Нӕ республикӕйы фермерон ӕмӕ хицӕн хӕдзарадты цалдӕр къуырийы размӕ ахицӕн хуымгӕрдӕн. Уыдон сӕйраджыдӕр, ӕфсирон культурӕтӕй байтыдтой фӕззыгӕнд мӕнӕу ӕмӕ хъӕбӕрхор. Зӕгъын хъӕуы уый, ӕмӕ зӕхкусджытӕ байтыдтой хӕрзгъӕд тауинаг, сӕ фылдӕр ӕххӕст кодтой агротехникӕйы ӕппӕт домӕнтӕм гæсгæ ӕмӕ сӕ ныфс уыд хъӕздыг тыллӕгӕрзадӕй. Хъыгагӕн, бӕрӕг аххосӕгтӕм гӕсгӕ, уый иутӕн ӕххӕстӕй сӕ къухты нӕ бафтыд. Цӕвиттон, уымӕй размӕ хӕдзарадон азты хъӕздыг тыллӕгӕрзадӕй сӕ зӕрдӕ кӕмӕн рухс кодта, уыдон хуымтӕн стыр знаггад ракодта тыхджын ихуард ӕмӕ уый аххосӕй тауинаджы фаг дӕр нал бафснайдтой. Ахӕмты нымӕцы сты Знауыр ӕмӕ Цхинвалы районты иуӕй-иу хӕдзарадтӕ. Куыд уымӕй размӕ азты, афтӕ та ацы хӕдзарадон аз дӕр ӕфсирон культурӕтӕ иууыл фылдӕр байтыдтой Ленингоры районы хицӕн хӕдзарадтӕ ӕмӕ ӕдӕппӕт сӕ фӕзуат ахста 600 гектары. Банысангонд хуымтӕ бафснайыныл комбайнертӕ бакуыстой хъазуатонӕй, кӕд сӕ иу рӕстӕджы къӕвдатӕ бакъуылымпы кодтой, уӕддӕр равдыстой фердӕхтдзинад ӕмӕ тыллӕгӕрзадӕй барухс хоркуыстгӕнӕджы зӕрдӕ. Знауыры районы хицӕн фермерон хӕдзарадтӕн та ӕдӕппӕт сӕ хуымты фӕзуат уыд 446 га ӕмӕ Цхинвалы районӕн та ӕрмӕстдӕр 200 га.
Комбайнертӕй хъаруджындӕрӕй сӕхи равдыстой Габеты Хвича, Кокойты Валери, Гӕззаты Андрей, Табуты Ӕхсар, Дриаты Звиад ӕмӕ ӕндӕртӕ.
Ныр та ӕрбалӕууыд мӕр афӕлдахыны ӕнӕаргъӕвгӕ куыст ӕххӕст кӕнын ӕмӕ уыцы хъуыддаджы дӕр иуӕй-иу хӕдзарадтӕн ис ӕнтыст. Цӕвиттон, хуымгӕрдӕны ӕмрӕнхъ уал механизатортӕ Знауыр ӕмӕ Ленингоры районты бахуым кодтой 825 гектары ӕмӕ ацы куыстыл дарддӕр дӕр архайынц. Уымӕй дарддӕр ма «Агросервис»-ы комбайнертӕн бабӕстон кӕнинаг ис нартхоры тыллӕг дӕр. Зӕгъӕм, ацы культурӕ 20 га фӕзуатыл Присы зӕххыл байтыдта Сиукъаты Роберт, Знауыры районы та Цхуырбаты Знауыр ӕмӕ Гатыгкоты Лашайы хуымтӕ иууыл иумӕ сты 25 га. Ацы культурӕйӕн республикӕйы нӕй сӕрмагонд техникӕ ӕмӕ уымӕ гӕсгӕ йӕ бабӕстон кӕныныл бакусдзӕн хуымгӕрдӕн комбайн.
ХУЫБИАТЫ Никъала
Comments are closed, but trackbacks and pingbacks are open.