Кæд фæстаг азты цасдæрбæрцæй фæмæгуыраудæр чиныгмæ ахаст, уæддæр Анахарсисы номыл Хуссар Ирыстоны националон библиотекæмæ æрвылбондæр æрбацæуы чиныгкæсджытæ. Уыдоныл зæрдиагæй сæмбæлынц библиотекæйы кусджытæ æмæ фæстæмæ аздæхынц хорз æнкъарæнтимæ. Библиотекæйы цард æмæ куысты тыххæй йæ директор Кокойты Валерияимæ ныхас кодта нæ уацхæссæг.
– Библиотекæйы сæйрагдæр хъæздыгдзинад сты чингуытæ. Цал чиныг уæм ис æмæ сæ фонды цахæм ивындзинæдтæ æрцыдис?
– Библиотекæ сæйраджы дæр чингуытæй библиотекæ у. Нæ чингуытæ 2019 азы райдианы уыдысты 346 951. Азы фæудмæ ма сæм бафтыд 520 чиныджы.
Дзæвгар нæм ис нывæфтыд литературæ – уырыссаг æмæ ирон фысджыты уацмыстæ. Уымæй дарддæр ма нæ библиотекæ хъæздыг у историон, юридикон, хъæууон хæдзарадон æмæ æндæр темæтыл фыст чингуытæй.
– Цахæм уавæры сты уæ чингуытæ, пайда кæнынæн сæ чи нал бæззы, уы–дон цы фæвæййынц, исты реставрацион куыст феххæст кæнут?
– Чингуытæ се ‘ппæт дæр тæрхджытыл æвæрд сты библиотекæты домæнтæ æмæ фæткойтæм гæсгæ. Нæ хъус сæм дарæм. Чиныгкæсджытæ арæхдæр цы чингуытæ хæссынц, уыдонæй ис, реставраци кæнын кæй бахъæуы, ахæмтæ.
– Уæлдæр банысан кодтай, зæгъгæ, уæ чингуытæ ацæугæ аз фæфылдæр сты 520 экземпляры. Кæй фæрцы?
– Цы чингуытæ нæм æрбафтыд, уыдоны фылдæр хай нын балхæдта Хуссар Ирыстоны Культурæйы министрад. Къорд чиныгы райстам Мыхуыры хæдзарæй. Чингуытæ ма нæм æрбафтыд гуманитарон фонды æххуысæй дæр. Ахæм æххуысы тыххæй се’ ппæтæн дæр зæгъын бузныг.
– Хайадтæ та уæм цал ис æмæ дзы 2019 азы хуыдзæр бæрæггæнæнтæ кæмæн уыдис?
– Нæ библиотекæйы ис дыууадæс хайады. Чи сæ кусы, уыдонæй æхсæз сты куысты ветерантæ, æхсæз та – культурæйы сгуыхт кусджытæ. Иу дзы иннæмæй æвзæрдæр, кæннод та хуыздæр кусы, уый зæгъын нæу мæ бон. Уымæн æмæ сæ алчи дæр йæ куыстмæ дары æмбæлон ахаст, алчи дæр сæ тырны, цæмæй йын йæ куыстмæ фау мачи æрхæсса æмæ сæ уыцы тырнындзинад алкæй къухты дæр æфты.
– Ацæугæ аз цахæм мадзæлттæ ауагътат?
– Ацæугæ аз ауагътам 23 мадзалы. Куыд нæхи, афтæ æрбацæуджыты æмæ хайадисджыты зæрдæтæ дæр барухс сты, Стыр Фыдыбæстæйон хæсты Уæлахизы боны цытæн цы мадзал ауагътам, уымæй. Зæрдæйы фæндиаг нын рауадысты ирон æгъдæутты тыххæй мадзæлттæ дæр. Ацæугæ аз уыд Къостайы аз. Йæ юбилеймæ нæхи бацæттæ кодтам хорз æмæ цы мадзал ауагътам, уымæй барухс кодтам, чи нæм æрбацыд, уыдон зæрдæтæ. Уымæй дарддæр ма ауагътам изæртæ, «Поэттæ, кæцытæ райгуырдысты октябры», «Æвзист æнусы по-эттæ» æмæ æндæртæ. Нæ мадзæлтты арæх хайад кæй райсынц, уый тыххæй мæ стыр бузныг зæгъын фæнды Хицауад æмæ Парламенты сæрдæрттæ Пухаты Эрик æмæ Тадтаты Алан, Ирыстоны фысджыты цæдисы æмсæрдар Хъазиты Мелитон, газет «Хурзæрин»-ы сæйраг редактор Гæбæраты Юри, университеты ирон литературæйы кафедрæйы сæргълæууæг Плиты Гацыр, ацы кафедрæйы хистæр ахуыргæнæг Плиты Серго æмæ æндæртæн. Мадзæлттæ ауадзыны рæстæджы се стыр æх-хуысы тыххæй ма мæ бузныг зæгъын фæнды Хуссар Ирыстоны Культурæйы министр Зассеты Жаннæ, йæ хæдивæг Дзеранты Джульеттæ, библиотекæты куысты сæйраг специалист Дриаты Нателæ æмæ æндæртæн.
– Фæстаг азты чиныгмæ йæ ахаст чи фæуазалдæр кодта, уыдонæн дæ зæгъын цы бафæнддзæнис?
– Нæ сæйрагдæр хæстæй иу у, цæмæй библиотекæ бауарзын кæнæм æмæ йæм æрбахонæм фылдæр чиныгкæсджыты, цайдагъ сæ кæнæм чиныгкæсыныл. Ацы хъуыддаджы нæ сæйраг æмдзугæнæг у интернет. Интернетимæ цасдæрбæрцæй æххæст кæнæм æмхуызон функцитæ, фæлæ чиныгы нысаниуæг чи æмбары, уыдон цæуынц махмæ. Уымæн æмæ чиныг фадат дæтты удæгас хъуыдытæ банкъарынæн
– Рæхджы уыдзæнис библиотекæты кусджыты бон, куыд æм цæттæ кæнут уæхи?
– Ныртæккæ арæзт цæуы йæ ауадзыны программæ. Бæлвырд уал у уый æмæ ацы мадзалмæ кæй æрбахондзыстæм фылдæр чиныгкæсджыты. Фæхондзыстæм паддзахады разамонджыты, ахуыргæндты, фысджыты, нывгæнджыты, скъоладзауты, хуымæтæг чиныгкæсджыты.
ГÆЗЗАТЫ Иван
Comments are closed, but trackbacks and pingbacks are open.