Стыр Фыдыбæстæйон хæсты Уæлахизы боны цытæн Цхинвалы уагъд æрцыд турнир уæгъдибар хъæбысхæстæй. Уый æрвылаз дæр фæуадзы Цхинвалы администраци. Ерыстæ уагъд æрцыдысты республикон комплексон спортивон скъолайы. Хайад сæ райстой куыд республикæйы тыхджындæр æвзонг богалтæ, афтæ ма майдантыл тох кодтой Цæгат Ирыстоны минæвæрттæ дæр. Сæрмагондæй турниры хайад райсыны тыххæй Хуссар Ирыстонмæ æрцыдысты Хъæрæсе-Черкессийæ дæр. Ацы республикæйы спортивон кад хъахъхъæдтой горæт Черкесскы хъæбысхæсты скъолайы хъомылгæнинæгтæ. Сæ тренертæ Рустам Шевхужев æмæ Уырысты Марат куыд зæгъынц, афтæмæй Хуссар Ирыстоны сæ зæрдæмæ тынг фæцыд æмæ зæгъ нæ алы мæй дæр куы хоной, уæддæр, зæгъ, стыр æхсызгонимæ цæудзыстæм ардæм.
Хъæрæсе-Черкесийы спортивон делегацийы сæргъ лæууыд Хуссар Ирыстонимæ хæрзаудæн фарстаты фæдыл æмгуыстады фæдыл Хъæрæсе-Черкессийы сæргълæууæджы уынаффæгæнæг Хуыгаты Эдуард. Уый куыд банысан кодта, афтæмæй делегаци Хуссар Ирыстонмæ æрцыд Цхинал æмæ Черкесскы ‘хсæн æмгуыстады тыххæй къухтæ цы бадзырдыл æрфыстой, уый фæлгæтты. Афтæ ма фехъусын кодта, æмгуыстад кæй цæудзæн æндæр здæхтыты дæр.
Ерыстæ официалонæй байгом кæныны церемонийы æрæмбырдуæвджытæн раарфæ кодта Цхинвалы администрацийы сæргълæууæг Хуыгаты Ромео. Æвзонг богалтæн спортивон бæрæгбоны цытæн раарфæ кæныны тыххæй ма залмæ æрбацыд Фæсивæдон политикæ æмæ спорты фæдыл комитеты сæрдар Хубежты Руслан.
Ерысты уæлахиздзаутæ æмæ призертæ хорзæхджын æрцыдысты майдантæ, Кады грамотæтæ æмæ зæрдылдарæн лæвæрттæй.
РАМБЫЛДТА ÆВЗИСТ МАЙДАН
Ирон дзюдоист Тасойты Инал +100 кг уæзы категорийы ссис дунейы чемпионаты æвзист призер. Ерыстæ уагъд цыдысты Катары столицæ Дохайы. Финалмæ цæугæйæ уый акодта цыппар тохы æмæ сæ алкæцыйы дæр фæуæлахиз. Финалы æрмæстдæр уæлæмхас рæстæгмæ гæсгæ фæхæрд æртæ хатты Олимпион чемпион Тедди Ринерæн.
ФУТБОЛ
Уæрæсейы фыццаг дивизионы 31-æм туры Дзæуджыхъæуы «Алани» 5:2 хыгъдæй фæуæлахиз «Краснодар-2»-йыл. Алайнæгты сконды расгуыхтысты Заур Тарба, Хъæцмæзты Сослан æмæ æртæ пурти та ныхмæлæууæг командæйы кулдуары бакъуырдта Николай Гиоргобиани.
Турнирон таблицæйы 55 очкоимæ цæуы 3-аг бынатыл.
Радон туры 19-æм майы Ирыстоны сæйраг футболон командæ хъаздзæн Тольяттийы «Акрон»-имæ.
ХУРИТЫ Батрадз
