СОВЕТОН АДÆМЫ ÆНÆМÆЛГÆ СГУЫХТДЗИНАД

Хуссар Ирыстоны æхсæнад банысан кодтой Уæлахизы 73 азы бон

 

Стыр Фыдыбæстæйон хæсты советон адæмы уæлахиз æрвылаз дæр нысан цæуы цытджын æгъдауæй. Æвдай æртæ азы рацыд Стыр Уæлахизы бонæй, кæцы советон адæмы къухты бафтыд историйы иууыл тугкалæндæр хæсты дунеон фашизмы ныхмæ. Куыд æрвылаз, афтæ ацы аз дæр ацы кадджын æмæ нысаниуæгджын бæрæгбон Хуссар Ирыстоны нысан цыди цытджын уавæрты. Нæ республикæйы сæйраг горæт Цхинвалы Театралон фæзуатмæ 9-æм майы æрбацыдысты Стыр Фыдыбæстæйон хæсты æмæ фæсчъылдымы ветерантæ.

Ардæм æрбацыдысты нæ горæты цæрджытæ чысыл сабийæ зæронды онг, афтæ ма нæ горæты уазджытæ дæр. Алкæмæн дæр уыд бæрæгбонон зæрдæйы равг. Уымæн ахъаз кодта хорз боныгъæд дæр.

Стыр Уæлахизы боны цытæн æфсæддон парады райдианы агъоммæ   цытджын трибунæмæ схызтысты РХИ-йы Президент Бибылты Анатоли, Хицауады Сæрдар Пухаты Эрик, Парламенты Сæрдар Гасситы Петр, Хуссар Ирыстоны Уæрæсейы Федерацийы æххæстбарджын минæвар Марат Кулахметов, экспрезидент Тыбылты Леонид. Парадмæ кæсыны фадат уыд Стыр Фыдыбæстæйон хæсты ветерантæ, æмæ æндæр официалон адæймæгтæн.

Фæзуатмæ Хъахъхæнынады министрады цытджын караул æрбахастой Уæлахизы тырысайы халдих æмæ РХИ-йы Паддзахадон тырыса.

Фашистон Германыл Стыр Уæлахизы 73 азы цытæн, æфсæддон парады райдианы РХИ-йы Хъахъхъæнынады министры хæстæ æххæстгæнæг Гассеты Ибрагимæй парад райста Республикæ Хуссар Ирыстоны Гарзджын тыхтыл Сæйраг къомандæгæнæг Бибылты Анатоли. Уый фæстæ Республикæ Хуссар Ирыстоны Президент Бибылты Анатоли Стыр Уæлахизы цытæн арфæ ракодта ветерантæн, стыр Уæлахиз чи æрхаста, уыдонæн,  æмткæй нæ республикæйы цæрджытæн. (Раныхас мыхуыр цæуы).

Айзæлдысты Республикæ Хуссар Ирыстон æмæ Уæрæсейы Федерацийы паддзахадон гимнтæ. Уый фæстæ Стыр Уæлахизы боны цытæн æфсæддон парад байгом Хъахъæнынады министрады тырысахæсджыты къордæй. Дарддæр цыдысты министрады дæлхæйттæ, Паддзахадон Æдасдзинады комитеты Арæнхъахъхъæнæг службæ, Кадетон скъолайы ахуыргæнинæгтæ, уæрæсейаг 4-æм æфсæддон базæ æмæ Федералон æдасдзинады службæйы арæнхъахъхъæнæг управленийы службæгæнджытæ, РХИ-йы Мидхъуыддæгты æмæ Уæлвæткон уавæрты службæгæнджыты уæздан хай – сылгоймæгты къорд.

Фыццаг хатт Хуссар Ирыстоны æфсæддон парады хайад райстой Донецкы уæлдæр иумиагæфсæддон командон ахуыргæнæндоны курсанттæ.

Æфсæддон парад адарддæр æфсæддон техникæйы рацыдæй.

 

ÆНÆМÆЛГÆ ПОЛК

Стыр Уæлахизыл 73 азы сæххæсты цытæн парады дыккаг хай уыдис   – Æфсæддон-патриотикон акци «Æнæмæлгæ полк». Акцийы нысан у Стыр Фыдыбæстæйон хæсты хайадисджыты нæмттæ нæ рох кæнын, æнустæм  сæ нæ зæрдыл дарын. «Æнæмæлгæ полк»-ы хæсты хайадисджыты къамтæ Театралон фæзуаты хастой сабыргай, æнæаскъуыйгæ цæугæдонау.

«Æнæмæлгæ полк»-ы къамтæ хастой нæ республикæйы министрадтæ, организациты, уагдæтты минæвæрттæ, скъолаты ахуыргæнинæгтæ æмæ ахуыргæнджытæ. «Æнæмæлгæ полк»-ы нымæц азæй-азмæ фылдæр кæны, йæ хайадисджытæ уыдысты минтæ. Уыдоны ‘хсæн уыдысты Президент Бибылты Анатоли æмæ Хицауады Сæрдар Пухаты Эрик. «Æнæмæлгæ полк»-ы сконды ма рахастой, 1989-2008 азты Хуссар Ирыстоны сæрибардзинады сæраппонд сæ сæртæ нывондæн чи æрхастой, уыдоны къамтæ дæр.

Хуссар Ирыстоны цæрджытæй парадмæ кæсынмæ чи æрбацыд, уыдонæй алчи дæр стыр цымыдисæй каст «Æнæмæлгæ полк»-ы цыдмæ.

Стыр Фыдыбæстæйон хæсты ветерантæ цы æгæрон ныфсхастдзинад æмæ патриотизм æвдыстой, уыдон рæзгæ фæлтæры зæрдæты æвзæрын кæнынц Фыдыбæстæйыл иузæрдиондзинад, хæлардзинад æмæ рæстдзинады æнкъарæнтæ. Æмæ цалынмæ цæрæм, уæдмæ кад кæндзыстæм нæ хъайтартæн.

«Æнæмæлгæ полк»-ы рацыды фæстæ Театралон фæзуаты уыд бæрæгбонон моторалыгъд Уæрæсейы Федераци æмæ Хуссар Ирыстоны байкерты хайадистæй. Бæрæгбонон мадзæлттæ фæзуаты адарддæр сты Уæлахизы 73 азы боны цытæн бæрæгбонон концертæй. Концерты хайад райстой нæ республикæйы адæмон инструменталон оркестр «Айзæлд» æмæ нæ республикæйы Сывæллæтты сфæлдыстадон коллективтæ. Уыдон кастысты æмæ зарыдысты Стыр Уæлахизы боныл фыст патриотикон æмдзæвгæтæ æмæ зарджытæ.

Танделаты Виленæ