Куыд зонæм, афтæмæй Гуырдзыстоны территорийыл райтынг хæцгæ вирусон низ H1N1, кæцы фылдæр зындгонд у «хуыйы гриппæй». Ацы мæлæтхæссæг гриппы амæттаг ныридæгæн баисты 13 адæймаджы. Ацы гриппы нысæнттæ сты хуымæтæг гриппы хуызæн, фæлæ йæ фæстиуджытæ та сты карз. Специалистты амындтæм гæсгæ, уынгмæ æнæ дзыхæмбæрзæн хизын нæ хъæуы, уымæн æмæ æхсæнадон бынæтты гæнæн ис æмæ организм ацахса вирус.
Информацион хъусынгæнинæгтæм гæсгæ Гуырдзыстоны поликлиникæтæ æмæ рынчындæттæ рахызтысты куысты уæлæмхас режиммæ. Инфекцион хайадты ныридæгæн нал ис бынæттæ. Ачъара, Зугдид æмæ Кутаисы дæр ис вазыгджын уавæр. Гуырдзыстонимæ сыхаг Сомихстоны дæр хынцыд æрцыд грипп æмæ карз респираторон вирусон инфекцийæ рынчынты 600 цауы. Инфекцийы фæстиуæгæн адæймаджы организм кæны лæмæгъ æмæ уæлдай тынгдæр бандавы зæрдæ, рæуджытæ æмæ уыргтыл.
Гуырдзыстоны низтыл контроль кæныны фæдыл националон центры директоры хæдивæг Паата Имнадзе кæд иуварс кæны, сæ территорийыл гриппы фæзынд, уæддæр уый дызæрдыггаг нæу. Уыцы-иу рæстæджы ма уый бынтон мæнг ныхасыл æмæ «фыдæнæнгæнæг информацион провокацийыл» нымайы, социалон хызæгты ацы вирусы тыххæй цы дам-думтæ цæуы, уый, ома, Лугары номыл биологон лабораторийы куыстимæ йын ис бастдзинад. Уый зæрдыл æрлæу-уын кодта, ацы уагдон рагæй кæй ис Гуырдзыстоны Националон центры контролы бын, æмæ, зæгъгæ, йæ дуæрттæ гом сты алы цымыдисгæнæгæн дæр.
Ацы тæссаг гриппы райтынг сыхаг бæстæйы æмæ уымæй хи бахизыны нысанæн Хуссар Ирыстоны Паддзахадон æдасдзинады комитет фехъусын кодта, Гуырдзыстонимæ паддзахадон арæн æхгæд кæй æрцыд. Ацы фарсты фæдыл Хуссар Ирыстоны Æдасдзинады совет ауагъта тагъдыл æмбырд æмæ нæ республикæйы территори уыцы вирусæй бахъахъхъæныны нысанæн ист æрцыд уынаффæ 11 январы 20:00 сахатæй арæныл хизæн бынæттæ рæстæгмæ сæхгæныны тыххæй.
Хуссар Ирыстоны Æнæниздзинад хъахъхъæныны æмæ социалон рæзты министрады пресс-службæйæ нæм куыд фехъусын кодтой, уымæ гæсгæ нæ территорийыл хуымæтæджы грипп фæзынды цаутæ дæр нæй хынцыд.
Вирусон хæцгæ низы фыццаг симптомтæ сты: бæрзонд температурæ, сæры рыст æмæ ризын. Фæриссы гуыбын æмæ фæхæццæ кæны зæрдæ.
Грипп гæнæн ис бахæца уæлдæфы руаджы кæнæ рынчын адæймаджы мигæнæнтæй пайдагæнгæйæ, гъе та дæ фарсмæ куы æхснырса, уæд. Йæ инкубацион рæстæг у иу бонæй цыппар бонмæ.
Уымæ гæсгæ хъæуы цырддзаст уæвын, низæй бахизын æмæ профилактикон мадзæлттæ аразын: арæх къухтæ æхсын, спирт кæм ис, ахæм тæн-гъæдтæй пайда кæнын æмæ рынчын адæймæгтæй хи хизын.
Кæбулты Маринæ
Comments are closed, but trackbacks and pingbacks are open.