Уынаффæ цыд æртаг-сæрдæн æрмæджытæй æнæкъуылымпыйæ ифтонг кæныны фарстыл

РХИ-йы Хицауады Сæрдар Пухаты Эрик ауагъта Хицауады æнæрадон рабадт, кæцыйы боны фæткмæ хаст æрцыдысты дыууæ фарсты. Уынаффæ цыд æртаг-сæрдæн æрмæджытæ Хуссар Ирыстонмæ æнæкъуылымпыйæ ласыны фарстыл.

Экономикон рæзты министр Кокойты Геннади æрæмбырдуæвджытæн информаци сарæзта, паддзахадон унитарон куыстуат «Югосетнефтепродукт»-æн авансон бафыстытæ сæххæст кæныны тыххæй, хицæн министрадтæ æмæ ведомствотæ æртаг-сæрдæн æрмæджытæй кæй пайда кодтой, уый фæдыл.

«Хъахъхъæнынады министрад, Уæлвæткон уавæрты министрад, Мидхъуыддæгты министрад, Паддзахадон æдасдзинады комитет æмæ Хъахъхъæныны паддзахадон службæ хъуамæ сæххæст кæной 100 процентон авансон бафыстытæ паддзахадон унитарон куыстуат «Югосетнефтепродукт»-æн, ацы азæй ма цы рæстæг баззад, уымæн æртаг-сæрдæн æрмæджыты тыххæй, казначействойæ гæх-хæтт райсынæй дыууæ боны æмгъуыдмæ. Уый æнæмæнг саразын хъæуы, цæмæй «Югосетнефтепродукт» стабилонæй куса», – загъта Кокойты Геннади.

Хицауады Аппараты къухдариуæггæнæг Гаглойты Олег фæндон бахаста, цæмæй Республикæ Хуссар Ирыстоны Хицауады 2017 азы 27 январы  №5-р Уынаффæ «Республикæ Хуссар Ирыстоны æмбæстагон-барадон бадзырды уавæрты бæрæг куыстытæ бакæныны æмæ (кæнæ) бæрæг лæггæдтæ бакæныны тыххæй уæрæсейаг специалистты кандидатты фæдыл кадрон агентады фæндæттæм æркæсыны фæдыл къамисы тыххæй»-мæ хаст æрцæуа ивындзинæдтæ.

«Республикæ Хуссар Ирыстоны Хицауады кадрон ивындзинæдтæ кæй æрцыд, уымæ гæсгæ Къамисæй раконд æрцыдысты Зæгъойты Вильям Юрийы фырт æмæ Кулиджанов Григори Степаны фырт æмæ йæм баконд æрцыдысты Кокойты Геннади Герасимы фырт æмæ Тотчиты Георги Феликсы фырт», – загъта уый.

Уымæй дарддæр ма Гаглойты Олег фæндон бахаста, цæмæй фæивдæуа Уæрæсейы Федерацийы Республикæ Хуссар Ирыстоны Минæварады кусæджы бынаты формулировкæ æмæ хуыйна «Уæрæсейы Федерацийы Республикæ Хуссар Ирыстоны Минæварады уынаффæгæнæг – æрвыст лæг».

Рабадты рæстæджы зындгонд ссис, ацы бонты Уæрæсейы Федерацийæ кæй æрцæудзы-сты дыууæ специалисты æнæниздзинад хъахъхъæныны хаххыл. Уыдон æрвыст æрцæудзысты Сывæллæтты республикон рынчындонмæ кусынмæ.