Хабæрттæ Цæгат Ирыстонæй

***

Смоленскы цыд Хæдбар республикæты Цæдисы документалон кинонывты фæндзæм фестиваль «Еврази. ДОК». Уым æвддæс бæстæйы æмрæнхъ хайад иста Цæгат Ирыстон дæр. Эксперты хуызы дзы архайдта РЦИ-Аланийы Мы-хуыры æмæ коммуникациты хъуыддæгты фæдыл комитеты сæрдар Фидараты Юри, стæй культурæйы къабазы кусджытæй цалдæр. 

 Фидары фырт информацион медиа-тыгъдад рапарахат кæнынмæ стыр æвæрæн кæй хæссы, уый тыххæй йын лæвæрд æрцыд Республикæ Беларусы сгуыхт журналисты ном. Юри у, ирæттæй уыцы хæрзиуæг фыццаг чи райста, уый.

Фестивалы лауреат ссис режиссер Абайты Ольгæ йæ документалон киноныв «Уарзт æмæ хæхтæ. Ног истори»-йы тыххæй.

Цыбыр документалон кинонывты  кон-курсы та сæрмагонд призты аккаг систы Александра Токарева æмæ Бокоты Вик-тория.   

***

Дзæуджыхъæуы дæргъвæтин реставрацийы фæстæ æппæт фадæттимæ йæ дуæрттæ байгом кодта Сыгъдæг апостол къняз Владимиры аргъуан. Советон дуджы размæ ацы историон-культурон объект нымад уыдис дины æхсæнады разамонджыты резиденцийыл.

Ацы аргъуаны арæзтад канд Ирыстоны историйы сыф нæу, фæлæ æнæхъæн Уæрæсейы. Историон нысаниуæджы объекты хъысмæт æнгом баст у Дзæуджыхъæуы епархиимæ. Бындур ын æвæрд æрцыд 1875 азы.

Дины объектты цалцæджы куыстытæ æххæстгонд цæуынц Аланийы аргъуыдыл 1100 азы кæй æххæст кæны, уыцы программæйы фæлгæтты.

***                                                        

Мæздæджы байгом Æвзонг æрхъуыдыгæнджытæ æмæ фидæны ахуыргæндты технопарк «Кванториум». Наукон-ахуырадон комплекс нæ республикæйы у дыккаг. Фæзынд национ проект «Ахуырад»-ы бындурыл. Комплексы сæ бон уыцы иу рæстæг ахуыр кæнын уыдзæн 800 сывæллонæн. Сæ сæйраг предметтæ уыдзысты нырыккон наукæ æмæ техникæйы сусæгдзинæдтæ. Лабораторийы ис, нырыккон домæнтæн дзуапп чи дæтты, ахæм техникæ, лазерон æмæ фрезерон тæрхтæ, æндадзæн æмæ ныхасæн станцæтæ, сканертæ, микроскоптæ æмæ бирæ æндæр аппаратурæ. Ахуырады сæйраг нысан здæхт уыдзæн математикæ, физикæ æмæ астрономимæ.

Специалисттæ куыд зæгъынц, афтæмæй ацы ахуырадон уагдон каст фæуыны фæстæ æрыгон профессионалтæн амынд къабазы, стæй ма экономикæйы дæр уыдзæн стыр фæллойадон æнтыстытæ.

Нæ  уацх.