Ныртæккæ нæ республикæйы раз цы сæйраг хæстæ лæууынц, уыдонæй иу у хъæууон хæдзарады рæзт.
Канд нæ республикæйы нæ, фæлæ æппæт бæстæты дæр, хъæууон хæдзарады фадыг кæддæриддæр уыд экономикæйы ахсджиаг къабаз, уымæн æмæ хъæууон хæдзарады рæзт баст у æмткæй экономикæйы рæзтимæ. Рацарæзты рæстæджы, стæй гуырдзиаг агрессийы азты нæ республикæйы хъæууон хæдзарад тынг фæцудыдта. Фæлæ хъæууон фæллойгæнæгæн куысты уавæртæ саразыны нысанæн хицауад архайы, ацы фадыджы алы æмæ алыгъуызон проекттæ сæххæст кæныныл, цæмæй республикæйы цæрджытæ ифтонг æрцæуой гъæдджын продукттæй.
Хъæууон хæдзарады аккаг æмвæзадмæ ракæныны нысанæн субсидитæ лæвæрд цæуынц республикæйы бюджетæй. Хорз уавæртæ лæвæрд цæуы, хæдзарадон ар-хайд цы адæймæгтæ кæнынц нæ республикæйы территорийыл, уыдонæн дæр.
Хъæууонхæдзарадон министрады дæлбар цы паддзахадон куыстуат «Агропромсервис» ис, уый фæрцы нæ фермертæ æмæ арендатортæ механизацигонд куыстытæ æххæст кæнынц сæ фадгуыты. Паддзахад ын йæ хæрдзтæн фиды 50 %. Зæгъын хъæуы уый, æмæ æндæр республикæты афтæ никуы у, фæлæ нæ республикæйы Хицауад йæ разы цы приоритетон хæстæ æрæвæрæдта, уый нысанæн арæзт цæуы афтæ. Зæххы ресурстæй эффективонæй пайда кæныны нысанæн хъæууон хæдзарады министрад уавæртæ аразы дыргъгуыст кæнынæн. Инвестицион дыргъгуысткæнынады райрæзт республикæйы хорзыл банымадта Инвестагентад. Æрæджы нæ Республикæйы Президент Тыбылты Леонид йæхимæ райста егъау агрофирмæ «Белая дача»-йы инвесторты, цыран дзырд цыд пъамидортæ тауыны фæдыл проект инвестици кæныныл. Уый махæн суыдзæн перспективон проект. Инвестортæ цæттæ сты ахæм проект реализаци кæнынмæ. Уыдон куыд нымайынц, афтæмæй нæ Республикæйы æрдзон-климатон бæрæггæнæнтæм гæсгæ иууыл хæрзвадатдæр сты Ленингор æмæ Знауыры районтæ.
Хъæууон хæдзарады министр Плиты Витали куыд зæгъы, афтæмæй нæ республикæйы климатон уавæртæ фадат дæттынц пъамидоры 16 хуызы тауынæн. Уыдон, дам, уыдзысты хъæрмуатон хæдзарадты.
Фæстаг азты нæ республикæйы хицæн æмæ хицæн рæтты фæзындысты, кæсаг кæм дарынц, ахæм бынæттæ дæр. Ацы ногдзинад у пайдайы хъуыддаг æмæ дзуапп дæтты цæрджыты домæнтæн. Зындгонд куыд у, афтæмæй нæ цæугæдæттæ хъæздыг сты æндæр æмæ æндæр хуызы кæсæгтæй. Ацы куыст райтынг кæнын кæй фæнды, уыдонæн æххуыс цæуы нæ республикæйы разамынады ‘рдыгæй. Æххуыс сын цæуы кредиты хуызы æхцайы фæрæзтæй. Кæсагдард хæрзиуæгон æмæ пайдайы хъуыддаг кæй у, уый хорз æмбарынц цæрджытæ сæхæдæг дæр. Ныридæгæн ахæм хæдзарадтæ ис Дзауы æмæ Цхинвалы районты. Уыдонæн хицауад баххуыс кодта кредиттæ райсыны хуызы. Уыцы æхцайы фæрæзтæй сарæзтой сæрмагонд кæсагдарæнтæ, балхæдтой уазалгæнæнтæ, кæсагæфснайæн вакуумтæ. Кæсæгты лæппынты хæрзчысылæй æрласынц Уæрæсейæ, ауадзынц сæ бассейны æмæ сæм уырдæм базилынц, стæй куы фестыр вæййынц, уæд сæ ауæй кæнынц. Хæринаг дæр сын æлхæнынц Уæрæсейы. Ацы хæдзарадтæ цадæггай рæзынц æмæ сæ къахыл лæууынц.
Æнæхъуаджы нæ фæзæгъынц, куыстуарзаг, цардфæразон адæймаг дуры цъуппыл дæр йæхи фæдардзæн, зæгъгæ. Куыд раздæры дуджы, афтæ та ныр дæр адæм бамбæрстой, зæхх адæймагæн йæ дарæг кæй у. Кæд ныртæккæ техникæйы фæрцы бирæ куыстытæ бакæнæн ис, уæддæр хъæууон фæллойгæнæгæй зæхх афæдзы дæргъы бирæ хъару æмæ фердæхтдзинад домы. Цæмæй абоны бон зæхх бахуым кæнай, байтауай дзы алыгъуызон æфсирон æмæ æндæр хъæууонхæдзарадон культурæтæ, æрзайын кæнай хъæздыг тыллæг, уый тыххæй сæм афоныл кæсын, зилын хъæуы. Афтæ цы зæххкусæг бакæны, æмбæлон æгъдауæй йæхи чи бацæттæ кæны уалдзыгон куыстытæм, уымæн та, кæй зæгъын æй хъæуы, кæддæриддæр вæййы зæрдæрухсгæнæн æнтыстытæ, йæ фæззæг рауайы бæр-кадджын. Йæ дзаджджын фæстиуджытыл канд йæхæдæг нæ фæцин кæны, фæлæ ма – йе ‘ввахс адæм дæр.
Хъæууон хæдзарады министрады пресс-службæйы нын куыд загътой, афтæмæй сæ министрады ныртæккæ куыст цæуы гъæдджын культурæты тауинæгты фонд саразыныл. Уый фадат дæтдзæнис хъæууонхæдзарадон культурæты фæзуæттæ рауæрæхдæр кæнынæн. Кусынæн бæзгæ зæххытæ хъуамæ иууылдæр цæуой куыст.
Приоритетон у фосдарды куыст дæр. Ныртæккæ республикæйы ис, хъæууон хæдзарады ми-нистрады нымадмæ гæсгæ 15 777 ставдкъах стуры. Арæзт цæуынц ноджыдæр фермерон хæдзарадтæ. Дыргъгуыст райрæзын кæныны нысанæн Цхинвалы районы Сатихъары хъæуы цыппар гектары фæзуатыл арæзт æрцыд дыргъдон. Ам сагъд æрцыдысты ахæм фæткъуыйы сорттæ куыд «Голден», «Айдарет», «Флорина», «Семеренка». Уыдон тыллæг ратдзысты дыргъгуыстгæнджыты ныхæстæм гæсгæ 2018 азы. 50 гектары бæрц дыргътæ калд æрцыд Присы хъæуы дæр. Иудзырдæй, хъæууон хæдзарады министрады зонæнтæм гæсгæ хорз динамикæ ис хъæууон хæдзарады рæзтæн.
Æрмæг бацæттæ кодта
УАЗÆГТЫ Марфа
Comments are closed, but trackbacks and pingbacks are open.