Стыр Уæлахизы бæрæгбоны цытæн цытджын мадзал ауагъдæуыд Дзауы райцентры. «Мысæн аллея»-йы Стыр Фыдыбæстæйон хæсты хъайтарты номыл цы цырт æвæрд æрцыдис, уырдæм цæрджытæ цыдысты хъæлдзæгæй, бæрæгбонвæлыстæй, скъоладзау фæсивæд хастой дидинджытæ уæлахизхæсджыты нæмттæ æрæмысыны сæраппонд. Ам цытджын æгъдауæй сæвæрдтой Кады гирляндæ дæр. Дардыл хъуыстысты популярон æфсæддон зарджыты зæлтæ. Раздæр та айзæлыдысты Уæрæсейы Федераци æмæ Хуссар Ирыстоны гимнты зæлтæ.
Уæлахизы бæрæгбонон мадзал байгом кодтой мадзаламонджытæ Тыбылты Тотыр æмæ Джиоты Ларисæ. Уыдон банысан кодтой, районы ма æрмæстдæр иунæг ветеран кæй ис – Магкоты Соня, уый. Йе ‘нæниздзинад мæгуырау кæй у, уый тыххæй хайад нæ райста мадзалы. Цыбыртæй æрдзырдтой хæсты даргъ историйыл. Нæ Райгуырæн бæстæмæ немыцаг-фашистон тыхæйисджытæ куы æрбабырстой, уæд кæй бахъуыд Фыдыбæстæ бахъахъхъæныны сæр. Адæм фыццаг бонæй слæууыдысты цыфыддæр знаджы ныхмæ æмæ суанг йæ кæронмæ удуæлдайæ хæцыдысты æмæ дæрæн кодтой немыцаг фашистты.
«Гитлер йæ гигантон хотыхджын æфсадимæ европæйаг бæстæты басæтгæйæ, хъавыд цалдæр къуыримæ ССР Цæдисы ныппырх кæнын. Фæлæ фашисттæ куыд æнхъæл уыдысты, афтæ нæ рауад. Æмæ уый æцæгæйдæр афтæ уыдис. Истори равдыста, Сырх Æфсад Райгуырæн бæстæйы сæрвæлтау цы хъайтардзинæдтæ æвдыста, уый», – банысан кодта Тыбылты Тотыр æмæ уый фæстæр бакаст æмдзæвгæ «Æнæном салдат».
Ирыстоны дæсгай мин фырттæ æмæ чызджытæ дæр æрлæууыдысты фашистты ныхмæ, цæмæй бахъахъхъæдтаиккой Райгуырæн бæстæ. Уыдон знаджы дæрæн кодтой уæлдæфы æмæ денджызы, мæлæт-дзаг тох кодтой Мæскуыйы цур, хъахъхъæдтой Севастополь æмæ Сталинград, тох кодтой Курскы къæлæтауы, сæрибар кодтой Европæйы бæстæтæ æмæ штурмæй истой фашистон Берлин. Уыдонæн се ‘мбисæй фылдæр нал æрыздæхтысты сæ хæдзæрттæм. Æппæт ацы цаутæ æрæмысыдысты, хъæбатырты цырты размæ чи æрæмбырд, уыдон.
Хæстон цауты тыххæй æмæ Стыр Уæлахизы фæдыл раныхас кодта районы æфсæддон къамисар Санахъоты Юри дæр æмæ арфæйы ныхæстæ загъта ветерантæн. Уый фæстæ мадзаламонæг бахатыд адæммæ, цæмæй иу уысм æмырæй алæугæйæ, ссарой Стыр Фыдыбæстæйон хæсты фæмардуæвæг æмæ Ирыстоны зынгхуыст хъæбатырты рухс нæмттæ.
Цæрджытæ æмæ администрацийы ра-замынад «Мысæн аллея»-мæ уæлахизхæссæг хæстонты номарæн цырты раз цытджын æгъдауæй сæвæрдтой венок æмæ дидинджытæ.
Мадзал адарддæр бæрæгбонон кон-цертæй, хайад дзы райстой районы сфæлдыстадон къордтæ.
Дзауы районы Уæлахизы бæрæгбоны цытæн цы мадзæлттæ уагъд цыдис, уыдоны хайад истой УФ-йы Æдасдзинады Федералон службæйы Арæнгæрон управленийы службæгæнджытæ дæр. Уыдон парчы сорганизаци кодтой быдырон къæбиц дæр æмæ адæм ацаходыдтой сæ арæзт æфсæддон касæй.
Абон ма дзауæгтæн киноконцертон залы 18:30 сахатыл равдисдзысты нывæфтыд фильм «Т-34» æмæ бæрæгбонон мадзæлттæ ахицæн уыдзысты фейерверкæй.
ЦХУЫРБАТЫ Ларисæ
Comments are closed, but trackbacks and pingbacks are open.