Фæстаг азты нæ республикæйы хицæн æмæ хицæн рæтты райтынг кæсагдарды хæдзарадты куыст. Ацы фæзынд у ногдзинад нæ республикæйы.
Ныртæккæ нæ республикæйы территорийыл ис æртæ кæсагдарды хæдзарад – Дзау, Знауыр æмæ Цхинвалы районты. Ацы куыст райтынг кæнын кæй фæнды, уыдонæн æххуыс цæуы нæ республикæйы разамынады æрдыгæй кредитты хуызы.
Уæдæ уæлдæр ранымад кæсаджы хæдзарадтæй сæ иу ис Гуфта-Къуайсайы фæндаджы был, Кæсаджджыны хъæумæ хæстæг. Йæ саразæг у Гæджиты Леонид. Уый куыд зæгъы, афтæмæй йæм кæсаджы бассейнтæ саразыны хъуыды æрцыд 25 азы размæ. Уый куыста экономистæй, финансты комитеты. Уыцы азтæ змæст азтæ уыдысты, куыст нал цыд, æмæ хъуыд амæлттæ кæнын. Леонид сфæнд кодта рагæй йæ хъуыдыйы чи уыд, уыцы куыстмæ æрæвналын 2003 азы. Райдианы цад сарæзта сæхи хъæуы. Цæмæй сæ сбирæ кодтаид, уый тыххæй-иу доны кæсæгтæ æрцахста æмæ-иу сæ цады ауагъта. Иу афон уалдзæджы зæй рацыд æмæ йын йæ цад æд кæсæгтæ аласта. Ацы куыстыл кæй фæцайдагъ, уымæ гæсгæ йæ нал фæндыд йæ ныууадзын æмæ сфæнд кодта Дзауы комы цæугæдæттæй хуыздæр кæцы у, уым бассейн саразын. 8 чысыл цæугæ донæй анализтæ аразынмæ ахаста Цæгат Ирыстонмæ. Уыдонæй иууыл хуыздæрыл банымадтой Гуфтайы мидæгæй хæхтæй цы дон цæуы, уый. Леонид дæр уым æрбынат кодта,сарæзта дзы кæсаг дарынæн æмбæлон уавæртæ. Ныр йæ хæдзарад йæ къахыл слæууыд. Уый Цæгат Ирыстонæй æрласы кæсаджы лæппынтæ, бынаты сæм базилы æмæ 3-5 килограмм куы свæййынц, уæд сæ ауæй кæны. Уырдæм æм бынатмæ дæр бацæуынц æлхæнджытæ.
Знауыры районы Сихиаты хъæуы цы кæсагдарды хæдзарад ис, уый та сæндидзын кодта Цхуырбаты Сослан. Куыд зæгъы, афтæмæй кæсагдарды куыст æнцон нæу. Цæмæй сæндидза, уый тыххæй хорз доныгъæдæй дарддæр хъуамæ арæзт æрцæуа цалдæр бассейны. Стæй хъуамæ зонай мах климатон уавæрты кæсаджы цахæм хуызтæ тынгдæр рæзынц. Кæсæгтæн дæр сæхи низтæ ис æмæ сæ хъахъхъæнын хъæуы. Иу кæсагыл низ куы фæзына, уæд гæнæн ис сыскъуына се ‘ппæты дæр. Кæсæгты иу хуызтæ арæх бахæрынц æндæрты, уымæ гæсгæ сæ ахицæн кæнын фæхъæуы. Æппæт ацы сусæгдзинæдтæ куынæ зона кæсагдарæг, уæд йæ хæдзарадæй пайда нæ исдзæнис.
Цхинвалы районы Уанаты хъæуы цы кæсаджы хæдзарад ис, уый саразæг та у Дменисы хъæуы цæрæг Лолоты Æхсар.
Цæгат Ирыстоны уый балхæдта æхсæз мин лæппын кæсаджы. Уыдон, сæйраджыдæр, уыдысты хъулон кæсаг. Цæмæй хæдзарад фидарæй йæ къахыл слæууа, уый тыххæй хъуамæ сараза сæрмагонд кæсагæфснайæн ныккæнд, уым уыдзæн уазалгæнæнтæ, кæсагæфснайæн вакуумтæ. Уыдон та уый тыххæй хъæуынц æмæ ма удæгас кæсагæй дарддæр уый фæнды цæхджын кæсаг фынгмæ æрхæссыны æввонг куыд уа, афтæ æрцæттæ кæнын.
Ныртæккæ йæм цы кæсаг ис, уый уæй кæны бынатæй. Амалиуæггæнæг куыд зæгъы, афтæмæй уымæ Цæгат Ирыстонæй дæр æрцæуы æлхæнджытæ. Зæгъынц, зæгъгæ, нæхи доны чи схъомыл вæййы, уыдонæн сæ фыд бирæ хæрзаддæр вæййы.
УАЗÆГТЫ Марфа
Comments are closed, but trackbacks and pingbacks are open.