Адӕймаг цы куыст ӕмӕ хъуыддаг фӕуарзы, йӕ зӕрдӕмӕ ӕввахс кӕй ӕрбайсы, удӕнцой кӕмӕй фӕисы, уый дӕсныйадыл нымад цӕуы. Ӕвӕдза, диссаг куыднӕ у, кæсагахсæг сӕумӕрайсомӕй суанг изӕрдалынгтӕм йӕ рӕстӕг фервиты доны былыл, иутӕ та, ӕгӕрыстӕмӕй, ӕхсӕв дӕр сбон кӕнынц. Афтӕмӕй уарзгæйæ ӕххӕст кӕнынц сæ куыст, фыдӕбон кӕнынӕй удӕнцой чи исы, уыцы кӕсагахсджытӕ. Зӕгъын хъӕуы, уыцы дӕсныйад кӕнӕ куыстмӕ адӕймаджы кар ницы бар дары, иугӕр уыцы архайд цӕуы йӕ зӕр-дӕмӕ, уӕд йе ‘ххӕст кӕнынмӕ нӕ зивӕг кӕнынц нӕдӕр бынтон ӕвзӕнгтӕ, ӕмӕ нӕдӕр кардзыд адӕймӕгтӕ. Иудзырдӕй, кӕсагахсӕг у уды хъӕздыгады бӕрӕгбон. Уый нысан цӕуы Уӕрӕсейы 1980 азӕй фӕстӕмӕ. Зӕгъын хъӕуы уый, ӕмӕ ацы бӕрӕгбон раздӕр азты нымад цыд кӕсаджы сӕудӕджерады кусджыты бӕрӕгбоныл ӕмӕ йӕ равзӕрдмӕ гӕсгӕ йӕ сӕйраг нысан кӕсагахсӕджы размӕцыд. Фӕлӕ уӕддӕр ӕмӕ уӕддӕр бӕрӕгбон рапарахат, кӕсаг чи ахсы, уыдоны ‘хсӕн ӕмӕ йыл сӕмбӕлынц зӕрдӕйы хорз ӕнкъарӕнтимӕ. Кæд раздӕры азты кӕсагахсджыты сӕйраг нысан ӕмӕ бӕллиц уыд хӕлцӕн дзы спайда кӕнын, уӕд абоны бон та сæ нысан у рӕстӕг зӕрдӕйы фӕндиаг арвитын, кӕрӕдзийы фӕлтӕрддзинадӕй спайда кӕнын, ӕндӕртимӕ хӕларадон ахастытӕ райтынг кӕнын ӕмӕ ма, чизоны, йӕхирдыгонау нымад цӕуы спорты хуызыл дӕр. Ацы хъуыддаг чи уарзы, ӕнувыд ыл чи у, уый йӕ куыст нӕ уадзы нӕдӕр зымӕджы карз бонты, нӕдӕр сӕрдыгон тӕвд рӕстӕджы. Куыд ӕндӕр куыст ӕмӕ дæсныйæдтæ, афтӕ дӕсны кӕсагахсӕг, йӕ куыст бирӕ чи уарзы, ахӕм адӕймагмӕ вӕййы бирӕ фӕлтӕрддзинад, фæзоны бирæ фӕзилӕнтӕ ӕмӕ йын уыдон дӕттынц ӕнтысты фадат. Цӕвиттон, иуӕй-иутӕ афтӕ хъуыды кӕнынц, ома, кӕсаг ӕрбасайынӕн ис ӕрмӕстдӕр иухуызон фӕрӕзтӕ ӕмӕ амӕлттӕ, фӕлӕ уый афтӕ нӕу. Цӕвиттон, карп донӕй кӕсагахсӕгмӕ ӕрбаввахс кӕнынӕн ис иу фӕрӕз, окуны та ӕрбасайдзынӕ ӕндӕрӕй. Стӕй, кӕсагахсджытӕ куыд зӕгъынц, афтӕмӕй райсом ӕмӕ изӕрыгон сахатты кӕсаг хуыздӕр ӕмӕ ӕнцон-дӕрӕй цӕуы ӕнгуырмӕ. Стӕйдӕр доны былтыл адӕймаг куы фӕцӕйцӕуы, уӕд ын хъусы йӕ къӕхты хъӕр, уымӕ гӕсгӕ нӕ хъӕуы сы-быртт кӕнын. Ноджы ма нӕ уарзы музыкӕ дӕр.
Нӕ республикӕйы дӕр бирӕ ис, кӕсаг ахсын бирӕ чи уарзы, йӕ уарзон дӕсныйадыл ӕй чи нымайы, ахӕм адӕймӕгтӕ. Уыдон никуы базивӕг кӕнынц цад кӕнӕ цӕугӕдоны былтӕм ацӕуынмӕ, ӕррӕвдз кӕнынц сӕ кусӕнгӕрзтӕ ӕмӕ ӕрлӕууынц сӕ куысты уӕлхъус. Ахӕмты нымӕцмӕ хауы нӕ горӕты цӕрӕг Абрамян Вреж дӕр. Кӕсаг ахсынӕй ӕхцондзинад кӕй исы, уый бӕрӕг уыд, ӕрӕджы Цхинвалы районы Къостайыхъӕуы цады былыл йӕ бинойнаг ӕмӕ йӕ чысыл сабиимӕ кæсагахсгæйæ сӕхи куы ирхӕфстой, уæд дӕр. Врежы куы афарстон, дӕ дӕсныйад дӕ зӕрдӕмӕ куыд цӕуы, зӕгъгӕ, уымӕй, уӕд мидбылхудгӕйӕ загъта, зӕрдӕйы фӕндиаг кæй нæ улæфы, доны был куынӕ ӕрлӕууа ӕмӕ кӕсагдзуаны йӕхи куынӕ аирхӕфса, уӕд. Ахӕм ӕмбӕстӕгтӕ дзӕвгар ис куыд горӕты, афтӕ хъӕуы дӕр. Фӕлӕ ма вæййы, не ‘рдзӕн знагиуӕг чи кӕны, ӕрмӕстдӕр йӕхи пайдайыл чи хъуыды кӕны, ахӕмтӕ дӕр. Уыдон хонынц браконьертӕ ӕмӕ нӕ ауӕрдынц кӕсӕгтӕ цӕгъдыныл, доны алыгъуызон хъӕстӕ ауадзынӕй куынӕг кӕнынц ӕваст бирӕ кӕсӕгтӕ, ӕндӕртӕ та сӕ электрон тыхæй марынц. Уый стыр фыдракӕнд у, не ‘рдзыл фыдаудӕн ми ӕмӕ йыл хъӕуы къух сисын. Ӕнӕуый та æцæг кӕсагахсджыты бӕрӕгбон у ӕмӕ йыл кӕддӕриддӕр ӕмбӕлӕнт хорз зӕрдӕйы уаг ӕмӕ дзаджджын хуынтимӕ.
Хуыбиаты Никъала
Comments are closed, but trackbacks and pingbacks are open.