Нæ горæты иумæйаг ахуыргæнæндæттæй уæлдай ис уæлæмхас ахуырадон-хъомыладон уагдæттæ дæр. Уым ахуыргæнинæгтæ скъолайæ сæрибар рæстæджы æрвитынц сæ рæстæг æмæ сæхи хуызæн сабитимæ цайдагъ кæнынц алыгъуызон дæсныйæдтыл. Уыдонмæ хауынц Сывæллæтты сфæлдыстадон галуан, Æвзонг натуралистты æмæ техникты станцтæ. Уыдонмæ алыгъуызон кружоктæм цы сывæллæттæ цæуынц, уыдон стыр цымыдисимæ фæархайынц сæ равзаргæ дæсныйæдты сусæгдзинæдтыл. Зæгъын хъæуы уый, æмæ сывæллон æппынæдзух уроктæм куы хъуса, уæд сфæлмæцы. Уæлæмхас ахуыр-хъомыладон уагдæтты руаджы та ахуыргæнинаг йæхи ирхæфсы æмæ ма уыцыиу рæстæджы зонындзинæдтæ дæр исы. Зæгъæм, Æвзонг натуралистты станцмæ цы сывæллæттæ цæуы, уыдон цайдагъ кæнынц зæххы куыст, цæрæ-гойтæ æмæ зайæгойтæм зилыныл, афтæ ма сæ акæнынц æрдзы хъæбысмæ æмæ сæ уым зонгæ кæнынц зайæгойты дунеимæ, фенын сын кæнынц цымыдисон бынæттæ – цыртдзæвæн-тæ, кувæндæттæ, мæсгуытæ, стæй сæ зонгæ кæнынц хицæн кæмтты æмæ хъæуты историимæ.
Ахæм мадзæлтты рæстæджы бирæ сывæллæттæм сæвзæры æрдзмæ уарзондзинад. Уымæй уæлдай, Æвзонг натуралистты станцы сывæллæтты ахуыр кæнынц зайæгойты хъæрмуаты куыд садзын хъæуы æмæ сæм куыд зилын хъæуы, уыцы сусæгдзинæдтыл. Ам ма уæвынад кæны æвзонг метеорологон къорд дæр, цыран сæрмагонд датчикы руаджы æвдыст цæуынц уæлдæфы температурæ, дымгæйы тагъдад, уæлдæфы уымæлад, къæвда кæнæ мит кæд æруардзæн, уыцы зонæнтæ. Афтæмæй сывæллæттæ сæ хъус дарынц боныгъæдмæ.
Сывæллæтты сфæлдыстадон галуаны дæр ис бирæнымæц æрмдæсныты æмæ ахуырадон къордтæ. Ахуыры фæстæ ардæм æрбацæуынц скъоладзаутæ æмæ комфортон уавæрты сæ зонындзинæдтæ уæрæхдæр кæнынц. Бæстæзонын, аивад, фыдæлты истори, математикæ, фæсарæйнаг æвзæгты æмæ бирæ æндæр къордтæй дарддæр ам ис шахматтæ æмæ шашкæты кружоктæ дæр. Ацы аз Сывæллæтты сфæлдыстадон галуан банысан кодта йæ 65 азы юбилей. Уый цытæн уагъд æрцыд алыгъуызон ирхæфсæн мадзæлттæ, куыд горæты, афтæ районты дæр.
Æвзонг техникты станц арæзт æрцыд 1967 азы. 2008 азы августы хæсты рæстæджы тынг бахъыгдард æмæ дзы ахуыркæнынæн нал уыд æмбæлон уавæртæ. Уæддæр ардæм алыгъуызон къордтæм, цы лæппутæ æмæ чызджытæ цыдысты, уыдон сæ зæрдæ нæ сивтой сæ кружоктыл. Уазал хатæнты дæр-иу сæ куыст кодтой.
2016 азы Æвзонг техникты станцы бакодтой, арæзтадон-цалцæггæнæн куыстытæ æмæ уагдон ногæй «райгуырд». Ныртæккæ ам цы кружоктæ архайынц, уыдонмæ ма бафтыд иу – робототехникæ. Къордтæн разамынд кæнынц фæлтæрдджын ахуыргæнджытæ. Станцы цы хатæнтæ ис, уыдон се ‘ппæт дæр райдзаст, сты нырыккон ифтонггæрзтæй ифтонг. Уымæ гæсгæ ам ахуыртæ цæуынц рæвдз. Æвзонг техникты станцы къухдариуæгад куыд зæгъы, афтæмæй скъоладзаутæ иууыл тынгдæр цæуынц хъæдæрмæджы къордмæ. Хъæдæрмæгыл алыгъуызон нывтæ кæнын, сæ афтæ цымыдис кæны æмæ æрвылбон дæр ардæм разæнгардæй фæцæуынц куыд лæппутæ, афтæ чызджытæ дæр. Стыр цымыдис кæнынц сабитæ хъæдкуысты дзаумæттæ аразынмæ дæр. Афтæ аив сын рауайынц æмæ сæм фау æрхæссæн нæ вæййы.
Æвзонг техникты станцæн профилон къорд ис Цхинвалы скъола-интернаты. Æрæджы та ахæм къорд гом æрцыд Дзауы астæуккаг скъолайы. Сæ зæрды ис сæрмагонд техникты къордтæ саразын Знауыр æмæ Ленингоры районты дæр. Арæх сæ бабæрæг кæнынц Æвзонг техникты станцы къухдариуæггæнджытæ. Сывæллæтты куыстытæй саразынц равдыстытæ. Хуыздæр куысты хицæуттæ хорзæхджын æрцæуынц грамотæтæй. Ахуырад æмæ зонады министрад арæх бабæрæг кæны Æвзонг техникты станц æмæ сын бакæнынц æмбæлон æххуыс.
Æвзонг техникты станцы сцалцæг кæныны фæстæ ам байгом равдыстыты зал дæр. Уым æвæрд сты æрмдæсны ахуырдзауты хуыздæр куыстытæ. Уы-донмæ кæсгæйæ зæрдæ рухс кæны. Ахæм аив æмæ вазыгджын дзаумæттæ цы суинаг ахуыргæнинæгты къухтæй рацыд, уыдонæн, æнæмæнг, ис хорз фидæн.
Æвзонг техникты станцы ахуырдзаутæ хайад райсынц æндæр горæтты æмæ республикæты алыгъуызон мадзæлтты. Бацахсынц призон бынæттæ дæр æмæ сæ уый тынгдæр разæнгард кæны ноджы хуыздæр æнтыстытæм.
Уазæгты Марфа
Comments are closed, but trackbacks and pingbacks are open.