Раппӕлинаг у Цхинвалы районы Культурӕйы управленийы куыст ӕмӕ архайд. Йӕ сӕргълӕууӕг Гаглойты Ростислав йӕ дӕлбаруӕвӕг кусджытӕй домы, цӕмӕй хъӕууон фӕллойгӕнджыты ‘хсæн цæуа ахадæн культурон-рухсадон куыст. Афтæ куыст цыдис культурæйы уагдæтты материалон базӕ фидардæр кæныныл, сфӕлдыстадон коллективты проблемæтæ скъуыддзаг кæныныл, кадрты квалификаци бӕрзонддӕр кæныныл. Ам ныр къорд азты архайынц  адӕмон ансамбль «Амонд», фольклорон ансамбль, адӕмон театр, вокалон къорд «Ирон фӕндыр» ӕмӕ сывӕллӕтты ансамбль «Малусӕг». Уыдон раджы ахызтысты хӕдархайгӕ коллективты ӕмвӕзады фӕлгӕттӕй ӕмӕ уымӕ гӕсгӕ уарзон систы ӕнӕхъӕн республикӕйы аивадуарзджытӕн. Культурӕйы управленийы ма ис ахӕм коллективтӕ, куыд вокалон-инструменталон ансамбль «Арвырон», Къостайыхъӕу, Хелцуа, Тъбет, Дменисы хъӕууон культурӕйы хореографион ансамбльтӕ ӕмӕ ма алыгъуызон аивадон хӕдархайгӕ къордтӕ дӕр.

Ивгъуыд аз управленийæн райдыдта ногазон мадзӕлттӕм бацӕттӕ кӕнын ӕмӕ сӕ ауадзынӕй. Алы хъӕууон клубы дӕр уагъд ӕрцыдысты бӕрӕгбонон изӕртӕ, сывӕллӕтты утренниктӕ, концерттӕ. Тъбеты хъӕууон Культурӕйы хӕдзары уагъд ӕрцыд районы сывӕллӕттӕн ногазон карнавал ӕмӕ уыимӕ иумӕ ӕппӕт хъӕууон клубты мадзалы хайадисджытӕн бакодтой ногазон лӕвӕрттӕ. Сыгъдӕг Валентины боны цытӕн Культурӕйы хӕдзӕртты уагъд ӕрцыдысты эстрадон концерттӕ. Фыдыбӕстӕ хъахъхъӕнӕджы боны цытӕн клубты сӕргълӕуджытӕ бацӕттӕ кодтой фембӕлдтытӕ ӕфсӕддон службӕгӕнджытимӕ, равдыстой концерттӕ. Сылгоймӕгты дунеон бон – 8-ӕм марты алы Культурӕйы хӕдзар ӕмӕ клубы дӕр сорганизаци кодтой бӕрӕгбонон мадзӕлттӕ, йӕ хайадисджытӕн та бакодтой зӕрдылдарӕн лӕвӕрттӕ. Стыр Уӕлахизы цытӕн клубтӕ ӕмӕ библиотекӕтӕ сарæзтой фотостендтӕ, равдыстытӕ, кӕцытӕ дзурӕг уыдысты Стыр Фыдыбӕстӕйон хӕсты цаутӕ ӕмӕ ирон адӕмы хъайтар фыртты сгуыхтдзинӕдтыл, уыимӕ иумӕ ма фембӕлдтытӕ уыд ветерантимӕ дӕр. Уыдонӕн раарфӕ кӕныны тыххӕй бынӕттӕм ацыдысты культурӕйы управленийы кусджытӕ ӕмӕ сфӕлдыстадон интеллигенцийы минӕвӕрттӕ. Тъбеты Культурӕйы хӕдзары уагъд ӕрцыд «Ӕнусон кад – хъайтартӕн», зӕгъгӕ, ахӕм мадзал.

Паддзахадон киноконцертон зал «Чермен»-ы ауагъдӕуыд хӕрзаудӕн концерт Республикӕ Хуссар Ирыстоны адӕмон артист Джиоты Феликсы цытӕн ӕмӕ уымӕй цы ӕхцайы фӕрӕзтӕ ӕрбацыд, уыдон лӕвӕрд ӕрцыдысты йе ‘мкъаймӕ. Хуссар Ирыстоны хӕдбардзинад банымайыны бон – 26 августы  районы культурӕйы управлени активон хайад райста мадзӕлтты. Стыр ӕмӕ ахадгӕ уыд сӕ архайд нӕ Республикӕ йӕ хӕдбардзинады бон – 20-ӕм сентябры куы нысан кодта, уӕд дӕр. Развӕлгъау бацӕттӕгонд планмӕ гӕсгӕ районы хъӕуты ауагъдӕуыд цымыдисон ӕмӕ мидисджын мадзӕлттӕ. Цхинвалы  Ногдзауты парчы сорганизаци кодтой ирон къӕбиц, ӕмӕ ма дзы равдыстой бӕрӕгбонон стыр концерт дӕр. Активон хайад райстой Цхинвалы уагъдцӕуӕг ӕрвылазон конкурс «Ирон бӕгӕны»-йы.

Культурӕйы управленийы аивгъуыйгæ азы сæрмагонд хъусдард здӕхта чиныг пропагандæ кæнынмæ. Сӕрмагондæй бацӕттӕгонд планмӕ гӕсгӕ ӕппӕт хъӕууон клубтӕ ӕмӕ библиотекӕты ауагъдӕуыд чингуыты равдыстытӕ, тематикон ӕмӕ поэзийы изӕртӕ, диспуттӕ, уыдонæн иууылдӕр уыдис ирон фысджыты сфӕлдыстадимæ зонгæ кæныны нысан. Хелцуайы хъӕууон Культурӕйы хӕдзары бацӕттӕ кодтой ӕмӕ ауагътой ирон курдиатджын фыссӕг, дзӕнӕттаг Гуыцмӕзты Алешы рухс ном арыны цытӕн изæр, Дменисы культурон уагдоны та ссардтой се ‘мхъӕуккаг, курдиатджын поэт ӕмӕ йӕ адӕмы патриот Икъаты Владимиры рухс ном.

Хетӕгкаты Къостайы райгуырдыл 159 азы сӕххӕсты цытӕн Къостайыхъӕуы уыд фембӕлдтытӕ сфӕлдыстадон интеллигенцийы минӕвӕрттимӕ, равдыстой фӕллойгӕнджытӕн концерт, бацӕттӕ кодтой равдыстытӕ. Клубтӕ ӕмӕ библиотекӕты сфӕлыстой цӕстуынгӕ æрмæджытæй, рауагътой къулын газеттӕ, фотомонтажтӕ, ауагътой ма ӕндӕр мадзӕлттӕ дӕр. Не стыр генийы цытӕн поэзийы изӕр уыд Тъбеты Культурӕйы хӕдзары дӕр. Традициау сси районӕн пансионат «Забота»-мӕ фӕуазӕг уӕвын. Уыдонæн равдисынц концерттæ, бакæнынц сын лӕвӕрттӕ.

Районы хӕдархайгӕ аивадон къордтӕ хайад райстой республикон фестиваль «Зилгӕ кафт»-ы, афтӕ ма ӕндӕр мадзӕлтты дӕр.Тъбеты культурон уагдонмӕ та ӕрбамбырд сты районы аивадон къордтӕ конкурсмæ. Хыгъдон рӕстӕджы коллективты тыхтӕй ӕвдыст ӕрцыд 20 концерт ӕмӕ 12 спектаклы ӕрмӕст районы нӕ, фӕлӕ республикӕйы æндæр рæтты дӕр. Декабры мӕйы адӕмон ансамбль «Амонд» хайад райста аивад ӕмӕ сфӕлдыстады 3-аг Ӕппӕтуӕрӕсейон конкурс «Симфония звезд»-ы горӕт Ессентукы. Бацахста фыццаг бынат ӕмӕ райста Гран-при. Декабры мӕйы ӕппӕт клубтӕ ӕмӕ библиотекӕты цыдысты хыгъдон мадзӕлттӕ.

Зӕгъын хъӕуы, районы культурӕйы объектты кӕй фӕхуыздӕр материалон-техникон базӕ, фӕлӕ уӕддӕр Дменисы Культурӕйы хӕдзар абоны онг дӕр цалцӕг не ‘рцыд, сфӕлдыстадон коллективтӕн нӕ фаг кӕны кафӕн уӕлӕдарӕс. Банысан кӕнын хъӕуы уый, ӕмӕ кӕд 2011 азы нӕ республикӕйы Хицауад адӕмон ансамбль «Амонд»-ӕн рахицӕн кодта штатон иуӕгтӕ, уӕддӕр артистты ӕмбис кусынц 0, 5 ӕмӕ 0, 25 штаттыл. Уымӕ гӕсгӕ коллективӕй кадрты ивылынад у бӕрзонд. «Амонд» у республикӕйы иууыл раззагондӕр коллективтӕй иу, уый Ирыстоны кад хъахъхъæны канд бынаты нӕ, фӕлӕ уымӕн ӕддейӕ дӕр, у Ӕппӕтуӕрӕсейон  бирæ фестивальты лауреат ӕмӕ призер. Зӕгъӕн ис, ӕмӕ «Амонд» у Паддзахадон ансамбль «Симд»-ы кадрты куырдадз.

Культурӕйы управлени ӕууӕнды йӕ тыхтыл ӕмӕ ноджы хъаруджындӕрӕй æххæст кæндзысты сæ хæстæ.

Хуыбиаты Никъала

Comments are closed, but trackbacks and pingbacks are open.