Уæрæсе, Хуссар Ирыстон æмæ Латинаг Америкæйы бæстæты скъоладзауты ‘хсæн уагъд æрцыд турнир шахмæттæй. Æдæппæтæй дзы сæ цæттæдзинад фæлвæрдтой 17 командæйы. Фембæлдтытæ цыдысты онлайн-режимы. Алы командæйы дæр уыд фæйнæ дæс хъазæджы. Фæстаг турты онг нæ командæ цыд 4-æм бынатыл, фæлæ кæронбæттæн хъæзтыты хуссарирыстойнаг шахматисттæ ахъазыдысты хорз æмæ сын бантыст дыккаг бынатмæ рахизын.
Хисæрмагонд хыгъды лæппуты ‘хсæн æртыккаг ссис Джыгкайты Артур, чызджыты ‘хсæн та æртыккаг бынат бацахста Тыбылты Аланæ.
«17 командæйы ‘хсæн дыккаг бынат кæй бацахстам, уый махæн у стыр æнтыст. Уымæй дæр нæ ныхмæлæуджыты ‘хсæн уыдысты ахæм шахматисттæ, кæцытæн 16 азы онг кæуыл цæуы, уыцы спортсменты ‘хсæн хорз æнтыстытæ ис дунеон æмвæзады ерысты», – банысан кодта РХИ-йы шахматты федерацийы президент Саулохты Георги.
Ныр æвзонг спортсментæ сæхи цæттæ кæнынц радон ерыстæм. Уыдон ма æввахс рæстæджы хайад райсдзысты республикæ расидыны боны цытæн турниры, кæцы уагъд æрцæудзæн 17 сентябры.
УÆГЪДИБАР ХЪÆБЫСХÆСТ
Якутскы уагъд æрцыд уæгъдибар хъæбысхæстæй Дмитри Коркины мемориал. Уым Ирыстоны хъæбысхæсты скъолайы хъомылгæнинæгтæ рамбылдтой дыууæ сыгъзæрин, иу æв-зист, æмæ иу та бронзæ майданы.
74 кг уæзы категорийы фыццаг бынат бацахста Байты Давид. Уый финалы фæуæлахиз Тимур Бижоевыл, кæцыйæн ацы аз фæхæрд Уæрæсейы чемпионаты. Афтæмæй йын бантыст реванш райсын. 86 кг уæзы категорийы та турниры уæлахиздзау ссис Найфонты Артур. Уый финалы рамбылдта Малик Шаваевы, кæцы ацы аз 79 кг уæзы категорийы ссис Уæрæсейы чемпион.
Турниры 65 кг уæзы категорийы та дыккаг бынатыл ацыд Бадтиаты Артур. 92 кг уæзы та бронзæйон призер ссис Багаты Алан.
ХУРИТЫ Батрадз
