Хуыздæр кæны ахуыр-хъомыладон куыст

Фӕстиуджытӕ арӕзт ӕрцыд, Цхинвалы районы Администрацийы цур адӕмон ахуырады хайад (йӕ сӕргълӕууӕг Лолоты Барис), 2018 азы цы куыст бакодта, уымӕн. Хайады куыст здӕхт уыд ахуыры гъӕд, ахуырдзауты хъомылад фӕхуыздӕр кӕнынмӕ ӕмӕ сæ фидӕны активон цардмæ бацӕттӕ кӕнынмӕ. Хайады кусджытӕ сӕ архайд кодтой развӕлгъау бацӕттӕгонд планмæ гæсгæ. Арӕзт ӕрцыдысты гом уроктӕ ӕмӕ тематикон мадзӕлттӕ ауадзыны графиктӕ, уӕлдай хъусдард здӕхт цыд ӕвзонг специалистты куыст ӕмӕ архайдмӕ. Ногазон улæфтыты фӕстӕ хайады методисттӕ цыдысты скъолатӕм ӕмӕ ӕмбӕлон ӕххуыс кодтой районон ӕмӕ республикон олимпиадӕтӕм бацӕттӕ кӕныны. Ахуыргӕнджытæй бирæтæ сæ зонындзинæдтæ фылдæр кодтой квалификаци бӕрзонддӕргæнæн курсыты. Уыдонӕн мидисджын лекцитӕ кастысты Уӕрӕсейы Федерацийы ӕндӕр ӕмӕ ӕндӕр уӕлдӕр ахуыргӕнӕндӕтты лектортӕ. Ахуыргӕнджытæн уагъдӕуыд семинарон ахуыртӕ ӕмӕ дзы скъуыддзаг цыдысты проблемон фарстатӕ, афтӕ ма райдайгӕ ахуыргӕнджытӕн уагътой индивидуалон консультацитӕ.

РХИ-йы ахуырад ӕмӕ зонады министрад ӕрвылаз дӕр фӕуадзы мониторинг 4-ӕм къласы ахуырдзаутӕн ӕмӕ дзы Къостайыхъӕуы астӕуккаг скъолайы (ахуыргӕнӕг Козаты Валентинӕ) хъомылгӕнинӕгтӕ равдыстой иттӕг хорз фӕстиуджытӕ, йӕ ахуырдзаутӕ ӕхсӕзӕй дӕр райстой фӕндзтӕ. Районы скъолаты минӕвӕрттӕ активон хайад райстой, район ӕмӕ республикӕйы шашкӕтӕ, рог атлетикӕ, футбол ӕмӕ спорты ӕндӕр хуызтӕй цы спортивон мадзӕлттӕ уагъдӕуыд, уыдоны.

Ахуыр-хъомыладон процессы ахсджиаг у къласӕн ӕмӕ скъолайӕн ӕддейӕ куыст ӕмӕ уымæ дæр здæхт цыдис стыр хъусдард. Организатортӕ ӕмӕ кълӕсты къухдариуӕггӕнджытӕ бацӕттӕ кӕнынц ӕмбӕлон плӕнттӕ ӕмӕ сценаритӕ ӕмӕ сæ ауадзынц бӕрзонд ӕмвӕзадыл. Хыгъдон рӕстӕджы ӕппӕт скъолаты дӕр банысан кодтой ахӕм къалендарон бӕрӕгбонтӕ, куыд Республикӕйы бон, Хетӕгкаты Къостайы райгуырды бон, Ног аз, Фыдыбӕстӕ хъахъхъӕнӕджы бон, Сылгоймӕгты дунеон бон – 8-ӕм марты бӕрӕгбон, Уӕлахизы бон. Къостайыхъӕуы скъолайы Ирон ӕвзаджы боны цытӕн уагъд ӕрцыд мадзал ӕмӕ йӕм фӕхуыдтой районы сӕргълӕууӕджы, администрацийы кусджыты, фысджыты, паддзахадон университеты лекторты. Уӕлдай банысанкӕнинагдæр у, районы фӕлгӕтты цы мадзал ауагъдӕуыд, «Ирон къӕбиц», зӕгъгӕ, уый. Хайад дзы райстой ӕппӕт скъолаты минӕвӕрттӕ. Уый уагъд ӕрцыд бӕрзонд ӕмвӕзадыл ӕмӕ йӕ хайадисджытӕй алкӕмӕн дӕр жюрийы уӕнгтӕ скодтой аккаг аргъ.

Банысан кӕнын хъӕуы, Къостайыхъӕуы астӕуккаг скъолайы цы нывгæнæн скъола-студи ис, уый ӕнувыд архайд. Уымӕн арӕхстджынӕй разамынд кӕнынц йӕ сӕргълӕууӕг, республикӕйы адӕмон нывгӕнӕг Гӕбӕраты Барис ӕмӕ сгуыхт нывгӕнӕг Хуыбиаты Роберт. Сӕ разамындӕй ӕвзонг нывгӕнджытӕ кӕддӕриддӕр свӕййынц æнтыстджын.

Ахуырады хайад ӕмбӕлон уагдоны кусджытимӕ уагътой профилактикон куыст зынхъомылгæнæн сывæллæтты ‘хсæн. Афтӕ ма сын сæ ныййарджытимӕ дӕр кодтой ӕмбӕлон куыст. Ахуыры аз фӕци рауагъдонты цытӕн бӕрӕгбонон мадзалӕй ӕмӕ сын цытджын ӕгъдауӕй лӕвӕрд ӕрцыдысты хъомылады аттестаттӕ.

Зӕгъын хъӕуы, ӕнтыстыты ӕмрӕнхъ скъолаты куысты нырма кӕй ис иуӕй-иу цухдзинӕдтӕ дӕр. Уыдон рараст кӕныныл та ӕдзухдӕр хъуамӕ кусой скъолаты къухдариуӕггӕнджытӕ ӕмӕ хайады кусджытӕ. Цӕвиттон, республикон предметон олимпиадӕйы фӕстиуджытӕ сты мӕгуырау, 36 хайадисӕгӕй ӕрмӕстдӕр Сатихъары астӕуккаг скъолайы хъомылгӕнинаг Моисеев Феликс райста ӕртыккаг къӕпхӕны диплом ирон ӕвзаг ӕмӕ литературӕйӕ. Ӕнӕмӕнгдӕр ахуыргӕнджыты бахъӕудзӕн уӕлӕмхас ахуыртӕ уадзын, чи не ‘ййафы, уыцы ахуыргӕнинӕгтимӕ, методкабинет та хъуамӕ йӕ куыст фӕтынгдӕр кӕна ацы цухдзинад рараст кӕныны нысанӕн. Къостайыхъӕуы скъолайæ дарддæр иннӕ иумиагахуырадон уагдӕтты нӕй спортивон залтӕ ӕмӕ уый та мӕгуырауӕрдӕм ӕндавы ахуыртӕ уадзыны гъӕдыл. Уымӕй дарддӕр нӕй фаг спортивон ифтонггæрзтæ. Иумиагахуырадон скъолаты нӕй хими ӕмӕ физикӕйы кабинеттӕ, химийы фӕлварӕнтӕ уадзынæн нӕй реактивтӕ, афтӕ ма нӕй ирон, уырыссаг ӕмӕ англисаг ӕвзӕгтӕй цӕстуынгӕ ӕрмӕджытӕ. Хайады методисттӕ Цъӕхилты С., Наниты А., Кокойты М., Гӕбӕраты Э., Козаты О., Хетӕгкаты А. ӕмӕ Тедеты М. бакодтой ӕмбӕлон куыст ахуыры гъӕд фӕхуыздӕр кӕнын ӕмӕ ахуыргӕнджыты дæсныдзинады ӕмвӕзад фӕбӕрзонддӕр кӕныны тыххӕй. Фӕлӕ уӕддӕр хъӕуы фылдӕр куыст бакӕнын, ахуыр-хъомыладон процессы цы цухдзинӕдтӕ ис, уыдон иуварс кӕныны фæдыл.

Хуыбиаты Никъала