Фæндзæм октябры сæ профессионалон бæрæгбон банысан кодтой ахуыргæнджытæ. Ахуыргæнæг йæ удæй лæвар кæны йæ ахуырдзауæн, тауы йын йæ зæрдæйы хорздзинады æмæ уарзондзинады æнкъарæнтæ, цæмæй дзы сомбон рацæуы гоймаг.
Ацы нысаниуæгджын бон кад кæнын хъæуы, рæзгæ фæлтæр хъомыл кæныны хъуыддагæн йæхи чи снывонд кодта, уыдонæн.
Бæрæгбоны охыл мæ фæнды радзурын иу ахуыргæнæджы тыххæй. Уымæн нæй бæрзонд титултæ æмæ майдантæ, кæд аккаг у, уæддæр, фæлæ уыд æгæрон æфсæрмгæнаг адæймаг, æмæ иууыл фæстаг рады мæт кодта йæ куысты официалон аргъыл. Уый зыдта æмæ хатыд, йæ хай кæй у хорзæхтæй æнæфæцудгæдæр хæзна – скъоладзауты уарзон-дзинад, кæцыйы аккаг не суы-дзынæ цыфæнды аразгæ фæ-рæзтæй дæр.
Уыцы Хуыцауæй радтгæ ахуыргæнæг уыд Къусраты Владимир Александры фырт. Хъыгагæн, мæ коллегæйы тыххæй ивгъуыд афоны дзурын.
Владимир Александры фырт хъæуы скъолайы ахуыргæнæджы куыст бирæ бакодта, физикæ æмæ матемæтикæ амонгæйæ. Йæ ахуырдзаутæ алыхатт дæр хорз фæстиуджытæ æвдыстой, куыд ахуыры, афтæ уæлдæр ахуырæгæнæндæттæм бацæуыны фæстæ дæр. Уыдонæй бирæтæ афтæ бауарзтой ахуыргæнæджы куыст, æмæ равзæрстой сæ ахуыргæнæджы фæндаг.
Владимир Александры фырт иу бынаты нæ бадт, фæллад нæ зыдта, йæхиуыл куыста. Уый цард йе скъолайы, йæ ахуыргæнинæгты фæрцы. Уый хорз зыдта, скъоладзауæн цымыдисдзинад куыд сæвзæрын кæна.
Къусраты Владимиримæ æз базонгæ дæн 2016 азы, йæ къласмæ куы æрбацыдтæн методисты иу къордимæ, уæд. Владимир тынг диссаджы урок ауагъта, равдыста ахуыргæнæджы ахæм курдиат, ахуыры процессмæ ахæм хорз ахаст, æмæ мæ дисы бафтыдта.
Йæ фыццаг æмæ фæстаг хорзæх Къусраты Владимир райста 2016 азы республикæйы Ахуырад æмæ зонады министрады сконды йæ хорз куысты тыххæй.
Къусраты Владимир райгуырд 1942 азы 15 апрелы Цхинвалы районы Громы хъæуы, колхозон бинонты ‘хсæн. 1948 азы бацыд Громы астæуккаг скъолайы фыц-цаг къласмæ. Йæ фæллойадон куыст райдыдта Громы колхозæй, куыста хынцæгæй. 1958 азæй 1968 азмæ. Уыд фæскомцæдисонты сконды.
1968 азы Хуссар Ирыстоны паддзахадон педагогон институты физикæ-математикæйы факультет фæуыны фæстæ, кусын райдыдта Бендеры астазон скъолайы, иу азы фæстæ та æрвыст æрцыд Громы астæуккаг скъоламæ физикæ æмæ математикæйы ахуыргæнæгæй.
Уыцы скъолайы 15 азæй фылдæр фæкуыста директорæй.
Йæ куысты рæстæджы уый æрмæст предметы æмæ амоныны методикæйы хорз зонындзинæдтæ нæ равдыста, фæлæ ма – бæрзонд адæймагон миниуджытæ. Уый тыххæй йын аргъ кодтой йæ коллегæтæ, йæ хæлæрттæ æмæ йе ‘мхъæуккæгтæ.
Къусрайы фырт хорз зыдта нæ адæмы традицитæ, аргъ кодта национ æгъдæуттæн. Никуы ничи загътаид, уый искæй фæхъыг кодта, кæнæ дам-думтæ дзырдта, зæгъгæ. Уый скъоладзауты хъомыл кодта раст ныхасæй нæ, фæлæ йæхи сæрмагонд цæвиттонæй.
Ахæм патриархалон, патриотикон уагыл йæ цард æмбалимæ схъомыл кодтой æртæ хъæбулы.
Хъыгагæн, 2006 азы Къусраты Владимиры бинонтыл æрцыд зиан, трагикон æгъдауæй фæзиан сæ чызг йæ сывæллонимæ. Æгæрон рыст ныййарджыты зæрдæты баз-зад æнустæм.
Владимир йæхæдæг афтæ дзырдта: «Маст тагъддæр зæронд кæны адæймаджы». Фæлæ уæддæр уый скъола нæ ныууагъта. Йæ дæсныйад æмæ ахуырдзауты уарзгæйæ уый дарддæр дæр куыста уыдоны тыххæй, æвæллайгæ, зæрдиагæй.
Курдиатджын, Хуыцауы конд ахуыргæнæджы рыстзæрдæ йæ кусынæй æрлæууыд 2017 азы 2 августы. Уый ма фæндыд бирæты хъысмæты хайад райсын, куыд рæзынц нæ чысыл фæлтæр, уый фенын.
Къусраты Владимиры амæлæты рыст æрмæст йæ бинонты æмæ æввахс хиуæтты зæрдæты нæ баззад, фæлæ йæ хъæуккæгты, йемæ зонгæ чи уыд, æппæт уыдоны зæрдæты. Хорз ахуыргæнæг, бинонты хицау æмæ адæймаг. Уый зæххыл ныууагъта хорз æмæ аккаг фæд.
Республикæ Хуссар Ирыстоны адæмон ахуыргæнæг Бибылты Нелли
Comments are closed, but trackbacks and pingbacks are open.