Хуссар Ирыстоны Мидхъуыддæгты министр Наниты Игорь Паддзахадон автоинспекцийы боны цытæн йе ‘мкусджыты схорзæхджын кодта радон чинтæ æмæ ведомствойон хорзæхтæй. Цытджын рæнхълæуды рæстæджы Паддзахадон автоинспекцийы кусджытæ чинтæ æмæ хорзæхтæй дарддæр РХИ-йы Мидхъуыддæгты министрады къухдариуæгадæй райстой арфæтæ дæр.
Наниты Игорь куыд загъта, афтæмæй Паддзахадон автоинспекцийы кусæджы куыст у вазыгджындæртæй сæ иу æмæ банысан кодта, зæгъгæ, сæ хæстæ æххæст кæныны рæстæджы ведомствойы кусджытæ хъуамæ къухдариуæг кæной æрмæстдæр закъонæй æмæ сæ службæйы цы фæтк биноныг æрцыд, уымæй.
«Æмбæстæгтæ дих кæнынц дыууæ категорийыл: закъонмæ хъусджытыл æмæ, закъон чи халы, уыдоныл, – банысан кодта Наниты Игорь. – Паддзахадон автоинспекцийы кусджытæй бирæтæ сæ куыст æххæст кæнынц бæрндзинадимæ, иннæты та нæ фæнды фæтк бахъахъхъæнын, уый тыххæй мæ фæнды ноджыдæр уæм æрсидон, цæмæй мах иууылдæр нæ тых радтæм æмæ шофыртæн бамбарын кæнæм, фæндагыл цæуыны фæткойты æнæмæнгæй хъахъхъæнын кæй хъæуы».
Фæндæгтыл цæуыны æдасдзинады паддзахадон инспекцийы хистæр Цхуырбаты Эльбрус дæр раарфæ кодта ведомствойы сæрмагонд скондæн æмæ сын загъта сæ службæйы æнтыстыты фæндиæгтæ.
«Азæй азмæ, æрвылбон дæр мах нæ куыст хъуамæ кæнæм хуыздæрæй хуыздæр. Сымахæй алкæмæн дæр ис бинонтæ, ис уын сывæллæттæ æмæ мах хъуамæ кусæм сæ рухс фидæны сæраппонд. Уæрæсейы æнусты дæргъы æрфидар фæтк, мах та фæстаг азты бирæ хæстытæ баййæфтам æмæ нæ нырма дæр хъæуы Паддзахадон автоинспекцийы куыст фæхуыздæр æмæ æрфидар кæнын», – банысан кодта Цхуырбаты Эльбрус.
Банысан кæнын хъæуы уый дæр, æмæ Паддзахадон автоинспекцийы бон у профессионалон бæрæгбон æмæ йæ нысан кæнынц куыд Уæрæсейы Федерацийы, афтæ Хуссар Ирыстоны дæр 3 июлы.
Историон бæрæггæнæн: ССР Цæдисы Мидхъуыддæгты министрады Паддзахадон автоинспекци арæзт æрцыд 1936 азы 3 июлы. Уыцы аз Адæмон къамисарты советы уынаффæмæ гæсгæ фидар æрцыд «ССР Цæдисы Мидхъуыддæгты адæмон къамисариаты кусæгон-зæхкусæгон милицийы сæйраг управленийы Паддзахадон автоинспекцийы тыххæй уагæвæрд». 1998 азæй Паддзахадон автоинспекци ссис Уæрæсейы Федерацийы Мидхъуыддæгты министрады Фæндæгтыл цæуыны æдасдзинады паддзахадон инспекци. 2002 азы 2 июлы ведомство райста йæ дыккаг официалон историон ном – Паддзахадон автоинспекци. 2009 азы 3 июлы Уæрæсейы Федерацийы Мидхъуыддæгты министр, армийы инæлар Рашид Нургалиев йæ къух æрфыста «Уæрæсейы Федерацийы Мидхъуыддæгты министрады Фæндæгтыл цæуыны æдасдзинады паддзахадон инспекцийы бон снысан кæныны тыххæй» УФ Мидхъуыддæгты министрады барамындыл.
Comments are closed, but trackbacks and pingbacks are open.