Нæ республикæйы скъолаты 17-æм æмæ 18-æм июны фæстаг дзæнгæрæг æмæ рауагъдонты балы бæрæгбонон мадзæлттæ уадзыны фæстиуæгæн Мидхъуыддæгты министрады кусджытæ 16 июнæй фæстæмæ рахызтысты фæтыхджындæргонд службæйы режиммæ. Æппæт скъолаты бæстыхæйтты басгæрстой сапертæ, кæцытæ спайда кодтой службæйон æрмахуыр куыйтæй æмæ ма специалон техникон фæрæзтæй.
Развæлгъау Мидхъуыддæгты министрады штабы арæзт æрцыдис план, цæмæй милицийы алы кусæг дæр зона йæ хæстæ æмæ æхсæнадон фæтк æмбæлонæй бахъахъхъæд æрцæуа. Алкæцы скъоламæ дæр сæ хъус дардзысты барадхъахъхъæнæг органтæ. Милицийы 300 кусæджы бæрц хайад райсдзысты бæрæгбонон мадзæлтты æмæ хъахъхъæндзысты не ‘мбæстæгты æдасдзинад.
Уæлдай хъусдард здæхт уыдзæн фæндагон змæлдмæ. Фæндагон змæлды æдасдзинады инспектортæ карзæй æфхæрдзысты ахæм скъоладзауты, кæцытæ сбадой рулы фарсмæ. Милицийы кусджытæ сидынц ныййарджытæм, цæмæй æнæххæст кары сывæллæтты ма уадзой машинæ скъæрын. Фæткхалджытæ ивар цæудзысты æмæ автомашинæты та æрвитдзысты машинæты иварон лæууæндонмæ.
Театралон фæзуатмæ бахизæнты арæзт уыдзæнис контролон-уадзæн пункттæ æмæ ма пайда кæндзысты металлодетектортæй дæр. Милицийы кусджытæ сгардзысты фæзуатмæ цæуджыты, цæмæй семæ ма бахæссой карз нозтытæ æмæ æндæр тæссаг предметтæ. Милицийы экономикон фыдракæндтæ ма æруадзыны управленийы кусджытæ бафæдзæхстой, Театралон фæзуатмæ хæстæг цы дуканитæ ис, уыдоны, цæмæй ма уæй кæной карз нозтытæ, цалынмæ бæрæгбонон мадзæлттæ фæуой, уæдмæ.
18 июны изæры 6 сахатæй фæстæмæ Театралон фæзуатмæ ‘ввахс, Сталины æмæ Хетæгкаты Къостайы уынгтыл нæ уыдзæн машинæ скъæрыны бар.
Джиоты Александр
Comments are closed, but trackbacks and pingbacks are open.