоны, Мæскуыйы, Ленинграды. 1929 азы уый нысанæн, Дзауы суармæ хæстæг, арæзт æрцыд пансионат «Дзау», кæцыйы уыцыиу рæстæджы сæ бон баулæфын уыд 250 адæймагæн. Пансионаты-иу бынат кæй нæ фæцис, уый та-иу суармæ хæстæг, æххуырст фатеры æрцард.
Зæххæнкъуыст æмæ уый фæстæ хæстон цаутæ раууатмæ æркодтой Дзауы суаруадзæн заводы. Иу рæстæджы «Бæгъиат»-ы минералон донуадзæн завод «Дзау» уадзыны функцитæ йæхимæ айста. Фæлæ 2017 азы Дзауы администрацийы уынаффæмæ гæсгæ уый лæвæрд æрцыд амалиуæггæнæг Тедеты Дзамболатмæ æмæ ныртæккæ официалонæй, æрмæстдæр уымæн ис ацы суар уадзыны бар. 2018 азæй фæстæмæ «Дзау» цæуын райдыдта базарадон маркæ «Санай»-ы бын. Паддзахадон регистраци райсыны фæстæ ардæм æрластæуыд нырыккон донуадзæн хахх æмæ ныр иу афæдз уадзы дон «Санай». Йæ донгуырæнмæ Советон дуджы рæстæджы бирæтæ цыдысты суар нуазынмæ. Уæд-иу суармæ цыдысты къахвæндагыл. Дзауы цы улæфæн пансионат уыд, уый улæфджытæ дæр сæ фылдæр рæстæг æрвыстой йæ цуры. Ныр уым Дзауы администрацийы цæрæнуатон-коммуналон кусджытæ сарæзтой фæлладуадзæн парк. Территори хæрзарæзт æрцыд, асинтæ йæм сарæзтой, йæ алфæмблай йын ныссагътой соцъитæ æмæ бæрзбæлæстæ, сæвæрдтой сабитæн хъеллаугæнæнтæ. Зæгъынц, зæгъгæ, фæстæдæр ацы бынаты ноджыдæр фæзындзæнис мæнгагъуыстытæ фынгтимæ, цæмæй, раздæрау, ацы бынат суа канд дзауæгты нæ, фæлæ æппæт республикæйы цæрджыты уарзондæр бынæттæй сæ иу.
Мах фембæлдыстæм ныртæккæ ацы суаруадзæн завод ногæй чи скусын кодта, уыцы бæрнон кусæг Плиты Сæрмæтимæ. Уый нын цыбыртæй радзырдта «Санай»-ы архайды тыххæй.
– Радзурут ма нæ газеткæсджытæн «Дзау-суар»-ы пайдайы æууæлты тыххæй.
– Ацы суар ахъаз у, ахсæнæй чи хъæрзы, ахæм адæймæгтæн. Гастрит æмæ мисындзæджы низтæ кæмæн ис, уыдонæн дæр пайдадæр у. Суары дон фидар кæны адæймаджы иммунитет, хуылфы цы токсинтæ æрæмбырд вæййы, уыдон иуварс кæнынæн дæр у ахъазгæнæг. Нæ завод ифтонг у бæрзондтехнологион кондадон ифтонггæрзтæй. Суар цалынмæ заводы донуадзæн хахмæ бахауы, уæдмæ фильтраци æрцæуы сæрмагонд фильтртыл, кæцы йæ сыгъдæг кæны бактеритæй. Уый не ‘ндавы пайдайаг микроэлементтыл, нæ фесæфы донæн йæ ад дæр.
– Цæмæн рахуыдтат суары дон «Сæнай»?
– Сæнайы хох – афтæ хуыйны иронау Хъазбеджы хох, «Санай» у нæ базарадон маркæ. Мах уыцы номы бын уадздзыстæм æндæр хуыз продукттæ дæр.
Ныртæккæ нæ рауадзгæ продукцийы гуырахст стыр нæу. Уымæ гæсгæ уал ацы минералон донæй ифтонг кæндзыстæм Хуссар æмæ Цæгат Ирыстоны цæрджыты. Мах дон уадзæм иу литруат мигæнæнты. Уымæн æмæ ацы суарæй, гастроэнтерологтæ куыд амонынц, афтæмæй бон нуазын хъæуы уыйбæрц. Махмæ ныридæгæн ис Уæрæсейы Федерацийы æвдисæндар паддзахадон регистрацийы тыххæй. Уымæ гæсгæ нæ бон у таможнæйон цæдисы цы бæстæтæ сты, уырдæм дæр ласæм нæ товар. Фæлæ Республикæйæ æддæмæ аласыны хæрдзтæ бирæ лæууынц нæ заводæн æмæ ныртæккæ экспорт нæ цæуы минералон дон «Сæнай».
– Советон дуджы Дзауы суары дон барстой Есентуки 4 æмæ 17-имæ. Цæмæй сты иугъуызон æмæ цæмæй хицæн кæнынц?
– Минералон дæттæ дих кæнынц æртæ къордыл. 1.Хуымæтæг сыгъдæг дон. Уымæй нуазын хъæуы, организм цас куры, уыйбæрц, аразынц дзы хæринаг компоттæ æмæ а.д. 2. Хосгæнæн дон, кæцыйы цæххы концентраци хъуамæ уа 1-10 граммы. Уый нуазын хъæуы прафилактикæйы тыххæй. 3. 10 граммæй фылдæр цæхх кæм ис æмæ микроэлементтæй хъæздыг чи у, уый та нуазынц, куыд хос, – дохтыры амындмæ гæсгæ. Минералон дон «Дзау» дыккаг къордмæ хауы. Есентуки-17 у хосгæнæн дон. Уымæ гæсгæ, уымæй нуазын хъæуы, æрмæстдæр дохтыры амындмæ гæсгæ. Есентуки-4 «Санай»-æмæ «Дзау»-æй хицæн кæны къаддæр минерализацийæ. Уымæ гæсгæ дзы нуазæн ис профилактикон нысанæн. Йæ мидæг цы минералтæ ис, уыдон хорз тайын кæ-нынц биологон элементтæ. Уый та æнæнизы хос у адæймаджы организмæн.
Нæ уацх.
Comments are closed, but trackbacks and pingbacks are open.