Хъæууон хæдзарады министрад азы кæронмæ нæ республикæйы территорийыл уадз-дзæн, хъæууон-хæдзарадон нысаниуæг кæмæн ис, уыцы зæххытæн номераци. «Ацы процедурæ у æнæмæнгъæуæг. Нæ министрады уыцы фарст рагæй тыхсын кæны. Ацы процедурæ ауадзыны фæстæ ра-йонты цы зæххытæ ис, уыдонæй алкæмæн дæр хицæнæй лæвæрд æрцæудзæнис кадаст-рон номыртæ. Ахæм куыст ма фæстаг хатт хъæууон хæдзарады кусджытæ бакодтой Советон дуджы æмæ уæдæй нырмæ зæххыты бæрæггæнæн базæ базæронд», – зæгъы Хъæууон хæдзарады министры хæстæ æххæстгæнæг Пухаты Лев.
Уый куыд загъта, афтæмæй иуæй-иу зæххытæ къорд азты дæргъы куыст кæй нæ цыдысты, уымæ гæсгæ фæивта сæ хуыз. Скъутæр æмæ схъæд сты, фæзуæттæ цас сты, уый бæрæг нал ис. Ацы куыст бакæндзысты Хъæууон хæдзарады министрад æмæ Юстицийы министрады кадастрон хайадты специалистæ.
«Уый фæстæ алы зæххы гæбазæн дæр арæзт æрцæу-дзæн сæрмагонд паспорт, цыран хаст æрцæудзæнис бæрæггæнæнтæ, зæхх цахæм у, дон æм рæхсы æви нæ, фæндаг æм ис, фæзуæттæ цас сты, зæххы мæры химикон сконд цахæм у æмæ афтæ дарддæр. Куыддæр ацы зонæнтæ æрæмбырд кæнæм, афтæ зæххытæн алы районы дæр сæвæрдзыстæм кадастрон номыртæ. Уыцы номыртæм гæсгæ æнцон базонæн уыдзæн зæххы фадыджы нысаниуæджы бындуртæн. Уы-цы картæтæм гæсгæ æрхонæн уыдзæн нæ республикæмæ инвесторты дæр, кæцытæн сæ разы æрæвæрæн уыдзæн картотекæ æмæ уымæ гæсгæ æвзардзысты, цы нысаниуæджы куыстытæ ис бакæнын, уымæ æввахс кæцы зæххы фадыг лæууы», – загъта Пухаты Лев.
Министры хæстæ æххæстгæнæджы хъуыдымæ гæсгæ, уый ахъаз уыдзæн хъæууон цæрджытæн дæр. Зæххы уавæр цахæм у, уый кæй нæ фæзонынц хъæууон фæллойгæнджытæ, уый тыххæй арæх сæ фыдæбон æнæхъуаджы фæвæййы. Хатт зæхх нæ фæбæззы кæцыдæр культурæ æрзайын кæнынæн. Йе скондмæ гæсгæ дзуапп фæдæтты æндæр искæцы халсары хуызтæн. Фæлæ мæры химикон сконд куы зона кусæг, уæд нæ фæрæдидзæн.
Куыддæр ацы куыст кæронмæ конд фæуа, афтæ республикæйы зæххытæн арæзт æрцæудзæн иумæйаг базæ, кæцы уыдзæн хъæууон хæдзарады министрады дæлбар.
Ацы куыст у дæргъвæтин, уымæ гæсгæ адарддæр уыдзæн иннæ азы кæронмæ.
УАЗÆГТЫ Марфа
Comments are closed, but trackbacks and pingbacks are open.