Хъӕлдзӕг ӕмӕ цины бӕрӕгбон уыд сентябры фӕндзӕм бон Цхинвалы районы Къостайыхъӕуы астӕуккаг скъолайӕн дӕр. Сæ уарзон скъоламæ хъӕлдзӕг зӕрдӕйы уагимӕ тындзыдтой ахуыргӕнджытӕ, скъоладзаутӕ, ныййарджытӕ, арфӕтӕ ӕмӕ худгӕ цӕстӕнгасæй тавтой кæрæдзийы. Скъола кӕд ӕрӕджы сырӕзт, уӕддӕр коллектив бацархайдта, цӕмӕй ӕрбӕстон кодтаиккой ахуыры азы райдианмӕ ӕппӕт дӕр, сӕхи тыхтæй ӕрцыд рог цалцӕг. Ахуыргӕнинӕгтӕн сӕ зонындзинӕдтӕ амондзысты, куысты фӕлтӕрддзинадӕй ифтонг чи сты, ахӕм ахуыргӕнджытӕ. Зæгъæн ис, ифтонг кæй æрцыдысты ахуыргӕнӕн чингуытӕй.
Банысангонд рӕстӕгмӕ ахуыргӕнинӕгтӕ къласгай ӕрлӕууыдысты цытджын линейкӕйы, фӕйлауынц Республикӕ Хуссар Ирыстон-Алани ӕмӕ Уӕрӕсейы Федерацийы паддзахадон тырысатӕ. Мадзал райдыдта, 2004-ӕм азы Беслӕны фыццӕгӕм астӕуккаг скъолайы теракты рӕстӕджы чи фӕмард сты, уыдоны рухс нæмттæ ссарынӕй. Уый фӕстӕ райдыдта бӕрӕгбон ӕмӕ дзы раныхас кодта скъолайы директор Тыбылты Алекси. Бафӕндыд ӕй ӕппӕт ахуыргӕнджытӕ ӕмӕ ахуыргӕнинӕгтӕн ахуыр ӕмӕ царды хорз ӕнтыстытӕ.
Раныхас ма кодтой ӕмӕ арфӕйы ныхӕстӕ загътой скъолайы ахуыры хайады сӕргълӕууӕг Мӕргъиты Нелли, Хуссар Ирыстоны Паддзахадон исад ӕмӕ зӕххы ахастыты комитеты номӕй Ӕлборты Иннӕ, Парламенты депутат Лохты Мендик, райдиан кълæсты ахуыргæнæг Козаты Валя ӕмӕ ӕндӕртӕ, парти «Иу-уон Ирыстон»-ы номӕй та сын балӕвар кодтой чингуыты хызынтӕ. Фӕстӕ нӕ фӕлӕууыдысты, 1-аг къласмӕ чи бацыд, уыдон дӕр ӕмӕ хъӕлдзӕг зӕр-дӕйы уагимӕ дзырдтой сӕ фыццаг ӕмдзӕвгӕтӕ. Хъуыстысты музыкӕ ӕмӕ зарджыты ӕхцон зӕлтӕ, зарӕггӕнджыты къорд аив сӕххӕст кодтой цалдӕр зарӕг ӕмӕ кафты. Уый фӕстӕ 11-ӕм къласы ахуыргӕнинаг Тегкаты Дауыт йӕ хъӕбысмӕ систа фыццагкъласон Саулохты Ланӕйы ӕмӕ уый ныццагъта ног ахуыры азы райдианы тыххӕй фыццаг дзӕнгӕрӕг – рӕсугъд цардмӕ сидӕг дзӕнгӕрӕг.
Хуыбиаты никъала
Comments are closed, but trackbacks and pingbacks are open.