17-æм июны нæ республикæйы скъолаты къæсæртæй царды уæрæх фæндагмæ рахызтысты 469 рауагъдоны. Ныццагъта сын фæстаг дзæнгæрæг æмæ сæ сæ ахуыргæнджытæ афæндараст кодтой ног цардыфæндæгтыл. Ахæм рæстæджы тынг бирæ алыгъуызон эмоцитæ сæвзæры адæймагмæ, уæлдайдæр та рауагъдонтæм, – кæмæн дзы йæ цæссыгтæ уадултыл фæзындысты, чи æнкъардгъуыз уыдис, кæмæн та йæ зæрдæ фырцинæй радис. Æвæццæгæн дзы афтæ хъуыдыгæнджытæ дæр уыдзæнис,зæгъгæ, кæдæй-уæдæй скъолайæ фервæзтыстæм, фæлæ рæстæг рацæудзæнис æмæ мысын райдайдзысты се скъолайы хъæлдзæг, æнæмæт æмæ рæсугъд бонтæ. Уыцы мысинæгтæ адæймаджы хъуыдыйæ никуыуал ахауынц, цæрæнбонтæм йемæ баззайынц.
Ацы аз рауагъдон мадзæлттæ уагъд æрцыдысты æндæр форматыл. Уымæн та йæ аххосаг уыд коронавирусы эпидеми, æмæ раст зæгъгæйæ, уырнгæ дæр никæйуал кодта, уагъд ма æрцæудзысты ацы мадзæлттæ, уый. Куыд зонæм, афтæмæй ныр цалдæр мæйы дæргъы фадат нал уыдис мадзæлттæ уадзынæн, аргъæвтой кæнæ бынтондæр нал сарæзтой бирæ мадзæлттæ, афтæ фæстаг дзæнгæрæг æмæ рауагъдонты бал дæр. Фæлæ нæ бæстæйы къухдариуæг, эпидемиологон ситуаци бахынцгæйæ, фæндон рахаста, цæмæй рауагъдонтæн сæ бæрæгбон ма фæкъуых-цы уа, фехъусой фæстаг дзæнгæрæджы хъæр æмæ ха-йад райсой рауагъдонты балы. Кæд æмæ æппæт дунейы уæвынад кæны карантинон режим, уæддæр нæ рауагъдонтæн фадат фæцис сæ бæрæгбонон мадзæлттæ банысан кæнынæн.
18-æм июны изæрæй та горæт Цхинвалы Театралон фæзуатмæ æрæмбырд уыдзысты рауагъдонтæ. Ам сын уагъд æрцæудзæнис рауагъдонты бал, фæлæ иннæ азтæм абаргæйæ хицæн кæндзæнис ацы бæрæгбонон мадзал дæр. Организаторты фæндонмæ гæсгæ мадзал ауадздзысты гом арвы бын. Рауагъдонтæн бацæттæ кодтой концертон программæ æмæ ма сын уыдзæнис бæрæгбонон фейерверк дæр.
Comments are closed, but trackbacks and pingbacks are open.