Фыссæг, поэт æмæ драматург Джиоты Антъоны фырт Дауыты райгуырдыл 110 азы кæй сæххæст, уый цытæн æрæджы Цхинвалы районы централон библиотекæйы уыдис чиныгкæсджыты конференци. Архайдтой дзы районы культурæйы æмæ ахуырады министрадты минæвæрттæ, мыхуыры кусджытæ, æндæр уагдæтты минæвæрттæ.
Джиоты Антъоны фырт Дауыт райгуырдис Знауыры районы Сихиаты хъæуы. Антъонæн уыд чысыл зæххы фадыг æмæ æндæртæй йæ царды уавæртæ уыдысты мæгуыраудæр. Фæлæ уæддæр бинонты нæ уагъта къæбæрцух. Куыста хъæздыдыгдæртæн æмæ йын цы лæвæрдтой, уыцы фæрæзтæй бинонтæ кодтой сæ цард. Уыдæттæ уыдта фидæны фыссæг – чысыл саулагъз лæппу Дауыт æмæ уый дæр алыгъуызон быдырон куыстытыл фæцайдагъ хæрз чысылæй.
Фæстæдæр Дауыт каст фæцис сæ хъæуы райдиан скъола æмæ 1926 азы ахуыр кæнынмæ бацыд Цхинвалы хъæууон фæсивæды скъоламæ. Скъола каст фæуыны фæстæ йæ снысан кодтой сæ хъæуы колхозы сæрдарæй. Æвзонг æмæ æвæлтæрд лæппу йæ куысты æвзæрста бирæ зындзинæдтæ, фæлæ нæ фæтых сты уыдон Дауытыл æмæ бонæй бонмæ рæзтысты йе ‘нтыстытæ. Кæд дзæвгар уыдысты йæ æнтыстытæ, раппæлинаг йæ ахаст æмæ фæлтæрддзинад, уæддæр уыцы æнтыстытæ Дауыт фагыл нæ нымадта æмæ 1934 азы ахуыр кæнынмæ бацыд Тбилисы коммунистон уæлдæр ахуыргæнæндонмæ. Уый фæстæ æрбаздæхт Ирыстонмæ æмæ кусын райдыдта Дзауы районы зæхкуысты хайады.
Æвзонг лæппуйы фæндыдис ног зонындзинæдтæ райсын æмæ 1937 азы ахуыр кæнынмæ бацыд Цæгат Ирыстоны паддзахадон педагогон институтмæ. Æртыккаг курсы фæстæ йæ институты разамынад арвыста Хуссар Ирыстонмæ, цæмæй скъола каст чи фæцис, уыцы æрыгон лæппутæ æмæ чызджыты сразæнгард кæна æмæ уыдон дæр сæ ахуыр адарддæр кæной, Дауыт кæм ахуыр кæны, уыцы институты.
Йæ бирæ хорз æмæ алыгъуызон хъуы-дытимæ æрхæццæ Цхинвалмæ, фæлæ сæ хъæумæ фæндагыл цы машинæйы бадтис, уый ахаудта Хъорнисы хидæй æмæ Дауытæн асаст йæ астæу.
Дауыт бирæ фæцархайдта, цæмæй слæууа йæ къæхтыл, фæлæ йын уый нал бантыст, сфæлмæцыд сынтæгыл хаудæй йæ рæстæг æрвитынæй æмæ 1941 азы йæхи аздæхта дзырды сфæлдыстады ‘рдæм. Райдианы хицæн чингуытæй рацыдысты йæ поэтикон уацмыстæ. Фæстæдæр та йæ романтæ «Большевикон тых», «Сæуæхсид» æмæ «Иликъо». Йæ романы хъайтар Иликъойы тыххæй ма Дауыт ныффыста пьесæ дæр æмæ уый цалдæр хатты æвæрд æрцыдис Хуссар Ирыстоны драмон театры сценæйыл.
Авторы роман «Æнæбасæтгæ тых» фыст у цыппар чиныгæй. Фыццаг, дыккаг æмæ æртыккаг чиныджы автор ирдæй равдыста, 1910 азæй 1937 азты цы хабæрттæ æрцыд, уыдоны. Ноджы арæхстджындæрæй та равдыста Стыр Фыдыбæстæйон хæсты цаутæ – Сырх Æфсады хæстонтæ сæ бæстæ куыд хъахъхъæдтой уыцы æмæ фæсчъылдымы цæрæг адæмы æнтыстытыл дзургæйæ.
Æппæт уыдон Дауыты къухты бафтыдысты йæ фидар удыхъæды фæрцы. Йæ курдиат æмæ фидар удыхъæды цæвиттон уыдысты адæмæн. Дауыт хорзæхджын æрцыд цалдæр паддзахадон хорзæхæй. «Фæллойы сырх тырыса»-йы æмæ «Кады нысан»-ы ордентæй. Уыд Советон Цæдисы фысджыты цæдисы уæнг. Цардæй ахицæн 55-аздзыдæй 1968 азы 1-æм ноябры.
Конференцийы Дауыты сфæлдыстады фæдыл сæ хъуыдытæ дзырдтой библиотекæйы кусджытæ Хъазиты Маринæ, Мамиты Эльзæ æмæ Козаты Ритæ.
Джиоты Дауытыл фыст Хъодалаты Герсаны æмдзæвгæ аив бакаст Колыты Аксойы номыл лицейы 10-æм къласы ахуыргæнинаг Болататы Динæ.
ГÆЗЗАТЫ Иван
