УФ-йы Хъахъхъӕнынады министрады разамынадӕн уыд рабадт 2023 азы сӕ бакӕнгӕ куысты фӕдыл ӕмӕ дзы ведомствойы сӕргълӕууӕг Сергей Шойгу сарӕзта доклад. Мадзалы хайад райста бӕстӕйы президент Владимир Путин дӕр.
Украинӕйы хабӕртты тыххӕй тынг бирӕ дезинформаци кӕй цӕуы, ныгуылӕн бӕстӕты разамынад барӕй кӕй зыгъуыммӕ кӕнынц факттӕ, се ‘мбӕстӕгтӕй рӕстдзинад кӕй ӕмбӕхсынц, уымӕ гӕсгӕ Шойгуйы доклад алкӕйы дӕр цымыдис кодта. Ӕгӕрыстӕмӕй, Украинӕйы ӕмбӕстӕгтӕ дӕр фронты хабӕрттӕй бӕстон ницы зонынц. Нӕдӕр уый зонынц, ӕмӕ сӕм фӕсарӕнтӕй цы ӕххуыс цӕуы, уый сын кредитты хуызы кӕй дӕттынц ӕмӕ сын фӕстӕдӕр фидинаг кӕй уыдзысты.
Шойгу куыд ӕмбарын кӕны, афтӕмӕй уӕрӕсейаг гарзджын тыхты ныхмӕ Украинӕйы лӕууынц ныгуылӕн бӕстӕтӕ ӕмткӕй. «АИШ-ы сӕргълӕудӕй НАТО баиу кодтой се ‘фсӕддон хъомысад ӕмӕ алыгъуызон ӕххуыс кӕнынц киеваг режимӕн, цӕттӕгӕнӕн курсытӕ уадзынц украинаг хӕстонтӕн, ӕрвитынц сӕм ӕфсӕддон инструкторты, бархион хӕстонты ӕмӕ уынаффӕгӕнджыты, дӕттынц сын развӕдсгарӕн информаци, Уӕрӕсейы ныхмӕ уадзынц санкцион ӕмӕ информацион хӕст. Уымӕй уӕлдай ма сӕ разӕнгард кӕнынц теракттӕ аразынмӕ дӕр, марын сын кӕнынц сабыр цӕрӕг адӕймæгты, атомон электростанцты саразынц алыгъуызон провокацитӕ».
Ӕппӕт факттӕ куы бахынцӕм, уӕд бӕрӕг у, АИШ кӕй тырны йӕ конкурентты ӕрлӕмӕгъ кӕнынмӕ, уӕлдайдӕр та Евроцӕдисы бӕстӕты. Экономикӕйы кой куы кӕнӕм, Евроцӕдисы экономикӕ гуырахстджын ӕмӕ хъомысджын у, ӕмӕ бирӕ азты дӕргъы АИШ-ы размӕцыдыл ӕндавы. Ныридӕгӕн америкӕйӕгтӕн сӕ бон бацис Европӕйы бӕстӕты фылдӕр хай йӕ дӕлбар бакӕнын, сӕвӕрдта дзы коммӕгӕс къухдариуӕггӕнджыты ӕмӕ сын сӕхи къухтӕй пырх кӕнын кӕнынц сӕ экономикӕ, сӕ хӕстхъомдзинад. Абоны бон иунӕг европӕйаг бӕстӕ дӕр хӕдбар нал у, иууылдӕр ӕнгом баст сты АИШ-имӕ ӕмӕ сын куыд зӕгъы, афтӕ кӕнынц. Европӕйаг паддзахадты бирӕтӕ райдыдтой хонын америкӕйаг штаттӕ. Фӕлӕ уый раст хъуыды нӕу – америкӕйаг штаттӕн бирӕ бартӕ ис, алчидӕр дзы бынаты уадзы йӕхи политикӕ. Европӕйаг бӕстӕтӕн та хӕдбардзинад нал ис, ӕрмӕстдӕр ма ӕххӕст кӕнынц сӕ «хистӕр ӕфсымӕры» бардзырдтӕ.
НАТО-йы дӕлхӕйттӕ азӕй-азмӕ Уӕрӕсейы ӕмӕ Беларусы арӕнтӕм сӕхи кӕй ӕввахс кӕнынц, уыцы хъуыддаг, Шойгуйы ныхӕстӕм гӕсгӕ, регионы ӕдасдзинадыл дзурӕг нӕу. Украинӕйы кӕй схӕцын кодтой Уӕрӕсеимӕ, уымӕн дӕр йӕ нысан уыд Уӕрӕсейы ӕрлӕмӕгъ кӕнын. Ныгуылӕн ӕфсӕддон экспертты никуы уырныдта ӕмӕ украинаг гарзджын тыхтӕ искуы Уӕрӕсейы басӕтдзысты. Уый сын дзургӕ афтӕ кодтой ӕмӕ сын ныфсытӕ ӕвӕрдтой, ома, тагъд рӕстӕджы Уӕрӕсейы скуынӕг кӕндзыстут ӕмӕ хъаны цард кӕнын райдайдзыстут. Сывӕллоны дӕр ма ахӕм ныхӕстӕй нӕ фӕсайдзынӕ, фӕлӕ пропагандӕйы фӕрцы Ныгуылӕны бӕстӕтӕ украинӕгты хъуыдыкӕнынад сзыгъуыммӕ кодтой.
Шойгу куыд фехъусын кодта, афтӕмӕй Украинӕйы пайдайӕн ӕппынӕдзух кусынц 500 космикон аппараты, уыдонӕй 70 сты НАТО-йы. «Ӕхсӕнгарзӕй сӕ ифтонг кӕнынц 27 бӕстӕйы ӕмӕ сӕ иумӕйаг аргъ ахызт 97 миллиард долларӕй. Бирӕ азты дӕргъы Афганистанмӕ дӕр уыйбӕрц ӕхсӕнгарз нӕ баластой. Тӕссагдзинад уымӕн ӕвзӕрын кӕны ацы хъуыддаг ӕмӕ уыцы ӕхсӕнгарз бахаудта террористты къухтӕм ӕмӕ сабыргай парахат кӕны ӕгас дунейы. Уымӕй уӕлдай ма АИШ хардз кӕны бирæ ӕхцайы фӕрӕзтӕ дзыллон информацийы фӕрӕзтыл, цӕмӕй дӕдтой дезинформаци, Уӕрӕсейы чъизи кӕной. Ӕрвылбон дӕр публикаци цӕуынц мингай фейктӕ Украинӕйы цӕуӕг хӕстон архӕйдтыты тыххӕй. Афтӕмӕй та украинаг ӕфсӕддонты фыдракӕндты тыххӕй бынтондӕр ницы дзурынц, ноджы нацисттӕн алырдӕм фӕндӕгтӕ бакодтой ӕмӕ сӕ цы фӕнды, уый аразынц сабыр цӕрӕг адӕмӕн».
Ӕрмӕст танктӕ ӕмӕ бронемашинӕтӕ киеваг режимӕн радтой 5 минӕй фылдӕр. Уымӕй уӕлдай ма сын сӕ разӕй скодтой 1300 сармадзаны, 200 реактивон системӕйы, 1200 зенитон ракетон комплексы, 23 минӕй фылдӕр ӕнӕпилотон тӕхӕн аппараты, 23 минӕй фылдӕр танкты ныхмӕ ракетон комплекстӕ, алыгъуызон хӕдтӕхджытӕ ӕмӕ верттӕхджытӕ, кӕцыты нымӕц бӕлвырд нӕу. Уымӕй уӕлдай ма сын радтой бӕрзондтехнологон ракетӕтӕ. 100 минӕй фылдӕр хӕстоны та рацыдысты ахуыртӕ Европӕйы НАТО-йы базӕты. Ӕмӕ дзы уый, æрмæст чи рабӕрӕг ис, уыдон.
Ныгуылӕйнаг политиктӕй кӕцыдӕрты уырнын рай-дыдта, ома украинаг гарзджын тыхты хъомысад уыйбӕрц у ӕмӕ ныр Уӕрӕсейыл «сау бон» ӕркӕндзӕн. Фӕлӕ хӕсты быдыры хабӕрттӕ сӕ фӕндиаг нӕ рауадысты. Кӕй зӕгъын ӕй хъӕуы, уӕрӕсейаг гарзджын тыхтӕ дӕр бирӕ зиӕнттӕ баййӕфтой, фӕлӕ сӕ украинӕгты зиӕнттимӕ абарӕн нӕй, уыдон сӕхи бынтон ныццӕгъдын кодтой. Ӕрмӕст фӕстаг ӕрдӕг азы дзы фӕмард 160 мин хӕстоны, басыгътой сын 3 минӕй фылдӕр танктӕ ӕмӕ æндæр бронетехникӕ, ӕрӕппӕрстой сын 12 хӕдтӕхӕджы ӕмӕ 23 верттӕхӕджы. Уыимæ ма уӕрӕсейаг ӕфсӕддонтӕ уӕрӕх кӕнынц фронт, размӕ цӕуынц алы ран дӕр.
Уӕрӕсейаг гарзджын тыхтӕ ӕнтыстджын кӕй сты хӕсты быдыры, уый катайы ныппӕрста киеваг фашистты ӕмӕ сӕ кураторты, алы амӕлттӕй агурынц разиан кӕныны фадӕттӕ. Уӕрӕсейаг хӕстонты ныхмӕ сӕ бон фӕлӕууын нӕу ӕмӕ ӕхсынц сабырцӕрӕг цæрджыты ракетӕтӕй, сармадзантӕй, реактивон системӕтӕй, тобӕгонд кассетон нӕмгуытӕй. Марынц сӕ ӕнӕпилотон аппараттӕй. Сӕрмагонд ӕфсӕддон операцийы райдианӕй фӕстӕмӕ фӕмардис 4 700 сабырцӕрӕг адӕймаджы. Уыдонӕй 140-æй фылдӕр уыдысты сывӕллӕттӕ.
Англосакстӕ та европӕйаг континентӕй сарӕзтой хӕсты быдыр Уӕрӕсейы ныддӕрӕн кӕныны нысанӕн. Финлянди ӕмӕ ма дзы Швеци баззадысты ӕмӕ уыдоны дӕр тагъдыл интеграци кæнынц НАТО-имæ. Ӕрвылаз дӕр Уӕрӕсейы арӕнтӕм æввахс 40 хаттӕй фылдӕр ауадзынц ӕфсӕддон ахуыртӕ, кӕцытӕн сæ сценари вӕййы уӕрӕсейаг гарзджын тыхтимӕ схӕцын. Ацы ахуырты ма фӕстаг азты хайад райстой, НАТО-йы сконды цы бӕстӕтӕ не сты, ахӕмтӕ дӕр. Уыимӕ ма иумӕ Ныгуылӕны бӕстӕты разамынад архайы, цӕмӕй хӕстон архайдтытӕ райдайой Фӕскавказы, Балканы ӕрдӕгсакъадахы, Астӕуккаг Азийы, Афганистаны, Приднестровьейы.
ДЖИОТЫ Алыксандр
