Спорт

УÆГЪДИБАР ХЪÆБЫСХÆСТ

Ирон богал Гуылаты Æхсарбег ссис рейтингон турнир UWW «Вацлав Циолковский»-йы уæлахиздзау. Ерыстæ уагъд цыдысты Польшæйы столицæ Варшавайы. Европæйы чемпион Гуылаты Æхсарбегæн сыгъзæрин майдан рамбулын бантыст 79 кг уæзы категорийы. Уый финалы фæуæлахиз Рашид Курбановыл.

 

СУМО

25-27 июны Казаны уагъд æрцæудзæн Европæйы чемпионат сумойæ. Ерыстæм йæхи цæттæ кæны Уæрæсейы æмбырдгонд командæ. Уый тыххæй сын уагъд цæуынц цæттæгæнæн сбортæ. Хайад сæ исынц ирон сумоисттæ Хъазиты Ацæмæз, Хъараты Зауыр, Багаты Руслан, Куыдзойты Эдуард, Бызыккты Аслан æмæ Дриаты Алан.

Цæттæгæнæн сборты фæстæ бæрæг æрцæудзæн, бæстæйы командæйы сконды европæйы чемпионаты хайад чи райсдзæн, уыцы спортсменты нæмттæ.

 

ФУТБОЛ

Дзæуджыхъæуы футболон академи «Алани»-йæн лæвæрд æрцыд Уæрæсейы футболон цæдисы регионалон центры статус. Уый тыххæй йæ директор Битарты Робертæн æвдисæндар радта Уæрæсейы футболон цæдисы техникон инструктор Сергей Темрюков. «Регионалон центр у регионы иууыл хуыздæр скъола, цыран кусынц иууыл хуыздæр кадртæ, пайдагонд цæуынц Уæрæсейы футболон цæдисы иууыл хуыздæр методикæтæ, ис ын æппæт æнæмæнгхъæуæг инфраструктурæ. Регионалон центры архайд здæхт у Уæрæсейы клубтæ æмæ æмбырдгонд командæтæн  бæрзонд къласы спортсменты бацæттæ кæнынмæ», – дзырдæуы академийы сайтыл.

Банысан кæнын ма хъæуы уый, æмæ Уæрæсейы футболон цæдисы Регионалон центры сырæзт фадат кæй дæтты Уæрæсейы футболон цæдисы проекты хайад исынæн, тренерты сконды квалификаци фæбæрзонддæр кæнын, раззагондæр методикæтимæ зонгæ кæнынæн. Афтæ ма фæфылдæр кæндзæн æвзæнгты ‘хсæн элитон ерысты хайад райсыны шанстæ дæр.

ХУРИТЫ Батрадз