Нӕ горӕты Цардуагон лӕггӕдты фыццаг уӕладзыджы иу хатӕны дуар хъавгӕ бахоста фӕлхасгӕнӕг ӕмӕ та барухс, йӕ рагон хуыйӕджы куы ауыдта, уӕд. Рагон уымӕн, ӕмӕ кӕддӕриддӕр ацы нӕлгоймагмӕ бацӕуы сӕрбахъуыды рӕстӕджы, ӕдзухдӕр уый у йӕ лӕггадгӕнӕг.
Ныр дӕр ӕм бахаста ногӕлхӕд хӕлаф, йӕ комдӕл ӕгӕр уæрæх кӕй у, стӕй йӕ фадгуытӕ та даргъ кӕй сты, уый тыххӕй. Фӕлтӕрд хуыйӕг ӕм худгӕбылӕй байхъуыста ӕмӕ стӕй ӕрӕвнӕлдта йӕ куыстмæ. Дыккаг бон закъаз уыд цӕттӕ, тынг барухс йӕ хицауы зӕрдӕ, цыма йӕ уӕлӕ карст уыд, уыйау ыл рафидыдта…
Ӕмӕ ахӕмтӕ цал ӕмӕ цал уыдысты йӕ дӕргъвӕтин куысты рӕстӕджы Болататы Нодарӕн, уыдон чи банымадтаид.
Нодар уӕлӕдарӕс хуыйӕджы дӕсныйад йӕ чысылӕй бауарзта, уый фӕдыл каст фӕци Тбилисы сӕрмагонд скъола 1960 азы ӕмӕ уӕдӕй фӕстӕмӕ ӕр-лӕууыд фӕллойадон фӕндагыл. Тбилисы уӕвгӕйӕ ма хайад иста ирон театры режиссер Четиты Рубены разамындӕй. Йемӕ ма ирон фӕсивӕдӕй сценӕйыл сӕ аивадон ралӕудӕй сценӕмӕкӕсджыты зӕрдӕ рухс кодтой Плиты Нанули, Санахъоты Инал, Тедеты Нателӕ, Мамиты Славик, Тедеты Уасил, Къудухты Къоли, Хъӕцлӕуты Ушанг, Челӕхсаты Петр, Хаситы Валери. Фӕстӕдӕр ӕрбынат кодта йӕ уарзон горӕты ӕмӕ уӕдӕй фӕстӕмӕ йӕ лӕггады хай кодта йӕ иубӕстон ӕмбӕстӕгтӕн.
Иурӕстӕджы йӕм кафджыты ансам-блӕй ӕрбахастой куырӕт, хъуыд ӕй фӕхуыздӕр кӕнын. Болататы лӕппу йӕм лӕмбынӕг ӕркаст ӕмӕ цыбыр ӕм-гъуыдмӕ аиуварс кодта дарӕсы згъуыд бынӕттӕ. Фӕлтӕрд хуыйӕгӕн дзы ницы уыд зынӕй ӕмӕ уӕдӕй аскъуыддзаг кодта, ацы дӕсныйадӕн кӕй лӕггад кӕндзӕн. Зӕгъӕн ис, ӕмӕ Нодар кӕй уыд, ирон национ уӕлӕдарӕс нӕ областы чи райдыдта хуыйын, фыццаг ахӕм. Уый тынг ӕхсызгон уыд ансамбль «Симд»-ы, стӕй хӕдархайгӕ аивадон къордты разамонджытӕ ӕмӕ артисттӕн. Кӕдӕй уӕдӕй, зӕгъгӕ, махмӕ дӕр фӕзынд ахӕм специалист, ныр сӕ дард бынӕттӕм цӕуын нал хъуыд, фӕлӕ ӕппӕт закъазтӕ дӕр ӕххӕст кодтой бынаты ӕнӕкъуылымпыйӕ. Йӕ хорз ӕмӕ ӕнӕзӕрдӕхудт куысты тыххӕй йын лæвæрд ӕрцыд «Республикӕ Хуссар Ирыстоны сӕудӕджерады сгуыхт кусӕджы» кадджын ном, хорзæхджын уыд бирӕ грамотӕтӕй.
Фӕстаг рӕстӕджы Нодары ӕнӕниздзинад кӕд фӕцудыдта, уӕддӕр йӕхи нӕ уагъта, уыд йӕ кусӕн бынаты, уӕддӕр ӕмӕ-иу уӕддӕр худӕндзастӕй сӕмбӕлд ӕмбӕстӕгтыл, сӕххӕст-иу сын кодта сӕ домӕнтӕ. Гъе, фӕлӕ низ фӕтыхджындӕр, ӕруатон, бӕргӕ ма йӕм царды бирӕ рӕсугъд фӕндтӕ ӕмӕ хъуыдытӕ уыд, фӕлӕ йын ӕрдӕгыл фескъуыдысты. Рацыд дыууиссӕдз боны, Нодар йӕ уарзон куыст ӕмӕ йӕ уарзон бинонтӕ ӕмӕ адӕмӕй куы фӕхицӕн, уӕдӕй.
Рухсаг у, Нодар!
Хуыбиаты Никъала
Comments are closed, but trackbacks and pingbacks are open.