Æрхæццæ ахуыры азы кæрон. Æмæ кæд ахуыргæнæндæттæ æхгæд сты, уæддæр скъоладзауты æмæ студентты сæрды райдайæны равдисын хъæудзæн сæ зонындзинæдтæ, дæттын сæ бахъæудзæн фæлварæнтæ. Коронавирусы аххосæй ивындзинæдтæ хаст æрцыди æппæт ахуырады къабазы дæр.
Ахуыры аз, уæлдайдæр та йæ дыккаг хай, скъолатæн уыдис зынвадат. Карантин куы бакодтой, уæд нæ республикæйы Ахуырад æмæ зонады министрады амындмæ гæсгæ нæ бæстæйы скъоладзаутæ дæр ахуыр кодтой интернеты руаджы, ома, дистанцион æгъдауæй. Дистанцион ахуыр куыд нæ ахуыргæнджытæн, афтæ ахуыргæнинæгтæн дæр уыдис ногдзинад æмæ æвзæрын кодта зындзинæдтæ, уæлдайдæр, райдианы.
Хуссар Ирыстоны Тыбылты Алыксандры номыл паддзахадон университеты ректор Тедеты Вадим куыд фехъусын кодта, афтæмæй фыццæгæм июлæй райдаудзысты куырдиæттæ исын абитуриенттæй.
«Иннæ азтæм абаргæйæ, ацы аз бацæуæн фæлварæнтæ ницæмæй хицæн кæндзысты. Ра-уагъдонтæн фадат ис боны æмæ фæсаууонмæ хайадтæм 20 дæсныйадæй фылдæр равзарын. Иннæ азтæй уæлдай ма ацы аз баконд æрцыд ног факультет – театралон.
Нæхи университеты боны хайадмæ ахуырмæ чи цæуы, уыдонæн ис фадат равзарын ахæм факультеттæ: биологи æмæ хими, дунеон журналистикæ, фæсарæйнаг æвзæгтæ, истори, математикæ æмæ информатикæ, ирон æвзаг æмæ литературæ, уырыссаг æвзаг æмæ литературæ, педагогикæ æмæ райдиан ахуырады методикæ, психологи, сæудæджерадон æмæ æмбæстагон арæзтад, экономикæ æмæ юриспруденци.
Фæсаууонмæ хайады та ис равзарæн ахæм дæсныйæдтæ: биологи, скъолайы агъоммæ педа-гогикæ æмæ психологи, ирон æвзаг æмæ литературæ, физикон культурæ, педагогикæ æмæ рай-диан ахуырады методикæ.
Коммерцион бындурыл ахуыр кæндзысты паддзахадон муниципалон управленийы фæсау-уонмæ хайадтæ, финанстæ æмæ кредиттæ, истори, æхсæнадæмон ахастытæ, автомобилтæ æмæ автомобилон хæдзарад, сæудæджерадон æмæ æмбæстагон арæзтад, формаци, юриспруденци æмæ психологи. Равзаргæ дæсныйадмæ нæ кæс-гæйæ, абитуриенттæ иууылдæр хъуамæ радтой бахыгъд (зачет) ирон æвзагæй.
Нæ университеты коллектив кæддæриддæр фæсивæды хъомыл æмæ ахуыр кæныны хъуыддагыл куыстой зæрдиагæй. ХИПУ-йы ахуыр кæн-гæйæ, не студенттæ райсынц хъæуæг зонындзинæдтæ æмæ ахсджиаг дæсныйæдтæ, уыдон та сын тынг бабæззынц сæ фидæны царды. Университеты куыст афтæ арæзт у, æмæ дзы фæсивæдæн æрмæст зонындзинæдтæ нæ амонынц, фæлæ архайынц, цæмæй æрыгæттæн раргом уой сæ курдиæттæ», – загъта Тедеты Вадим.
Нæ абитуриенттæн ныллæууыдис сæ царды сæйраг фæндаг равзарыны афон. Уый афтæ æнцон дæр нæу. Бирæ цыдæртæ хъæуы арабар-бабар кæнын. Æмæ уый та канд нæ ацы азы рауагъдонтæм нæ хауы, фæлæ раздæры азты цыдæр аххосæгтæм гæсгæ дарддæры ахуыры фæндагыл чи нæ ныллæууыд, уыдонмæ дæр. Фадæттæ æмæ сын фæндæгтæ та – уæрæх. Уыдон фылдӕрбӕрцӕй æвзарынц математикæ æмæ информатикæйы факультеттæ. Популярон ма сты ахæм факультеттæ, куыд психологи, сæудæджерадон æмæ æмбæстагон арæзтад, юриспруденци, экономикæ æмæ физикон хъомылад. Æндæр факультеттæй хъауджыдæр историон-юридикон факультетмæ балæвæрдæуыд фылдæр куырдиæттæ.
Нæ университеты ректор Тедеты Вадимы архайды руаджы ХИПУ лæууы Уæрæсейы Федерацийы университетты æмвæзадыл, йæ дипломæн ис уыдон æмбæрц тых. Баконд дзы æрцыдысты, нæ фæсивæд раздæр Республикæйæн æддæмæ ахуыр кæнынмæ цы факультеттæм цыдысты, ахæмтæ. Фæуæрæхдæр сты ХИПУ-йы авналæнтæ, бирæ уæлдæр ахуыргæнæндæттимæ ныридæгæн æмгуыст кæны студентты хæрзиуæгæн.
Не студентты ‘хсæн ис цæгатирыстойнаг, абха-заг æмæ ма сирийы скъолаты рауагъдонтæ дæр.
Паддзахад æмæ университеты къухдариуæгад дæтты хорз фадæттæ, цæмæй абитуриенттæ райсой куыд теоретикон, афтæ практикон зонындзинæдтæ дæр æмæ сæ рауайа дæсны специалисттæ.
Уæдæ, табуафси, зынаргъ абитуриенттæ, æрбацæут æмæ радтут фæлварæнтæ нæ уарзон университетмæ, равзарут уæхицæн аккаг дæсныйад.
Дриаты Лейла
Comments are closed, but trackbacks and pingbacks are open.