Цæрæнуат чи хъуамæ райса, уыдонæй уал сбæрæг фынддæс бинонтæ

Горæт Цхинвалы администрацийы пресс-службæ куыд фехъусын кодта, афтæмæй цæрæнуатон къамис æркаст радылæууæг бинонты уавæр сбæрæг кæныны фарстатæм, цæрæнуат сфидар кæнын, иуæй-иу уынгты нæмттæ фæивын, æмæ Советон развæдсгарæг Лохты Владимирæн бюст сæвæрыны тыххæй фарстытæм. «Уынаффæ райст æрцыд 15 бинонтæн цæрæнуат рахицæн кæныны тыххæй. Дарддæр цæрæнуатон къамисы уæнгтæ æркæсдзысты, рады чи лæууы, уыдоны куырдиæттæм. Хатт бирæ рæстæг бахъæуы, цæмæй бæлвырд æрцæуа бинонты уавæр. Куырдиæттæ чи бадæттынц къамисмæ, уыдоны ‘хсæн разыны ахæмтæ дæр, кæцытæ ис хæдзæрттæ. Æмæ цæрæнуатæй хъуаг чи у, уыдон та рады фæстæмæ ахауынц. Уымæ гæсгæ къамисы уæнгтæ бынаты лæмбынæг бæрæг кæнынц куырдиаты хицауы цæрæнуатон уавæртæ. Уый фæстæ ист æрцæуы æмбæлон уынаффæ. Бирæтæ разы нæ вæййынц, уымæн æмæ сæ цæрæн хæдзæрттæ сæхиуыл фыст нæ вæййынц, кæмæн та, хъæуты æмæ ма республикæйæн æддейæ дæр, сбæрæг вæййы цæрæнуат. Ис афтæ хъуыдыгæнджытæ, ома, къамис сабыргай кусы, фæлæ алы бинонты тыххæй дæр æрæмбырд кæнын хъæуы исады фæдыл æмбæлон информаци», – зæгъынц администрацийы пресс-службæйы.

Коллегийы радон рабадт та уыдзæн 3-æм ноябры. Уым дæр æркæсдзысты, цæрæнуатон уавæртæ фæхуыздæр кæнын цы бинонтæм æмбæлы, уыдонмæ. Иумиаг номхыгъды уæвын нæ нысан кæны радылæууæг цæрæнуат æнæмæнг кæй райсдзæн. Фатертæ дих цæудзысты æргомæй. Уымæй дарддæр ма цæрæнуатон къамис æнхъæлмæ кæсдзæн цæрджытæй информаци райсынмæ, цæрæнуат райсынмæ рады чи лæууы, уыдон тыххæй. Гæнæн ис, æмæ исчи бамбæхса, цавæрдæр æнæзмæлгæ исад ын кæй ис, уый. Ахæмты тыххæй информаци барвитын хъæуы горæт Цхинвалы администрацийы официалон фарсмæ. Анонимондзинады гаранти хъахъхъæд цæудзæн.

Фатерты хицæуттæ чи баисты, уыдонмæ та тагъд фæдзурдзысты администрацимæ, цæмæй сисой хæлттæ. Инвалидтæ цы бинонты ис, уыдонæн фадат уыдзæн фыццаг уæладзыджы фатер равзарынæн.

Уазæгты Марфа