Хицауады 2020 азы 31-æм августы уынаффæмæ гæсгæ, 2020 азы 14-æм сентябры Хуссар Ирыстон æмæ Уæрæсейы ‘хсæн паддзахадон арæн гом æрцыд. Уый фæдыл «Югосетпотребнадзор»-ы кусджытæ райстой мадзæлттæ, цæмæй коронавирус нæ республикæйы ма апарахат уа, уый тыххæй. Фæндаджы баконды фæстæ нæ республикæйы эпидеомиологон уавæр уæззауæй уæззаудæр кæй кодта, уый фæдыл 21-æм октябры коронавирусон инфекцийы ныхмæ тох кæныны фæдыл нæ республикæйы цы оперативон штаб арæзт æрцыд, уый уæнгтæ сæ радон рабадты рæстæджы уынаффæ рахастой 21-æм октябры нæ республикæйы скъолаты ахуырады процесс рæстæгмæ æруромыны фæдыл. Цæмæй ахуырады процесс ма æрлæууа карантины рæстæджы, уый тыххæй Ахуырады министрад уынаффæ рахаста ахуыры процесс дистанцион хуызы уадзын. Уый фæстиуæгæн ахуыргæнджытæ æрвылбон дæр сæ ахуыргæнинæгтæн уадзынц дистанцион ахуыр.
Нæ республикæйы фæстаг къуыриты эпидемиологон ситуаци кæй сабыр кæны бонæй бонмæ, уый бæрæг у, нæ республикæйы санэпидемиологон службæтæ цы информаци дæттынц æрвылбон дæр, уымæй. Уымæ гæсгæ аивгъуыйгæ мæйы коронавирусы инфекцийы ныхмæ тох кæныны фæдыл оперативон штабы радон рабадты рæстæджы уынаффæ ист æрцыд, цæмæй нæ республикæйы скъолаты кæстæр кълæсты ахуыргæнинæгтæн сног кæной ахуырады процесс æппæт санитарон домæнтæ æххæстгæнгæйæ. Уый фæдыл 24 ноябры нæ республикæйы скъолатæ дæргъвæтин карантины фæстæ сæ дуæрттæ байгом кодтой кæстæр кълæсты ахуыргæнинæгтæн. Ахуырады министрады куыд банысан кодтой, афтæмæй кæстæр кълæсты ахуыргæнинæгтæн ахуыры ног зонындзинæдтæ базонын дистанцион ахуыры рæстæджы зындæр у, хистæр кълæсты ахуыргæнинæгтæм абаргæйæ.
Куыд горæты, афтæ районты скъолаты директортæ дæр райсгæ уынаффæйы фæстиуæгæн 24-æм ноябры скъолаты райдыдтой сæ ахуыры процесс кæстæр-къласонтæн, уыдоны æмрæнхъ Къуайсайы астæуккаг скъолайы дæр. Йæ директор Хуыгаты Суликъо нын куыд загъта, афтæмæй сын тынг æхсызгон уыд, ацы хъуыддаг. « Куыд нæ республикæйы цæрджытæ, афтæ Къуайсайы дæр апарахат ацы низ, тынг æвзæр уыд æмткæй сæвзæргæ уавæр. Не скъолайы ахуыргæнджытæй ацы низæй бирæтæ фæрынчын сты æмæ уымæ гæсгæ сæ бон нæ уыд дистанцион ахуыр уадзын. Нæ горæты рынчындоны медицинон персонал цырд фæлæууыдысты сæ адæмы фарсмæ, æмæ нæм уый фæстиуæгæн уавæр цъус фæхуыздæр ис. Уымæ гæсгæ мах дæр не скъолайы дуæрттæ æрбайгом кодтам нæ кæстæр кълæсты ахуыргæнинæгтæн æппæт санитарон домæнтæ хъахъхъæнгæйæ. Алы райсом дæр не скъолайы медицинон хо ахуыргæнинæгты тæвд бары. Кæд дзы искæмæ тæвд вæййы, уæд æй хæдзармæ арвиты. Къуыри дыууæ хатт кълæстæ дезинфекци цæуынц. Райсомæй, цалынмæ уроктæ нæ райдауынц, уæдмæ партæты спиртæй ныссæрфынц ахуыргæнджытæ. Уроктæ уагъд цæуынц 45 минуты, ауадзынц æртæ, цыппар урокы. Дзауы районы администрацийы ахуырады хайады нын баныфсæвæрдтой, кæй нын балхæндзысты медицинон маскæтæ æмæ антисептиктæ, уымæ гæсгæ уыдонæй дæр пайда кæнын райдайдзыстæм», – банысан кодта Хуыгаты Су-ликъо.
Хуыгайы фырт куыд, загъта, афтæмæй хистæр кълæсты ахуыргæнинæгтæ дарддæр ахуыр кæнынц дистанцион æгъдауæй. Уыдон дæр сæ ахуыргæнджытимæ стыр цымыдисæй æнхъæлмæ кæсынц карантины фæудмæ, цæмæй дарддæр ахуыры процесс скъолайы бæстыхайы цæуа. Банысан кодта, зæгъгæ, ахуыргæнджытæн тынг æхсызгон уыд ацы хабар æмæ хорз зæрдæйы равгимæ рахыстысты сæ куыстмæ. Ныр-тæккæ эпидемиологон уавæр афтæ кæй у, уымæ гæсгæ рæстæгмæ скъолайы хæрæн-дон нæ кусы, уымæн æмæ уроктæ уагъд цæуынц, цы фæткой арæзт æрцыдис, уымæ гæсгæ. «Тынг зæрдиагæй æнхъæлмæ кæсæм ацы уавæр кæд æрбæстон уыдзæн, уымæ. Уымæн æмæ куыд ахуыргæнæг, афтæ мæнæн дæр æнцондæр у скъолайы бæстыхайы уроктæ уадзын. Хорз уаит æмæ ма фæндзæм æмæ æхсæзæм кълæсты ахуыргæнинæгтæн дæр куы радтиккой скъоламæ бацæуыны фадат. Уый канд нæхи фæндон нæу, фæлæ у бирæ ныййарджыты фæндон дæр. Хуыцауы фæрцы нæм ныртæккæ сæвзæргæ ситуаци фæхуыздæр ис, рынчынты нымæц къаддæр кæны» – банысан кодта Хуыгаты Суликъо.
ТАНДЕЛАТЫ Вилена
Comments are closed, but trackbacks and pingbacks are open.