Дунейæн тæссагдзинад цы вирусон инфекци æвзарын кæны, уый информацион фæрæзты бæрæггæнæнтæм гæсгæ кæд кæцыдæр бæстæйы æрнымæг вæййы, уæд æндæр ран та карздæр фæвæййы. Дунейы размæдзыд бæстæты ацы низы ныхмæ вакцинæ аразыныл цæуы уæхскуæзæй куыст. Низ кæд тæссагдзинад æвзæрын кæны ацæргæ адæмæн, уæддæр Уæрæсейы дæр æмæ махмæ дæр бæстæйы къухдариуæгады уынаффæмæ гæсгæ ахуырадон æмæ скъолайы агъоммæ уагдæтты урæд æрцыд ахуыры процесс. Банысан кæнын хъæуы уый, æмæ Хуссар Ирыстоны ахуырадон æмæ æндæр уагдæттæ рæстæгмæ æхгæд æрцыдысты грипп æмæ æндæр вирусон хæцгæ низты дыккаг уылæн кæй рапарахат, фылдæр уыцы аххосагмæ гæсгæ.
Бирæ ныййарджытæ фæиппæрд сты сæ куыстытæй, уымæн æмæ сæ æнахъом сывæллæтты кæй æвджид фæуадзой, уый сын нæй. Уыдон æнæрхъæцæй æнхъæлмæ кæсынц, кæд фервæздзыстæм ацы вирусон хæцгæ низты уылæнæй æмæ та кæд æрæвналдзысты сæ уарзон куысты-тæм.
Санитарон-эпидемиологон уавæр цæмæй ма фæкарздæр уа, уый тыххæй республикæйы сæйраг санитарон дохтыр Коцты Маринæ æппынæдзух сиды не ‘мбæстæгтæм, цæмæй рæстæгмæ сæхи бахизой æхсæнадон бынæттæй. Ацы хъуыддаджы активон куыст бакодтой Мидхъуыддæгты министрады фадыгон инспектортæ дæр. Уыдонæй алчидæр йæ фадыджы æмбæстæгтæн лæмбынæг радзырдта æмæ бамбарын кодта уазал рæстæджы цы хæцгæ низтæ рапарахат вæййы, уыдонæй хи бахизыны мадзæлттæ æмæ иугæр адæймаг лæмæгъдзинад банкъардта, науæд буары тæвды бæрзонд бæрæггæнæн, уæд æнæмæнгдæр хъуамæ бадзура фадыгон дохтырмæ.
Республикæйы астæуккаг скъолаты карантины рæстæг æрхауд уалдзыгон улæфтыты рæстæгмæ дæр æмæ уымæй чысыл рогдæр кæны ахуырады уавæр. Фæлæ хъуыддаг уый у, æмæ мыййаг куы адарддæр уа уыцы карантин, уæд ахуырдзау фæсивæд, кæй зæгъын æй хъæуы, фæстейæ зайынц ахуыры программæйæ.
Куыд æрвитынц рæзгæ фæлтæр сæ улæфты рæстæг
Дианæ, Кристинæ æмæ Маринæ сæ уалдзыгон улæфты рæстæг æрвитынц хъæуы сæ æнаимæ. Райсомæй мадæл устытау бакæнынц сæ куыстытæ, стæй атезгъо кæнынц хъæуы уынгты, хъæдмæ ацæуынц, дидинджытыл узæлынц. Сихорыл та сыхæгты сывæллæттимæ хъазынц алыгъуызон хъæзтытæй. Сæхицæн аразынц алыгъуызон хæринæгтæ æмæ адджинæгтæ кæнынц. Иу-дзырдæй, уыдонмæ гæсгæ зæрдыл æрлæууынц рагон æвзонджы бонтæ – куыд æрвыстам нæ сæрибар рæстæг мидисджын æмæ хъæлдзæгæй, æппæт уыдæттæ.
Чызджытæ сæхæдæг дæр сты райгонд, зæгъгæ, æнæ интернеты тыгъдадæй дæр цард мидисджын разынд – хъуыды кодтой, куыд хъуамæ æрвитой сæ рæстæг, фæлæ сыл бон куыд баизæр вæййы, уый нæ базонынц.
«Уый нæ, фæлæ нæ æнайы фæдзурын кодтам нæ ныййарджытæм æмæ нын уый адарддæр кодта нæ горæтмæ ацæуыны рæстæг», – худгæйæ дзырдтой чызджытæ.
Хи бахизыны мадзæлттыл дзургæйæ
Нæ республикæйы территорийыл кæд нæма ис коронавирусæй рынчынтæ, уæддæр стыр куыст цæуы, ацы тæссагдзинад æвзарæг хæцгæ низæй хи бахизыны мадзæлттыл. Дезинфекци цæуынц æхсæнадон бынæттæ, стæй республикæйы æмбæлон органтæ си-дынц æмбæстæгтæм, цæмæй рæстæгмæ фæхæцой массон хъуыддæгтыл. Уый ныртæккæ у дунеон практикæ, æмæ æппæт мадзæлттæ дæр здæхт сты адæймагады ацы вирусон низæй æмæ гриппы æндæр хуызтæй бахизыны нысанæн. Уымæ гæсгæ алы адæймаг дæр хæсджын у цæмæй æмбаргæ ахаст равдиса ацы ахсджиаг хъуыддагмæ.
Нæ уацх.
Comments are closed, but trackbacks and pingbacks are open.