ТАСОЙТЫ Игорь: «Нæ куыст, фыццаджыдæр, у адæмы хæрзæбонæн»

  Профцæдисты хæдзары йӕ куыст кӕны горӕты администрацийы культурӕйы, фӕсивӕды ӕмӕ спорты управлени.  Ныр иу азӕй фылдӕр йӕ сӕргъ лӕууы Тасойты Игорь. Управлени, сӕйраджыдӕр, кусы культурӕ, аивад ӕмӕ спорты фарстатыл, ирон культурӕ, ирон аивад размӕ кӕнын, адӕмы размӕ йӕ хӕссын ӕмӕ йӕ парахат кӕныныл. Управленийæн нӕ уыд культурӕйы хӕдзар, уый та къуылымпыдзинӕдтӕ ӕвзӕрын кодта, уымӕн ӕмӕ нӕ уыд фадат алыхуызон мадзӕлттӕ уадзынӕн. Ныр ацы проблемӕ скъуыддзаг æрцыд. «Дыууӕ ӕхсызгон хъуыддаг ӕрцыд нӕ управленийы царды. Фӕзынд культурӕйы хӕдзар, стӕй ма нын хицӕнгонд ӕрцыд сӕрмагонд автобус, ныр сӕрибарӕй нӕ бон уыдзӕн Республикӕйӕн ӕддейӕ алыхуызон фестивалты ӕмӕ конкурсты хайад исын. Ацы дыууӕ хӕрзиуӕгон хъуыддаджы тыххӕй стыр бузныг зӕгъын нӕ президент ӕмӕ горӕты администрацийы сӕргълӕууӕгӕн», – загъта управленийы сӕргълӕууӕг.

Горӕты культурӕйы хӕдзары ис алыхуызон аивадон къордтӕ: зард, националон кафт, гитарайыл цӕгъдын, хӕдархайгӕ авторон зарӕджы, гуымсӕгыл цӕгъдын, ритмикон гимнастикӕ, драмон къордтӕ. Ацы къордтӕм цӕуынц нӕ горӕты скъолаты ахуырдзаутӕ, стӕй ма, фӕндон кӕмӕ ис, аивады алы хуызтӕ чи уарзы ӕмӕ сæм чи рӕхсы, ӕппӕт уыцы алы кары адӕм. Алы къордӕн дӕр ис йӕхи аивадон къухдариуӕггӕнӕг. Уыдон се ‘ппӕт дӕр сты сӕ хъуыддаджы дӕснытӕ, кӕцытӕ амонынц сӕ зонындзинӕдтӕ ирон зард, ирон цагъд ӕмӕ кафты курдиат кӕмӕ ис, ӕппӕт уыдонӕн. Ацы къордтæ фӕзындысты культурӕйы хӕдзары фӕзындимӕ иумӕ ӕмӕ стыр ахъаз фӕуыдзысты курдиатджын сывӕллӕтты рабӕрӕг кӕнынӕн. Управленийы дӕлбар ма ис сывӕллӕтты хореографион студи «Ирон», йӕ аивадон  къухдариуӕггӕнӕг РХИ-йы сгуыхт артисткӕ Хуыгаты Дианӕ. Ацы студийы хъомылгӕнинӕгтӕ уӕлахиздзаутӕ свӕййынц алыхуызон фестивальты куыд нӕ республикӕйы, афтӕ уымӕн ӕддейӕ дæр. Сӕ куыст кӕнынц фольклорон ансамбль «Фарн» ӕмӕ вокалон къорд «Булӕмӕргъ». Культурӕйы хӕдзары фӕзындимӕ ацы коллективтӕн дӕр сӕ куысты уавӕртӕ фӕхуыздӕр сты. Куыд базыдтам, афтæмæй ма сæм рæхджы бафтдзæн джазон зарджыты къорд дæр.

Культурӕйы хӕдзар куы байгом, уӕдӕй абонмӕ бӕстыхайы уагъд ӕрцыд алыхуызон бӕрӕгбонон мадзӕлттӕ, куыд Ног азы, 23 февралы, 8-æм марты цытӕн. Ивгъуыд аз сӕрды мӕйты та Ногдзауты парчы уагъд цыдис «Ирон хъазт», уырдӕм-иу ӕрбамбырд сты горӕты цӕрджытӕ стырӕй, чысылӕй ӕмӕ сӕ арӕхстдзинад ӕвдыстой кафынмæ. Ныртӕккӕ та сӕхи цӕттӕ кӕнынц зарӕджы фестиваль «В ладонях гор», зæгъгæ, уым хайад райсынмæ Хуссар ӕмӕ Цӕгат Ирыстоны  зарӕггӕнджытимӕ. Апрелы мӕйы Уӕрӕсейӕ хуынд эстрадон оркестр музыкӕйӕ гом ахуыртӕ ауадздзӕн горӕты скъолаты ахуырдзаутӕн.

Культурӕйы управлени ӕмгуыст кӕны республикӕйы районты культурӕйы хӕдзӕрттимӕ. Концертон программӕтӕ ахӕссынц районтӕм, стӕй раттынц иумиаг концерттӕ дӕр районтимӕ иумӕ.

Спорты къабазы дӕр зынгæ куыст кӕны управлени. Ауадзынц алыхуызон турниртӕ спорты ӕндӕр ӕмӕ ӕндӕр хуызтӕй, цыран хайад райсынц горӕты цӕрджытӕ. Аивгъуыйгӕ аз фыццаг хатт уагъд ӕрцыд гом турнир нардытӕй. Уым хайад райстой нӕ горӕты цӕрджытӕй бирӕтӕ.   Ацы аз дӕр та фӕнд кӕнынц ацы турнир ауадзын. Уымӕй дарддӕр скъолаты ӕхсӕн уагъд фӕцӕуы хӕстон хъазт «Зарница»-йы ерыстæ.  

Тасойты Игорь куыд банысан кодта, афтӕмӕй Ирыстоны ис курдиатджын фӕсивӕд. «Нӕ фӕсивӕд сты алыварсонæй дæр курдиатджын. Сӕрмагондӕй аивадыл дзургӕйӕ, банысан кӕндзынӕн, кӕй нӕм ис, аивады алы хуызты чи басгуыхт, ахæм бирæ адæм. Ирон кафт,  зард ӕмӕ ирон аивады ӕндӕр хуызтӕм арæхстдзинад цы фӕсивӕдмӕ ис, уыдоны фарсмӕ та хъӕуы балӕууын, сӕ ӕрдзон курдиат сын райхалын ӕмӕ семӕ кусын, уӕд ирон культурӕ, ирон аивад уыдзысты бӕрзонд ӕмвӕзадыл ӕмӕ нын нӕ фыдӕлтӕ цы хорз ӕгъдӕуттӕ ныууагътой, уыдон рох никуы уыдзысты», –  банысан кодта Тасойы фырт.

Управленимӕ ис дарддӕры куысты фӕндтӕ, фӕлӕ иууыл ӕргом не ‘рцыдысты, зӕгъгӕ сын адӕм сӕхӕдӕг уыдзысты ӕвдисӕн. «Цыдӕриддӕр кусӕм, цыдӕриддӕр нӕм фӕндтӕ ис, уыдон иууылдӕр сты нӕ горӕты цӕрджыты хӕрзӕбонӕн», – йӕ ныхасы кӕрон банысан кодта Тасойты Игорь.                                                                                          

КЪÆБЫСТЫ Заринæ