2020 азы кӕронмӕ арӕзт ӕрцӕудзӕн Республикӕ Цӕгат Ирыстон-Аланийы цӕрӕг адӕмты этнографион атлас.

Уый тыххӕй информацион агентад «ТАСС»-ы уацхӕссӕгӕн радзырдта проекты разамонӕг, Цӕгат Ирыстоны Гуманитарон ӕмӕ социалон иртасӕнты институты директор Хъаныхъуаты Зӕлинӕ.

«Цӕгат Ирыстон рагӕй у алы адӕмтӕ ӕмӕ алыхуызон культурӕты ӕнгомдзинад ӕмӕ иудзинады ирд дӕнцӕг. Ирыстоны зӕххыл рагӕй хӕларӕй цӕрынц алы адӕмты, культурӕтӕ ӕмӕ динты минӕвӕрттӕ. Республикӕйы этнографион атлас арӕзт цӕуы Национ ахастдзинӕдты фарстыты фӕдыл республикон министрад ӕмӕ Цӕгат Ирыстоны Гуманитарон ӕмӕ социалон иртасӕнты институты хъӕппӕрисӕй. Атласы бӕлвырд бӕрӕггонд ӕрцӕудзысты ӕппӕт этнографион къордты ивгъуыд ӕмӕ абоны цардимӕ баст хабӕрттӕ. Куыд нысангонд цӕуы, афтӕмӕй иртасӕн куыст цӕттӕ уыдзӕн азы кӕронмӕ», – загъта Хъаныхъуаты Зӕлинӕ.

Институты директоры ныхасмӕ гӕсгӕ, этнографион атласы ӕрмӕджытӕ уагъд ӕрцӕудзысты сӕрмагонд чиныджы хуызы дӕр.

Зындгонд куыд у, афтӕмӕй республикӕйы рагӕй ӕмӕ ӕнтыстджынӕй кусынц национ-культурон иугӕндтӕ. Уыдоны архайд аххӕссыд куыд Дзӕуджыхъӕу, афтӕ республикӕйы районтыл дӕр. Кӕй зӕгъын ӕй хъӕуы, уыцы ӕхсӕнадон иугӕндтӕ стыр ӕргом здахынц историйы хабӕрттӕ парахат кӕнынмӕ, алы адӕмыхӕттыты традицион культурӕ ӕмӕ мадӕлон ӕвзаг бахъахъхъӕнын ӕмӕ ӕндӕр ахӕм ахсджиаг фарстытӕм. Уыимӕ, уыдон зӕрдиагӕй архайынц республикӕйы ӕхсӕнадон-политикон ӕмӕ культурон царды, кусынц Цӕгат Ирыстоны цӕрджыты ӕхсӕн национ фидыд ӕмӕ хӕлардзинад фидардӕр кӕныныл.

Газет «Рæстдзинад»

Comments are closed, but trackbacks and pingbacks are open.