АХУЫРАД ÆМÆ СОЦИАЛОН КЪАБАЗ
Цæгат Ирыстоны хъæугæ объекттæ кæй нæ фаг кæны, уымæ гæсгæ республикæйы Парламент сфидар кодта ног закъоны проект. Уыцы закъонмæ гæсгæ, нырæй фæстæмæ æнæниздзинад хъахъхъæныны, ахуырады æмæ социалон къабазы куыстуæттæн, бадзырды фæлгæтты сæ бон лæварæй пайда кæнын уыдзæн, культурон бынтыл нымад чи ʻрцыд æмæ паддзахадон реестры чи ис, уыцы объекттæй. Уыимæ, æнæмæнг, хъахъхъæд æрцæудзæн сæ культурон ахадындзинад.
Культурон хæзнатыл нымад цы бæстыхæйттæ æрцыдысты, уыдонæн нæдæр уæй кæныны бар ис, нæдæр арендæйы раттыны бар, фæлæ уæддæр æнæхъуаджы лæууынæн æвгъау сты. Республикæйы разамынды хъуыдымæ гæсгæ, ахсджиаг къабазы куыстуæттæн сæ бон у ацы объекттæй лæварæй пайда кæнын.
* * *
Ахуырады къабазы историйы фыццаг хатт Дзæуджыхъæуы байгом уыдзæн аутизмæй уæззау хуызы рынчынтæн сæрмагонд рæвдауæндон. Бæрæг куыд у, афтæмæй ахæм рынчын сабитæм хъæуы æндæрхуызон ахаст, æндæр уавæртæ, кæцытæ не сты хуымæтæг рæвдауæндæтты. Уымæ гæсгæ, республикæйы разамынд рахаста уынаффæ æвæстиатæй уыцы уавæр рараст кæнын.
Сæрмагонд рæвдауæндоны уыдзæн цыппар къорды. Алы къорды – 15 сывæллоны. Хатæнты æвæрд уыдзæн, ахæм рынчынты домæнтæн дзуапп чи дæтты, ахæм хæдзарон дзаума, хъазæнтæ, хæринаг, уагæвæрд æмæ, сæйрагдæр, сæрмагонд ахуырадон программæ æмæ хъомылгæнджытæ.
* * *
Ног ахуыры азæй Цæгат Ирыстоны скъолаты фæзындзæн ног штат – директортæн уынаффæгæнджытæ (советник). Уыдонæн сæ куыст уыдзæн директоримæ ахуырады фарстатæ лыг кæнын, ахуыргæнджыты гом уроктæм байхъусын, сывæллæттæ æмæ сæ ныййарджытимæ бастдзинад аразын, скъоладзауты курдиæттæ æмæ зонындзинæдтæ раргом кæныныл бацархайын… Ахуырады специалистты хъуыдымæ гæсгæ, уыцы ногдзинад хуыздæрæрдæм сахаддзæн ахуырады процессыл.
Директортæн уынаффæгæнджытæ уал сентябрæй кусын райдайдзысты 130 скъолайы. Фæстæдæр алы скъолайæн дæр лæвæрд æрцæудзæн иу штат.
* * *
Дзæуджыхъæуы 22-æм æмæ 44-æм скъолаты тагъд бакæндзысты фыццаг информацион технологиты къластæ. Уым ахуыр кæндзысты техникæйы фæрцы информацион бастдзинады æууæлтыл. Ахуырады министр Алыбегты Эллæ куыд банысан кодта, афтæмæй уый фадат ратдзæн ацы ахсджиаг къабазы сывæллæтты ахуыры уавæртæ фæуæрæхдæр кæнынæн. Уымæн æмæ, ныры дуджы, æнæ техникон практикæйæ æрмæст теори фаг нæу.
Министры ныхæстæм гæсгæ, ахæм къластæ ноджыдæр фæзындзæн канд Дзæуджыхъæуы нæ, фæлæ районты скъолаты дæр.
