Хуссар Ирыстоны Æддагон развæдсгæрсты службæ банысан кодта ведомствойы сарæзтыл 20 азы сæххæсты бон. Бæрæгбоны цытæн Хуссарирыстойнаг паддзахадон университеты уыдис цытджын æмбырд.
Развæдсгæрсты кусджытæн раарфæ кæнынмæ æрбацыдысты республикæйы къухдариуæгад Президент Гаглойты Аланы сæргълæудæй, Хуссар Ирыстоны экс-сæргълæууæг Тыбылты Леонид, премьер-министр Джуссойты Константин, Уæрæсейы æмæ Хуссар Ирыстоны минæварады минæвæрттæ æмæ æндæртæ.
Хуссар Ирыстоны Æддагон развæдсгæрсты службæйы сæргълæууæг Уарзиаты Алексей радзырдта службæйы æндидзынады истори, райсгæ фæстиуджытæ æмæ нырыккон этапы æвæрд хæсты тыххæй.
«Кæй зæгъын æй хъæуы, махæн ис, цæмæ тырнæм, уый. Мах уынæм развæдсгарæн архайды ног горизонттæ æмæ здæхтытæ. Хуссар Ирыстоны Æддагон развæдсгæрсты службæйæн йæ бон ссис ног геополитикон реалиты, ног тæссагдзинæдты уавæрты кусын. Йæ юбилеймæ бацыд паддзахадон структурæйы хуызы, æмæ ныртæккæ йæ бон у цыфæнды уавæрты дæр æнтыстджынæй скъуыддзаг кæнын разылæууæг хæстæ», – банысан кодта уый.
Æддагон развæдсгæрсты службæйы сæргълæууæг бузныг загъта Президентæн йæ хъусдард æмæ æххуысы тыххæй.
«Уырны мæ, Службæйы сæрмагонд сконд кадимæ кæй хæссы æддагон развæдсгæрсты кусæджы ном, Республикæ Хуссар Ирыстоны фæрныгадæн бæстæйы къухдариуæгады раз цæсгомджынæй службæ кæнгæйæ», – загъта Уарзиайы фырт.
Гаглойты Алан банысан кодта, зæгъгæ, Æддагон развæдсгæрсты службæйы тыхтæ здæхт сты РХИ-йы æддагон интерестæ хъахъхъæнынмæ æмæ паддзахады хъахъхъæнынадон хъомысад фидар кæнынмæ.
«Ард бахæрдыл æнувыд, Æддагон развæдсгæрсты службæйы кусджытæ Райгуырæн зæххы раз æххæст кæнынц сæ хæс. Æддагон тæссагдзинæдтæ развæлгъау сбæлвырд æмæ иуварс кæнынц. Иуварс кæнынц экстремистон архайдтытæ æмæ стыр хайбавæрд хæссынц Хуссар Ирыстоны паддзахадон æдасдзинад ифтонг кæныны хъуыддагмæ. Æддагон тæссагдзинæдтæй нæ бæстæ хъахъхъæнгæйæ, развæдсгæрсты хуссарирыстойнаг кусджытæ æхсæв æмæ бон дæр хъахъхъæнынц национ интерестæ», – загъта Президент.
Уый зæрдыл æрлæууын кодта, 2008 азы гуырдзиаг агресси иуварс кæныны рæстæджы РХИ-йы Æддагон развæдсгæрсты службæйы кусджытæ активон хайад кæй истой хæстон архайдтыты.
«Уæлдай бузныджы ныхæстæ мæ фæнды зæгъын ветерантæн. Уыдон цæвиттойнаг сты æвзонг фæлтæрæн, æмæ мæ уе ‘ппæтæн дæр, фæнды раарфæ кæнын уе ‘нувыд службæйы тыххæй», – загъта Президент.
Бæрæгбоны цытæн Гаглойты Алан ведомствойы кусджытæн радта паддзахадон хорзæхтæ æмæ бузныджы фыстæджытæ.
Арфæйы раныхасы Æдасдзинады паддзахадон комитеты сæрдар Олег Ширан, загъта:
«Сæвзæргæ уавæры Хуссар Ирыстоны специалон службæ-тæй домдæуы уæлдæр профессионализм, хæсмæ æнувыддзинад, эффективон æмæ оперативон куыст. Уырны мæ, æппæт ацы миниуджытæй хайджын кæй сты æддагон развæдсгæрсты службæйы æцæг профессионалтæ», – загъта Ширан.
Уый банысан кодта, Æдасдзинады паддзахадон службæ æмæ Æддагон развæдсгæрсты службæйы кусджытæн кæй ис æхсæнведомствæйон æмархайды ахсджиаг потенциал, кæцы, æнæмæнгæй, хъæуы рæзын кæнын Хуссар Ирыстоны æмæ Уæрæсейы Федерацийы æдасдзинады æддагон тæссагдзинæдтæ нейтрализаци кæныны нысанæн.
Афтæ ма цытджын æмбырды бакастысты Хуссар Ирыстоны Уæрæсейы Уæлвæткон æмæ æххæстбарджын минæвар Марат Кулахметов, Уæрæсейы Æдас-дзинады федералон службæйы директор Александр Бортниковы номæй арфæйы фыстæджытæ.
Церемонийы кæронбæттæны Хуссар Ирыстоны сгуыхт артист Тасойты Игорь азарыд «Офицеры».
