УАРЗИАТЫ Алексей: цæттæ стæм нæ паддзахады суверенитет  бахъахъхъæнынмæ

Хуссар Ирыстоны Дзыллон-информацийы фæрæзтæн  интервью радта РХИ-йы Æддагон развæдсгæрсты службæйы сæргълæууæг Уарзиаты Алексей.

– Ӕддагон развæдсгæрсты службæйыл  æххæст кæны 20 азы. Ведомствойы райрæзт цахæм этаптыл радихгæнæн ис? Куыд æмæ цæй фæрцы хуыздæр кодта ведомство?

–  Махæн нæ Службæ нырма æвзонг у, æдæппæтæй йыл 20 азы цæуы, фæлæ хъæбатырæй рацыдис  хæстон фæндæгтыл, нырыккон дунейы зын уавæрты развæдсгæрсты райста уникалон фæлтæрддзинад æмæ ныртæккæ нæ республикæйы коллективон æдасдзинады хуыздæр структурæтæй иуыл нымад уымæн у.  Бирæ хатт-иу рагацау лæвæрд информацийы фæрцы Хуссар Ирыстоны разамынад бæстæйы хъахъхъæнынад фидаргæнæг уынаффæтæ рæстæгыл райста æмæ афтæмæй æнтыстджынæй ныхкъуырд лæвæрдтам агрессорæн.

Афтæ уыдис куыд  2004 азы хæстон кампанийы рæстæджы, афтæ  2008 азы дæр.  РХИ-йы ӔРС-ы кусджытæ  знаджы фæндтæ æмæ пълæнттæ базонынæн оперативон информаци исгæйæ, специалон мадзæлтты активонæй архайгæйæ, гуырдзиаг агрессийы ныхмæ лæугæйæ,  хæстон фæндæгтыл уыцы рæстæджыты «бахсыстысты». Бирæтæн дзы радтой паддзахадон хорзæхтæ, цалдæрæн та РХИ-йы уæлдæр паддзахадон хорзæх – «Уацамонгæ»-йы орден.

2017 азæй ранымайгæйæ, реорганизацийы фæлгæтты арæзт æрцыдысты цалдæр структурон дæлхайы, ногæй æркастыстæм æмæ ивындзинæдтæ бахастам Службæйы архайды регламентмæ æмæ уыцы ногдзинæдты фæрцы оперативон-развæдсгарæн архайд фæгъæдджындæр ис.

Ӕмбæлон уыдзæн бафиппайын, Службæйæн кæй ис йæхи геральдикæ, символикæ, гимн, мидведомствойон хорзæхтæ, афтæ ма йын ис йæхи сайт дæр.

– Ахæм цыбыр æмгъуыдмæ РХИ-йы ӔРС-æн бантыст бæрзондпрофессионалон развæдсгарджытæ бацæттæ кæнын? Цахæм у ӔРС-ы кусджыты оперативон-развæдсгарынады æмвæзад?

– РХИ-йы Ӕддагон развæдсгæрсты службæйы куыд ветеранты ‘хсæн, афтæ архайæг кусджыты ‘хсæн дæр ис бæрзонд-профессионалон развæдсгарджытæ. Куыд зонут, афтæмæй, сусæгдзинады режимæн ис йæхи нормæтæ æмæ фæтк, фæлæ мæ уырны, йæ рæстæджы, ома, банысангонд режим куы фæуа, уæд бæрæг азты фæстæ, иуæй-иу кусджыты архайды тыххæй информаци нæ бæстæйæн раргом уыдзæн. Оперативон развæдсгæрсты кусджыты æмвæзадæн та аргъгæнæн  ис æрмæстдæр сæ архайды хатдзæгтæм гæсгæ, кæцыты раргом кæныны бар нын нæй, фæлæ республикæйы разамынад уыцы архайдæн кæны æмбæлон аргъ.

– НАТО-йы паддзахадтæ АИШ-ы æмæ коллективон Ныгуылæны сæргълæудæй хихъахъхъæнынады æфсон æрвылаз милитаризацион æгъдауæй хъомысджын кæнынц Гуырдзыстоны. Дæ хъуыдымæ гæсгæ, уыцы фактор Хуссар Ирыстонæн потенциалон тæссагдзинад æвзарын кæндзæн?

– Куыд зонæм, афтæмæй хæдбар Хуссар Ирыстоны æмæ Абхазы республикæты йе скондмæ раздахыны фæндтæ Гуырдзыстон нæ ныууагъта. Уымæн æвдисæн у, тыхæй ма  спайда кæныны тыххæй Бадзырдыл къух æрфыссыныл бынтон кæй нæ разы кæнынц, уый.

– Хæххон Карабахы цауты фæстæ, Гуырдзыйы æмæ йæ партнерты æхсæнад æмæ политикты бæрæггонд къордты ‘хсæн фæтынг сты «дыккаг фронт» байгом кæнынмæ сидтытæ. Исты тæссагдзинад ис ныртæккæ РХИ-йы цæрджытæн? Цавæр мадзæлттæй пайда кæнут алыхуызон провокацитæ ма бауадзыны сæраппонд?

– Куыд зонæм, афтæмæй, Украинæ æмæ Хæххон Карабахы цаутæ, Уæрæсе æмæ Ныгуылæны альянсы ‘хсæн бонæй-бонмæ тыхджындæргæнæг ныхмæлæуды фæстиуæгæн, Гуырдзыстоны территорийыл акти-вондæр кæнын райдыдтой Ирыстон æмæ  Уæрæсейы ныхмæ провокацитæ.

Официалон Тбилис ныртæккæ кæд сабырадон политикæйы хуызы йæхи æвдисы, йæ позици та кæд хъавгæхуыз у, кæд æй нæ фæнды УФ-имæ ахастыты конфронтацийы фæндаг равзарын, уæддæр гуырдзиаг æхсæнады мах уынæм реваншистон тыхты рæзт. Ныгуылæны бæстæтæ та йæ уыцы фарстайы разæнгард кæнынц…Уыимæ иумæ Вашингтон æмæ Брюссель Гуырдзыстоны разамынадыл æргом æлхъивынц, цæмæй Уæрæсейы ныхмæ Тбилисы  æркæной «дыккаг фронт» Хуссар Ирыстоны территорийыл  байгом кæныны уынаффæ райсынмæ.

АИШ æмæ йæ сателлиттæн ныфсдæттæг сты  Украинæйы фарс хæстон архайдтытæй æрæджы чи æрыздæхт, уыцы гуырдзиаг националистон æмæ неофашистон организацитæты уæнгтæ. Зæгъæм, æфсæддон иугонд «Гуырдзиаг националон легион» æмæ «Кавказаг легион» интернеты социалон хызæгты фæрцы æргомæй зæгъынц, Уæрæсеимæ сæ тохы радон этапы сæйраг мидис кæй уыдзæн Гуырдзыстоны территориалон æнæхъæндзинад сæндидзыны хъуыддаджы.

Фæлæ Гуырдзыстоны хицауад æмæ йе хсæнады рæстмæхъуыдыгæнæг хай ныртæккæ дызæрдыг кæнынц, хæстон архайдтыты фæрцы сын кæй нæ бантысдзæн Хуссар Ирыстон æмæ Абхазы «раздахын». Ацы контексты Ӕддагон развæдсгарæн службæ  æрвылбонон æгъдауæй уавæр мониторинг кæны æмбæлон структурæтæн рæстæгыл информаци дæттыны æмæ оперативон уынаффæтæ афоныл исыны сæраппонд.

 – Ацы аз Мæскуыйы æмбуар хæстыты Сабырады Кубокы дунеон ерысты фæлгæтты ды дыккаг хатт райстай хæдиргъæфы дунеон чемпионы титул.  Уæ ведомствойы æвзонг кусджыты дæр разæнгард кæныс спортивон æнтыстытæм?

– Ӕнæмæнг, æмæ канд æмгусджыты нæ… Кæй кой скодтай, уыцы Кубокы фæстæ æмбуар хæстыты Федераци, кæцыйæн æз дæн йæ президент, сорганизаци кодта æмæ ауагъта сæрмагонд æфсæддон операцийы фæмардуæвæг Бесаты Русланы номарæн æмæ Хуссар Ирыстоны хæдбардзинад Уæрæсейы Федерацийæ банымады боны цытæн турнир.

– Хуссар Ирыстоны ныхмæ арæзт гуырдзиаг спецслужбæты ахæм развæдсгарæн архайдтытæй исты фиксацигонд цæуы?

– Кæй зæгъын æй хъæуы. Вæййы ахæм архайдтытæ  æнæпилотон аппараттимæ дæр. Фæлæ гуырдзиаг специалон службæтæн сæ архайд раздæрау æнцой кæны сæ агентурæ æмæ æндæвдады агенттыл.

Бауырнæд уæ,  нæ Службæ хæларадон бæстæты спецслужбæтимæ иумæ лæмбынæг кæсæм æмæ æнæрынцойæ архайæм, цæмæй цас раздæр уыйбæрц хуыздæрæй райсæм Гуырдзыстоны пълæнттæ æмæ фæндты тыххæй информаци. Цыфæнды реалон тæссагдзинады хабар куыддæр базонæм, афтæ йæ оперативон фæткæй бахæццæ кæн-дзыстæм нæ паддзахады Бæрзонддæр Сæйрагкъамандæгæнæгмæ æмæ нæ алы æмбæстаджы æдасдзинад ифтонггæнæг мадзæлттæ ауадздзыстæм..

  – Фарон Хуссар Ирыстоны Ӕддагон развæдсгарæн службæйы оперативон къорд Донбассы самал кодта секретон докуметтæ. Ахæм мадзæлттæ ныртæккæ дæр уæ службæ уадзы Сæрмагонд Ӕфсæддон операцийы зонæйы?

– Мариуполæй секретон документтæ раласыны фæдыл операци у РХИ-йы ӔРС-ы æмæ хæларадон паддзахадты спецслужбæты æмгуыстады хатдзæг. Уыцы æмгуыстады фæдыл нын ис семæ бадзырдтæ æмæ сæ сæйраг мидис у кæрæдзийæн практикон æмæ теоретикон æгъдауæй,  фæлтæрддзинад æмæ информацийæ æххуыс кæныны æнæмæнгдзинад æмæ афтæ дарддæр.

Нæхи ресурстæй пайда кæнгæйæ Службæ эффективонæй æххæст кæны йæ функцитæ, рæстæгыл исы ныхмæлæууæджы пълæнтты тыххæй бæлвырд зонинæгтæ. Уыцы куыст цæуы куыд нæхи гуырæнты, афтæ ма хæларадон бæстæты профилон структурæтимæ æнтыстджын æмгуыстады фæрцы æмæ йын ис æвæрццæг хатдзæгтæ нæ паддзахадты æдасдзинад бахъхъæныны хъуыддаджы.

Мариуполæй секретон документтимæ баст эпизод, кæй зæгъын æй хъæуы, нысаниуæгджын у, фæлæ уый у сæрмагонд æфсæддон операцийы цы куыст кæнæм, уымæн йæ иу хай.

Банысан кæнын мæ фæнды, Украинæйы сæрмагонд æфсæддон операци куы райдыдта, уæдæй фæстæмæ ӔРС-ы кусджытæ уæрæсейаг коллегæтæн активонæй рæстæгыл кæй бадæттынц Украинæйы æфсæддон тыхты хæстон инфраструктурæйы нысаниуæг объектты равæрды æмæ æфсæддонты бынæтты фæдыл информаци.

– Куыд дæм кæсы, кардиналон æгъдауæй цас фæивтой спецлужбæтæн цымыдисаг чи у, ахæм информацийæн йе ссарыны æмæ фехъусын кæныны фæрæзтæ æмткæй æмæ номхыгъдæй та Хуссар Ирыстоны Ӕддагон развæдсгарæн службæйы куыст? 

– Кæй зæгъын æй хъæуы, нырыккон развæдсгарæг классикон методтимæ иумæ хъуамæ арæхса хъæуæг профессионалон техникон фæрæзтæй пайда кæнынмæ дæр.

Ныртæккæ ӔРС-ы куыст схызт ноггъæдон æмвæзадмæ. Информаци исыны æмæ йæ иртасыны хъуыддаджы фæбæрзонддæр ис кусджыты профессионализм  æмæ уый фæрцы фæхуыздæр ис оперативон-развæдсгарæн архайд.  Мæ размæ чи куыста Хуссар Ирыстоны Ӕддагон развæдсгарæн службæйы, уыдон стыр хайбавæрд бахастой нæ ведомство æрфидар кæныны хъуыддагмæ. Фæлæ цард размæ цæуы æмæ развæдсгарджыты алы ног фæлтæры куысты фæрæзтæ хуыздæрæй-хуыздæр кæндзысты.

– Нæ хъуыдымæ гæсгæ, Хуссар Ирыстоны æдасдзинад максималон æгъдауæй сифтонг кæнынæн хъæуы æппæт службæты æмархайд. Цы зæгъдзынæ ацы фарстайы фæдыл?        

– Эффективон оперативон архайды æппæт республикон тыхон структурæтæ æмæ специалон службæты консолидаци паддзахады æдасдзинад бахъахъæнынæн æнæмæнг хъуыддаг у. Не ‘хсæн ис æмбæлон бадзырдтæ æмæ уыдоны фæлгæтты цæуынц нæ кусæгон фембæлдтытæ æмæ консультацитæ, кæрæдзийæн дæттæм информаци, бæрæг уæлвæткон уавæрты рæстæджы куыст цæуы архайды синхронизацийы фæдыл, афтæ ма координаци æмæ æмархайды уагъд цæуынц æндæр мадзæлттæ дæр.

  – ӔРС-ы кæй фæнды службæ кæнын, уыдонмæ цавæр домæнтæ ис? Цахæм сты нырыккон развæдсгарджытæ? Исты ивындзинæдтæ æрцыдис сæ куысты æви развæдсгарæджы архайды хицæндзинæдтæ æнусæй-æнусмæ уыцы иухуызонæй баззадысты?

– Развæдсгарæг уæвын кæй фæнды, уый хъуамæ  уа Фыдыбæстæйыл иузæрдион,  æнкъара бæрндзинад, уа фидар удыхъæды хицау, йæ разылæууæг хæслæвæрдтæм ын уа сфæлдыстадон ахаст, уа йын тынг хорз хъуыдыкæнынад, уа йын аналитикон зондахаст, вазыгджын уавæрты йæ бон хъуамæ уа раст уынаффæтæ исын,  хъуамæ размæ кæна раст инициативæтæ, хъуамæ зона фæсарæйнаг æвзæгтæ,  уа коммуникабелон, принципиалон, хæрзæгъдау, къухдариуæгад æмæ йæ коллегæтæм ахасты хъуамæ уа рæстдзинадыл хæст.

Банысан кæнын мæ фæнды, ацы фарстайæн лæмбынæг дзуапп ссарæн кæй ис ӔРС-ы сайты:  http://svr-alania.ru. Алкæй бон дæр у уым бакæсын, развæдсгæрсты службæмæ кандидаттæм цы критеритæ æмæ домæнтæ ис, уыдоны тыххæй.

Абсолютон æгъдауæй разы дæн Маркус Вольфимæ. Иууыл раззагондæр фæрæзтæй æмæ развæдсгæрсты архайды  мадзæлттæй  спайдагæнгæйæ, зонады алы фадгуыты  кæцытæ бындуриуæг кæнынц зонад æмæ техникæйы æнтыстытыл,  уæддæр развæдсгæрсты сæйраг у адæймагон фактор. Технологиты руаджы фадат ис информаци ссарын æмæ йыл бакусыны фадæттæ рауæрæх кæнынæн, фæлæ уæддæр адæймаджы  интеллектон зонындзинæдтæ æмæ адæймагон факторы уæвынад,  информаци райсынæй йæ реализацийы онг кæддæриддæр уыдзæн, саргъгæнæн æмæ баивæн кæмæн нæй, оперативон куысты ахæм эффективон уавæр.

Фæдысгарæг суæвын алкæй бон нæу. Уымæй дæр ныры рæстæджы. Алы æвзонг адæймагæн йæ бон нæ бауыдзæн Фæдысгæрсты службæйы домæнтæ æмæ критеритæн дзуапп раттын.

– Куыд Фæдысгарæн службæйы сæргълæууæг, афтæ бæрндзинад æнкъарыс республикæйы æдасдзинад сифтонг кæныны тыххæй?

– Кæй зæгъын æй хъæуы, æнкъарын. Кæцыфæнды разамонæг дæр бæрндзинад æнкъары, уымæй дæр Республикæ Хуссар Ирыстоны  Æддагон развæдсгæрсты  службæйы сæргълæууæг. Ацы бынаты кусгæйæ, уæлдайдæр та ацы вазыгджын рæстæджы, стыр бæрндзинадимæ æххæст кæнын мæ бæрны уæвæг хæстæ.

– Уæ Службæйы юбилейы хæдразмæ  дæ коллегæтæн дæ цæст цы бауарздзæн?

– Бузныг зæгъын мæ фæнды ведомствойы службæгæнджытæ æмæ ветерантæн, се ‘нтыстджын куысты, нæ бæстæйы æдасдзинады тыххæй се стыр хайбавæрды тыххæй. Уыдон стыр цыты аккаг сты. Мæ зæрдæ сын зæгъы фидар æнæниздзинад, сабырдзинад, сæ куысты æмæ хисæрмагонд царды – æнтыстытæ.

Службæйы æппæт кусджыты номæй бузныг зæгъын Сæйраг къамандæгæнæгæн йе ‘ууæнчы тыххæй.

Мах не ‘ппæт дæр æмбарæм, нæ бæстæйы æдасдзинады тыххæй ныл цы бæрндзинад ис, уый, æмæ цæттæ стæм  нæ паддзахады националон суверенитет æмæ æнæхъæндзинад бахъахъхъæнынмæ.