Нæ республикæйы цадæггай рæзы чысыл амалиуæгад. Мах уын нæ газеты фæрстыл хъусын кодтам, ацы фæдыздæхты иуæй-иу адæймæгты архайды тыххæй. Уыдонæн се ‘ппæтæн дæр сæ бæллиц у, цæмæй фидæны сæ продукци фæндаг ссара нæ республикæйы фæлхасгæнджытæм, æмæ дарддæр та – Уæрæсейы базармæ. Хуыцау зæгъæт – алцыдæр рæстæг фенын кæндзæн!

Æрæджы  ма мах фыстам амалиуæггæнæг Дзигойты Маринæйы чысыл бизнесы тыххæй, йæ рауадзгæ туаг «Assa», фæндаг кæй ссардта сæдæгай фæлхасгæнджыты зæрдæтæм. Дзигойты Маринæйы рауагъд продукци фенæн ис нæ горæты магазинты тæрхджытыл.

Ныр та Хуссар Ирыстоны базармæ рахызт гæххæттæй къухсæрфæнтæ уадзæг фирмæ «Дима æмæ Дина»-йы продукци «Минас», зæгъгæ. Бынæттон кондады къухсæрфæнтæн балхæнæн ис нæ горæты цалдæр магазины.

Уыдон ныридæгæн ссардтой фæндаг ирон фынгтæм. Фенæн сæ ис хъæлдзæг лæджы хуызистимæ.

Чысыл амалиуæгадæн нырма йæ хæрдзтæ лæууынц фылдæр, фæлæ йæ хицау Босыкты Мадинæйы ныфс ис, къухсæрфæн тæ уадзæн фирмæ «Минас»-æн йæ кой куы айхъуыса, уæд кæй фæфылдæр уыдзæнис йе ‘лхæнджыты нымæц æмæ кондад дæр йæ къахыл кæй слæудзæнис.

«Мæ фатер банджы кредиты ныууагътон. Нæ кондад нырма пайда уыйбæрц ницы хæссы, фылдæр дзы фидæм нæ хæс. Зæгъгæ, нæ продукци  апарахат ис, уæд ма мæм æндæр фæндтæ дæр ис. Стæй, мæ хъуыдымæ гæсгæ, адæймаг хъуамæ исты змæла, архайа, – дзуры æвзонг амалиуæггæнæг.

Мадинæ æмæ йе ‘мкъаймæ ахæм хуыз продукцийы рауагъдад срæвдз кæныны фæнд фæзынд ивгъуыд азы кæрон. Кредит цы 700 мин сомы райстой бангæй, уыдон сæйра-джыдæр ацыдысты дæрдджын ифтонгад балхæныныл æмæ сæ хæлæртты гараж, цехмæ рацаразыныл.

«Нæхицæн дæр  ис гараж, фæлæ тарстыстæм, йæ хъæлæба, уынæрæй сыхæгтæ куы тыхсой. Нæ хæлæртты гараж та ис хибар ран æмæ уым æрбакодтам куыстуат. Кусгæ дзы нæхæдæг кæнæм нырма. Хомыс æрластам Уæрæсейæ. Куыд нæ фæндыд, йе ‘ттаг хуыз ахæм нæ рауад, фæлæ уал æй рæстæгмæ афтæ ныууагътам», – дзуры Мадинæ.

Фирмæ «Дима æмæ Динæ»-йы продукци «Минас»-ы фыццаг парти базары фæзынд ацы аз, февралы. Ныридæгæн цæстæн   æхсызгон ирон фыстытимæ къухсæрфæнты тыхтонтæ ис хæрæндон «Подмосковье»-йы, Дзауы фæндаггæрон цы хæрæндæттæ ис, горæты хæрæндæттæ æмæ хæлцадон къæбицты.

«Ирон фыстытимæ къухсæрфæнтыл мæ цæст куы схæцыд, уæд загътон, зæгъын, æвæццæгæн,  Дзæуджыхъæуæй ласт сты. Стæй йæм лæмбынæг æркастæн æмæ Цхинвалы уагъд разынд. Мæ зæрдæ ныррухс æмæ кæд се ‘лхæнын мæ зæрды нæ уыд, уæддæр дзы цалдæр райстон», – зæгъы нæ горæты цæрæг Цхуырбаты Залинæ.

Ирон фыстыты æмрæнхъ ма гæххæттæй  къухсæрфæнты къоппыл фыст ис уырыссагау дæр.

Къухсæрфæнты иу тыхтоны аргъ у 18 сомы, кæд гъæдæй æрласæггæгтæй хуыздæр сты, уæддæр сæ нырма магазинты хицæуттæ сæ фылдæр, зивæггæнгæ фæисынц.

«Хорз гъæд сын ис, къухтыл нæ хæцынц, фæлæ сæ уæддæр магазинты хицæуттæ зивæггæнæгæ исынц. Æрласæггаг къухсæрфæнтæ, дам, кæд къухыл æндæдзынц, уæддæр сæ аргъ 15 сом йедтæмæ нæу, мæ, дам, æнцондæрæй уæй кæнынц», – хъаст кодта амалиуæггæнæг.

Мадинæйы уый нæ тыхсын кæны, уæддæр æй ныфс ис, цадæггай йæ бизнес йæ къахыл кæй слæудзæнис: «Продукцийæн фылдæр æлхæнджытæ куы фæзына, уæд иу бон кондадæн йæ тыхы уыдзæнис 40 стыр тыхтон уадзын. Иу стыр тыхтоны мидæг та вæййы 20 чысыл тыхтон. Бизнес куы райтынг уа, уæд кусджытæ дæр райсдзыстæм», – загъта Босыкты Мадинæ.

Уазæгты Марфа

Comments are closed, but trackbacks and pingbacks are open.