Ахуырады къабазы цард æмæ куыстмæ йæ хъус лæмбынæг чи дары, æнтыстытæ сын уа, уый кæй фæнды, уыдонæй кæй фæнды дæр бафæрс, не скъолатæ абон фылдæр цæмæй æййафынц цухдзинад, уый тыххæй, уæд дын алчи дæр зæгъдзæнис, зæгъгæ, сæйраг у, скъолаты кæй нæ фаг кæнынц нæлгоймаг ахуыргæнджытæ. Уавæр фæмæгуырау, нæ раздæры хъомысджын паддзахад куы фехæлд, уæд. О, фæлæ та фæстаг азты ацы уавæр ивы хуыздæрæрдæм. Куыд бирæ æндæр бæстæты, афтæ, нæ республикæйы скъолаты дæр нæлгоймаг ахуыргæнджыты нымæц кæны фылдæр. Æрæджы не скъолатæм ахуыргæнæгæй кусынмæ цы æвзонг лæппутæ æрбацыд, уыдонæй иу у фæндзæм æмæ дæсæм астæуккаг скъолаты географийы ахуыргæнæг Къозонты Геннади.
Геннади райгуырд æмæ схъомыл нæ горæты. Йæ сабидугыл дзургæйæ фыццаг йæ цæсгомыл сагъæсы фæд разынд, стæй дзы райхъуыст, зæгъгæ, хорз сабидуг цы у, уый мæ карæнтæ уынгæ нæ, фæлæ хатгæ дæр нæ ракодтой. Æмæ, æцæгдæр, Геннадийæн йæ сабибонтæ æрхаудысты Ирыстон æмæ ирон адæммæ гуырдзиаг фыдгæнджытæ æххормаг сырдтау куы лæбурдтой, растдæр уыцы рæстæгмæ. Уыимæ ма бинонты цалдæр хатт бахъуыд сæ цæрæн бынат аивын æмæ Геннади фыццаг бацыд æвдæм астæуккаг скъоламæ, фæстæдæр ахуыр кодта æхсæзæм астæуккаг скъолайы æмæ каст та фæцис фарастæм астæуккаг скъола. Скъола, ахуыргæнджытæ, æмкъласонты уал хатт аивын уый, хуымæтæджы хъуыддаг нæу, фæлæ уыцы зындзинæдтæ Геннадийыл мæгуырауырдæм æппындæр нæ бандæвтой. Æнтысгæйæ каст фæцис скъола æмæ уыцы аз, хæстæй æртæ аз куы рацыд, уæд ахуыр кæнынмæ бацыд Хуссар Ирыстоны паддзахадон университетмæ. Фæндыд æй, цæмæй суыдаид хорз юрист, науæд та йæ хъысмæт сбастаит историон ахуырадимæ, фæлæ йын уыцы хъуыдытæ атадысты, скъолайы практикæйы куы цыд, уыцы рæстæджы. Скъола, уроктæ æмæ ахуыргæнинæгты афтæ бауарзта æмæ аскъуыддзаг кодта, университеты фæстæ æрмæстдæр скъоламæ кæй бацæудзæн кусынмæ.
Æвзонг лæппутæ уæлдæр ахуырдзинад райсыны фæстæ скъолатæм ахуыргæнæгæй кусынмæ зивæгкæнгæ кæй цæуынц, уый тыххæй та Геннади афтæ зæгъы, зæгъгæ, уымæн ис цалдæр аххосаджы, уыдонæй сæйраг у, рацарæзты рæстæджы, стæй нæ иумиаг паддзахад куы фехæлд, уæд дæр ахуыргæнæджы кад цасдæрбæрцæй дæлæмæ кæй æрхауд, уый. Хуссар Ирыстоны адæм уæззау уавæрты цардысты ссæдз азы бæрц. Уæлдæр ахуырдзинад чи иста, уыцы æрыгон лæппутæ цыдысты æрмæстдæр тыхон структурæтæм.
Геннадийы хъуыдымæ гæсгæ рацæудзæнис цалдæр дæс азы æмæ ацы уавæр фæхуыздæр уыдзæнис. Уыимæ ма Геннади банысан кодта, зæгъгæ, нæлгоймаг ахуыргæнджытæ скъолаты æнæмæнгхъæуæг сты. Уымæн æмæ скъоладзауæн сылгоймаг ахуыргæнæджы уæздан æмæ фæлмæн ахастытæ куыд ахсджиаг сты афтæ, ахсджиаг сты нæлгоймаджы фидар къухæй æнкъаргæ ахастытæ дæр.
Геннади абон йæ професси æмæ цы коллективты ‘хсæн кусы, уыдонмæ цахæм ахаст дары, уый тыххæй та дæсæм скъолайы ирон æвзаг æмæ литературæйы ахуыргæнæг Бедойты Вандæ афтæ зæгъы:
– Геннадимæ цы бирæ хорз миниуджытæ ис, уыдон уынæм иууылдæр. Сæйраджыдæр, уарзы скъола, ахуыргæнинæгты, йæ куыст æмæ уый алы ахуыргæнæгæн дæр у æнæмæнгхъæуæг. Алы хатт дæр уроктæм æрбацæуы афоныл æмæ цæттæйæ. Арæх сывæл-лæтты акæны æрдзы хъæбысмæ, амоны сын компьютеримæ архайын. Геннади у хæларзæрдæ, ахуыргæнджыты ‘хсæн парахат кæны кæрæдзиæмбарынад æмæ æнгомдзинады ахастытæ.
Афтæ кæй у, уый ахуыргæнджыты ‘хсæн уæвгæйæ рахатыдтæн мæхæдæг дæр. Алчи дæр дзы дзырдта æрмæстдæр æппæлæн дзырдтæ. Сæ ныхæстæ мæ уырныдтой иууылдæр. Уымæн æмæ уыцы æппæлæн дзырдтæ нæ уыдысты цæстмæ ныхæстæ. Уыцы рæстæг Геннади уагъта урок.
ГÆЗЗАТЫ Иван
Comments are closed, but trackbacks and pingbacks are open.