Грознæйы кæронмæ бахæццæ Советон Цæдисы спорты сгуыхт дæсны Адлан Вараевы номарæн турнир уæгъдибар хъæбысхæстæй. Хайад дзы райстой 370 спортсменæй фылдæр. Ерысты ирон богалтæй фæуæлахиз сты Кцойты Хъантемыр æмæ Тогойты Артур. Кцойы фырт фæуæлахиз 60 кг уæзы категорийы, Тогойы фырт та – 92 кг. уæзы.
МАСС-РЕСТЛИНГ
10 сыгъзæрин, 6 æвзист æмæ 4 та бронзæ майданы рамбылдтой РЦИ-Аланийы минæвæрттæ масс-рестлингæй Цæгат Кавказы Федералон зылды чемпионат æмæ æрыгæтты ‘хсæн чемпионаты. Хистæр кары спортсменты ‘хсæн уæлахиздзаутæ систы Багаты Ринат (90 кг), Дзуццаты Цæрай (65 кг), Мсойты Руслан (75 кг), Тауаситы Изæ (65 кг) æмæ Къадзты Зитæ (85 кг). Габолаты Сослан (75 кг) та бацахста дыккаг бынат. Æрыгæтты ‘хсæн та иууыл цæттæдæрæтæ разындысты Годжыцаты Каринæ (+70 кг), Сохиты Миланæ (60 кг), Тегаты Батраз (70 кг), Тедеты Дзамболат (+80 кг) æмæ Мсойты Руслан (80 кг). Дыккаг бынæттæ бацахстой Габолаты Сослан (80 кг), Дзуццаты Цæрай (70 кг), Мæргъиты Леван (60 кг), Танделаты Давид (105 кг), Къæбулты Рони (60 кг), Сæууойты Давид (40 кг) æмæ Тауаситы Изæ (70 кг).
ФУТБОЛ
Футболон клуб «Алани»-йы тренерон штабмæ бацыд Шалва Керашвили. Специалистимæ контракт бафыст æрцыд 3,5 азмæ. Уый нысан æрцыд сæйарг тренеры æххуысгæнæгæй. Шалва райгуырд Дзæуджыхъæуы æмæ у Ирыстоны футболон скъолайы хъомылгæнинаг. Йæ фыд Гиви Керашвили уыд цæгатирыстойнаг «Спартак»-ы хъазæг.
ХУРИТЫ Батрадз
