Паддзахадон унитарон куыстуат «Водоканал»-ы директор Сиукъаты Иван куыд зæгъы, афтæмæй Едыс-Цхинвалы магистралон доны хæтæлы æнæмæнг хъæуы реконструкци скæнын, цæмæй нæ республикæмæ доны гуырахст фæфылдæр уа 16 мин кубы онг. «Æрæджы донуадзæны цы стыр авари æрцыд Чъехы хъæуы, уый фенын кодта Уанат-Цхинвал æмæ Едыс-Цхинвалы магистралон хæххыты цыппар резервуары цы дон вæййы, уыдоны гуырахст кæй фаг кæны æрмæст цыппар сахаты бæрц. Ацы резервуартæй дыууæ сты Тулдзы къохы, кæцыты иумæйаг гуырахст у 10 мин кубикон метры. Цхинвалы районы Присы хъæуы Уанаты хъæуæй цы дон уагъд æрцыд, уыдонæн дæр арæзт æрцыд дыууæ æмбырдгæнæн, уыдоны гуырахст та у фæйнæ 3,5 мин кубикон метры. Мах æвдисæн уыдыстæм æрæджы Едыс-Цхинвалы хаххыл цы стыр авари æрцыд, уый фæстиуæгæн адæм цалдæр бон æнæдонæй куыд баззадысты. «Водоканал»-ы кусджытæ авари аиуварс кæныныл куыстой æхсæвæй-бонæй, фæлæ уæддæр цалдæр бонмæ йе сцалцæг кæнын сæ къухы нæ бафтыд», – зæгъы Сиукъаты Иван.Едысы доны магистралон хаххæй ифтонг кæны канд горæты цæгат хайы цæрджытæ нæ, фæлæ ма Дзауы поселок æмæ йæ алфæмблай хъæуты цæрджыты дæр. Сиукъаты Иваны хъуыдымæ гæсгæ куыддæр фадат фæуа, афтæ фыццаджыдæр, реконструкци æрцæудзæн Едыс-Цхинвалы доны хæтæл.
«Уæлæмхас хæтæлтæ ауадзын хъæуы æндæр рæтты. Уымæй дарддæр реконструкцийы программæмæ бахастам доны гуырæнæй ноджы уæлæмхас хахх рауадзын дæр. Сæ иу уыдзæн Едысы хъæуы, иннæ та Дзомагъы комы. Кæд нын ахæм куыстытæ бантыса, уæд уый ратдзæн уæлæмхас дон 15 кубикон метры онг», – загъта «Водоканал»-ы сæргълæууæг.
Нæ уацх.
