Тагъд нæ горæты хæрзарæзт уынгтæм бафтдзæнис ноджыдæр фараст. Гагарины, Кавказы, Икъаты Владимиры, Бушы, Мичурины, Козайы фырты æмæ Мæскуыйаг микрорайоны Владимир Путины æмæ Медведевы уынгтæ. Уыдон арæзт æрцæудзысты 2023 азæн Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты. Ныртæккæ Гагарины, Кавказаг æмæ Икъаты Владимиры уынгтыл мыдыбындзытау æмызмæлд кæнынц Автодоры кусджытæ. Ацы уынгты зæххыбын коммуникацион хæххытæ ивд никуы уыдысты сæ сырæзтæй фæстæмæ æмæ дзуапп нал лæвæрдтой сæ домæнтæн. Раивтой дзы дон æмæ канализацион хæххытæ, алы хæдзармæ дæр бауагътой дон, уый фæстæ та куыстытæм бавнæлдтой газы кусджытæ æмæ уыдон дæр куыст куы фесты, уæд та тротуартæ æмæ асфальтгæнæн куыстытæм æрæвнæлдтой. Иуæй-иу уынгтæ къаннæгаугонд сты уымæ гæсгæ сыл куыста иу бригадæ. Стырдæр уынгтыл та кусынц дыгай бригадæтæ. Иутæ дзы æрлæууыдысты уынгтæн сæ уæллаг фарс, иннæтæ архайынц уынджы кæроны. Ныртæккæ Мичурины æмæ Икъаты Владимиры уынгтыл чи архайы, уыдон æвдисынц æнæзæрдæхудт, арæхстджын куыст. Архайынц, цæмæй сæ кæрæдзи ма хъыгдарой æмæ сæ куыст сæххæст кæной банысангонд æмгъуыдмæ. Æппæт куыстыты сфидаргонд графикыл кæд ницы æнæнхъæлæджы къуылымпыдзинæдтæ фæзына, уæд тагъд ацы уынгтæ дæр балæудзысты нæ горæты срæсугъд уынгты æмрæнхъ.
Ацы аз сæххæст Мæскуыйаг микрорайон Владимир Путины æмæ Медведевы уынгты цæрджыты бæллиц дæр. Тынг тыхстысты уыдон рæстмæ фæндаг сæм кæй нæ уыд, уый тыххæй. Къæвдабонты азмæлæн нæ уыд цæрæн хæдзæртты рæзты. Цæрджытæ сæхæдæг куыд зæгъынц, афтæмæй фæндаджы дзыхъхъыты дон æмбырд кодта. Сæхи тыхтæй-иу æй барастытæ кодтой, æркалдтой-иу дзы хуыр, фæлæ-иу уый бирæ рæстæг нæ ахаста, уайтагъд-иу къæвда рæстæджы фехæлдис æмæ дзы къахæйцæуджытæн нæ, фæлæ машинæтæн дæр ахизæнтæ нал уыдис. «Æппынфæстаг махæн дæр нæ уынгтæ рафидыдтой æмæ фервæздзыстæм нæ фыдæбæттæй. Тыхстыстæм къæвдабонты цъыфæй, хурбон та – рыгæй. Ацы хæдзæрттæ ныл 2009 азы байуæрстой æмæ уæдæй нæ хъиутæ хордтам. Ныр нæ цинæн кæрон нал ис», – зæгъы Мæскуыйаг микрорайоны цæрæг.
Арæзтад, архитектурæ æмæ цæрæнуатон-коммуналон хæдзарады куыд зæгъынц, афтæмæй архайдзысты, цæмæй уынгты арæзтад ма ныддаргъ уа. Уый тыххæй, дам, ифтонг стæм техникæйы хуызтæ æмæ арæзтадон æрмæджытæй дæр.
Уазæгты Марфа
