Рæстæг куыд цæуы, афтæ ивы ахуыры процесс дæр. Æгæр вазыгджын ахастытæ фæзынд ахуыргæнæг æмæ ныййарæджы ‘хсæн.
Хуссар Ирыстоны скъолаты дистанцион ахуыры бакондыл ныййарджытӕ, скъоладзаутӕ ӕмӕ ахуыргӕнджытӕ сӕмбӕлдысты алыгъуызон уавӕрты.
Цалынмæ нæ республикæйы карантин конд не ‘рцыд, уæдмæ ахуырады министрады кусджытæ иумæйаг æмбырды аскъуыддзаг кодтой, интернетæй пайда кæныны фадат кæмæн нæй, уыдонæн кæй дæтдзысты хæслæвæрдтæ телефонæй. Æмæ, дам сæ хæслæвæрдтæ куыд сæххæст кæной, уый сбæрæг кæндзыстæм карантины фæстæ.
Скъоладзаутæ æмæ ахуыргæнджытæ æнæмæнг хъуамæ ифтонг æрцыдаиккой интернет æмæ смартфонтæй. Рæстæг æй куыд равдыста, уымæ гæсгæ нæ республикæйы скъолатæ цæттæ нæ уыдысты дистанцион ахуырмæ.
Ис нæм ахæм категорийы сывæллæттæ, кæцыты сæ ныййарджытæ карантины фæстиуæгæн акодтой хъæутæм æмæ сын нæ уыд фадат интернетон бастдзинад саразынæн. Фæлæ-иу уыдонмæ дæр телефонæй фæдзырдтой сæ ахуыргæнджытæ æмæ сын-иу радтой хæслæвæрдтæ.
Æмæ ма нæм ис ахæм сывæллæттæ дæр, кæцытæ контакты нæ цыдысты ахуыры рæстæджы дæр. Фæлæ сæ зонындзинæдтæ иннæ сывæллæттæй къаддæр нæ уыдыс-ты. Алы сывæллон дæр æндæртæй хицæн кæны. Уæлдай æндæрхуызон сты, аутизмæй хъыгдард чи у, уыдон. Ахæм сывæллæттæм фæхъæуы уæлдай фылдæр хъусдард. Иннæтæй сæ иппæрд куы нæ кæнай, уæд фæстейæ нæ баззайдзысты. Алы сывæллонмæ дæр хъæуы индивидуалон ахаст. Ахæм сабитæ хицæн кæнынц уымæй, æмæ дунемæ кæсынц æндæр цæстæй. Мах та сын хъуамæ фадат дæттæм æхсæнадмæ хæстæгдæр уæвынæн.
Ахуыргæнæг æрмæст амонгæ нæ кæны, канд къласы бæрны нæ бацæуы, фæлæ дзуапп дæтты алы ахуырдзауы тыххæй дæр хицæнæй. Уый хъуамæ зона, рахиздзæн сывæллон йемæ контакты дистанцион уавæры æви нæ. Базона, цы аххосагмæ гæсгæ не сдзуапп кодта, æмæ йын саргъ кæна йæ зонындзинæдтæн йæ уавæрмæ гæсгæ.
Ахуыргæнæг хъуамæ архайа, цæмæй йæ куыстæй стыр пайда æрхæсса сывæллæттæн, ныййарджытæн, скъолайæн æмæ æхсæнадæн, уымæн æмæ алы бæстæйæн дæр йæ фидæн сты рæзгæ фæлтæр. Скъоладзау хорз куы ахуыр кæна, йæхи хорз куы дара, æгъдауджын æмæ æнæзивæг куы уа, уæд дзы рацæудзæн цæвиттойнаг адæймаг. Уыцы вазыгджын хъомыладон хъуыддаджы ахуыргæнæджы хайбавæрд егъау у.
Иннæ дæсныйæдтимæ абаргæйæ, ахуыргæнæджы дæсныйад у æппæтæй вазыгджындæр æмæ арфæйагдæр. Ныхасæн баззади, зæгъгæ, дам, Арв æмæ Зæххы астæу сывæллоны удæй сыгъ-дæгдæр нæй æмæ ахуыргæнæджы уд дæр сывæллæттимæ кусгæйæ сыгъдæгдæр кæны.
Афтæ у ахуырдзауты хъуыддаг дæр: иутæ ног æрмæгыл уайтагъд фæхæст вæййынц, иннæтæн æй хъæуы фæлхатт кæнын, аннæтæ та йæ æппындæр нæ бамбарынц. Ахуыргæнæг хъуамæ уыдæттæ æмбара æмæ хицæнæй бакуса алы сывæллонимæ дæр. Уыд афтæ дæр: скъоладзау йæ хæдзарон куыст бацæттæ кодта, фæлæ не сдзуапп кодта видеобастдзинады руаджы, æмæ йын ахуыргæнæг дыууæ нывæрдта. Иннæ хатт дæр – афтæ. Уый ууыл дзурæг нæу – саби зынхъомылгæнинаг у, кæнæ зивæггæнаг. Ахæм ахастæй сывæллон, гæнæн ис æмæ психологон травмӕ дæр райса.
Сывæллæттæн сæ фылдæр хай уроктыл, къласы бадгæйæ, ахуыргæнæгмæ зæрдиагæй никуы фæхъусынц, æмæ дистанцион методæй куыд ахуыр кодтой?
Иу стӕм скъоладзау йедтӕмӕ хибарӕй ничи сахуыр кӕндзӕн йӕ уроктӕ, уӕлдайдӕр та, хӕдзары иунӕгӕй куы уа, уӕд.
Зæгъын хъæуы, интернеты мæгуырау уавæр дæр кæй къуылымпы кодта дистанцион ахуырад.
ДРИАТЫ Лейла
Comments are closed, but trackbacks and pingbacks are open.