Нæ республикæйы ахуырадон уагдæттæн аивгъуыйгæ аз уыдис уæлдай вазыгджындæр æмæ зындæр, æгас дунейы коронавирусы инфекци кæй апарахат ис, уый аххосæй. Ахæм уавæрты йæ куыст кодта Цхинвалы районы администрацийы ахуырады хайад дæр ахуыргæнинæгты æхсæн ахуыр-хъомыладон куыст дарддæр хуыздæр кæныны фæдыл. Афæдзы дæргъы хайады кусджытæ регулярон æгъдауæй цыдысты ахуырадон уагдæттæм, ахуыргæнджытæ æмæ хъомылгæнджытæн методикон æххуыс бакæныны тыххæй. Стыр хъусдард здæхт цыдис кусæгон программæтæ, тематикон плæнттæ аразынмæ, ахуыргæнæн æрмæджытæй ахуыргæнинæгты ифтонг кæнынмæ æмæ сын сæ зонындзинæдтæ бæрзонддæр кæнынмæ.
Районы ахуырады хайады сæргълæууæг Козаты Олег куыд зæгъы, афтæмæй архайынц фараст астæуккаг скъола, Къостайыхъæуы æмæ Дменисы хъæуы сывæллæтты цæхæрадæттæ æмæ иу аивадон скъола-студи. Скъолайы чи ахуыр кæнынц, уыдоны нымæц абоны бонмæ у 175 ахуыргæнинаджы.
Районы скъолатæ сæхи æмбæлон æмвæзадыл цæттæ кодтой, районон олимпиадæтæ цы предметтæй уагъд цыдысты, уыдонмæ. Фæлæ, зæгъын хъæуы уый æмæ бæрæг аххосæгтæм гæсгæ районы ахуыргæнинæгтæ хайад кæй нæ райстой республикон олимпиадæйы.
Районы ахуырадон уагдæтты ахуырады процессы нормалон цыдыл куыд ма загътам, афтæмæй бандæвта коронавирусы пандеми. Республикæйы иумиагахуырадон уагдæтты дæр бахъуыд ахуыры дистанцион формæмæ рахизын. Цхинвалы районы Къостайыхъæуы, Дменисы æмæ Сатихъары иумиагахуырадон скъолаты дистанцион ахуыр уагъд цыдис интернеты хызæджы руаджы. Ахуыргæнинæгтæй гаджеттæ æмæ финансон фадæттæ кæмæн нæ уыд, ахæм сывæллæттæ цы хъæууон скъолаты ахуыр кодтой, уыдонæн хæслæвæрдтæ цыдысты скъолаты директорты руаджы, конспекттæ сын арæзтой ахуыргæнджытæ.
Карантин рæстæгæй рæстæгмæ баконд кæй цыдис, уый хæлдта ахуыры процесс. Ивгъуыд аз февралы мæйы ахуырады хайады методисттæ цыдысты скъолатæм æмæ ахуыргæнинæгты цæттæ кодтой районон олимпиадæтæм. Сæрмагонд хъусдард здæхт цыдис ахуыргæнджыты зонындзинæдтæ бæрзонддæр кæнынмæ. Ахуыргæнджытæн сæ фылдæр хай рацыдысты квалификаци бæрзонддæргæнæн курсытæ, кæцыты сорганизаци кодта ахуырады кусджыты квалификаци бæрзонддæргæнæн институт, 30 ахуыргæнæджы та рацыдысты радон операци.
Козаты Олег куыд банысан кодта, афтæмæй, барадхъахъхъæнæг органтимæ куыст цыдис æнахъомты æхсæн бархалынадтæ ма æруадзыны фæдыл, систематикон æгъдауæй уыдон цыдысты скъолатæм æмæ уагътой хъомыладон мадзæлттæ, æргом кодтой скъолайон дисциплинæ чи хæлдта, ахæм ахуыргæнинæгты. Куыст цыдис зынхъомылгæнæн сывæллæтты ныййарджытимæ дæр. Ахуырады хайады кусджытæ стыр хъусдард здæхтой къласæн æмæ скъолайæн æддейæ хъомыладон куыстмæ. Уый уагъд цыдис сфидаргонд планон къæлиндармæ гæсгæ. Скъолайы кусæг организатортæ æмæ кълæсты къухдариуæггæнджыты хъомыладон куыстыты плæнттæм хаст цыдысты ивындзинæдтæ. Районы скъолаты ахуыргæнинæгтæ хайад истой республикон æмвæзадыл уагъдцæуæг мадзæлтты. Ахуыры азы кæрон – июны мæйы та ауагъд æрцыд сæрмагонд мадзал скъолаты рауагъдонтæн.
Хайады сæйраг специалисттæ куыстой ахуырадон-педагогон проблемæтæ раргом кæныны фæдыл. Ауагътой хъæуæг консултацитæ æмæ кодтой практикон æххуыс сæ аиуварс кæныны тыххæй. Ахуырадон процессæн разамынд кæныны æмæ ахуырадон программæтæ реализаци кæныны рæстæджы сæвзæргæ ахуырадон-педагогон прблемæтæ скъуыддзаг кæныны фарстаты фæдыл индивидуалон консультацитæ уагъд цыдысты скъолаты къухдариуæггæнджытимæ. Бæрæг кодтой экстернатæн ахуыргæнинæгты кон-тингент, ифтонг кодтой хъæуæг документтæ аразын. Уагъд цыдысты организацион мадзæлттæ, скъолаты къухдариуæггæнджытæ æмæ ахуыргæнджытæн хъæуæг методикон æххуыс цыдис, цæмæй районы скъолаты æмбæлон æмвæзадыл бацæттæ кодтаиккой æмæ ауагътаиккой хатдзæгон аттестаци æмæ æнтысгæйæ фæуыдаид ахуыры аз. Скъолаты сифтонг кодтой фæлварæнтæ ауадзыны тыххæй хъæуæг æрмæджытæй.
Бæрæг куыст бачындæуыд ахуыры азы организацион æгъдауæй райдайыны фæдыл æмæ ахуырадон уагдæтты ахуыр-хъомыладон процесс организаци кæныны фæдыл, афтæ ма скъолаты къухдариуæггæнджыты æмæ ахуырады хайады ‘рдыгæй ахуырадон процессæн разамынд æмæ контроль кæныны фæдыл дæр. Ифтонг кодтой ахуырадон-педагогон документаци – скъолайы куысты афæдзон план, ахуыргæнджыты тематикон æмæ куысты плæнттæ, кусджыты куысты инструкцитæ, мидскъолайон куысты план æмæ æндæр ахæмтæ аразын.
Зæрдæрухсгæнæн æнтыстытæ ис Къостайыхъæуы астæук-каг скъолайы цур нывгæнæн скъола-студийæн, кæцыйæн йæ къухдариуæггæнæг у РХИ-йы адæмон нывгæнæг Гæбæраты Барис. Студийы ахуыргæнинæгтæ активон хайадисджытæ вæййынц куыд республикæйы, афтæ уымæн æддейæ дæр организаци чи æрцæуынц, уыцы равдыстытæ, бирæ хæттыты свæййынц хорзæхты аккаг. Дменисы хъæуы сывæллæтты цæхæрадоны хъомылгæнинæгтæ та сывæллæтты куыстыты республикон конкурсы фæстиуджытæм гæсгæ хорзæхджын æрцыдысты дыккаг къæпхæны орденæй.
Ивгъуыд аз районы æхгæд æрцыди Дампъалеты астæуккаг скъола, ахуыргæнинæгты контингент дзы кæй нæ уыд, уый аххосæй.
Районы ахуырады хайады сæргълæууæг куыд зæгъы, афтæмæй сæ куысты ис цухдзинæдтæ дæр, кæцытæ аиуварс кæныныл кусын хъæуы куыд скъолаты къухдариуæггæнджыты, афтæ ахуырады хайады кусджыты дæр. Районы скъолаты нæй химион кабинеттæ, нæй реактивтæ химион фæлтæрæнтæ ауадзынæн. Нæй сæм цæстуынгæ æрмæджытæ ирон, уырыссаг æмæ англисаг æвзæгты фæдыл. Спортивон зал ис æрмæстдæр Къостайыхъæуы астæуккаг скъолайы, иннæ ахуырадон уагдæтты та не сты, кæнæ дзуапп нæ дæттынц нырыккон домæнтæн. Æрвылаз дæр ахуыргæнинæгты контингент къаддæр кæны, æмæ ацы тенденци афтæ куы аххæсса, уæд скъолаты бæрц зынгæ фæкъаддæр уыдзæн. Ахуыргæнджытæ хъуамæ хуыздæр кæной сæ куыст, уадзой уæлæмхас ахуыртæ. Æмæ уавæр рараст кæныны фæдыл та йæ куыст хъуамæ фæхуыздæр кæна методкабинет. Стыр куыст бакæнын хъæуы, республикæйы Ахуырад æмæ зонады министрады ахуырады къабазыл контроль кæнын æмæ хъусдарды управлени цы цухдзинæдтæ раргом кодта, уыдоны фæдыл, цæмæй къухты бафта ахуырады гъæд фæбæрзонддæр кæнын.
БЕСТАУТЫ Валя
Comments are closed, but trackbacks and pingbacks are open.