Спорт

УÆЗЗАУ АТЛЕТИКÆ

Саудоваг Аравийы горæт Джиддайы уагъд æрцыд æвзæнгты ‘хсæн дунейы чемпионат уæззау атлетикæйæ. Ерысты уæлахиздзау ссис Гуссалты Заринæ. Уымæн аккаг ныхмæлæууæг нæ разынд 71 кг уæзы категорийы. Уый равдыста 226 кг бæрæггæнæн (103+123). Афтæмæй сæвæрдта  дыууæ дунеон рекорды.

Фæстæдæр ма Ирыстоны уæззау атлетикæйы хъомылгæнинæгтæй ноджы иу сыгъзæрин майдан рамбылдта Чилæхсаты Мадинæ. Уый та 76 кг уæзы категорийы архайгæйæ дыууæ истæн скодта 205 кг (88+117).

СУМО

 

Радон уæлахиз та бафтыд ирон сумоистты къухты. Уыдонæн хорз æнтыстытæ уыд Европæйы кубокы радон этапы, кæцы уагъд æрцыд Германы. Ерысты хайад райстой Европæйы 12 бæстæйы 150 тыхджындæр сумоисты.  Уæззау уæзы категорийы пьедестал иууылдæр бацахстой ирон богалтæ. Уæлахиздзау ссис Хъараты Зауыр, дыккаг бынат бацахста Куыдзойты Эдуард. Бронзæйон призертæ та систы Хъазиты Ацæмæз æмæ Багаты Руслан.

Ирон спортсментæ сæ уæлахизæй ссардтой Токъаты Владиславы ном, кæцы йæ цардæй ахицæн 2019 азы. Уый уыд сумойæ РЦИ-Аланийы æмбырдгонд командæйы сæйраг тренер. Уымæн сæххæст йæ беллиц – йæ хъомылгæнинæгтæ иууылдæр бацахстой пьедестал.

Европæйы Кубокы радон этап ныр та уагъд æрцæудзæн Уæрæсейы. 23-25 октябры Европæйы тыхджындæр сумоисттæ æрцæудзысты горæт Чеховмæ.

Банысан кæнны хъæуы уый дæр, æмæ Европæйы Кубокы этапты æрмæст майдантыл кæй нæ тох кæнынц, фæлæ ма уæлахиздзаутæн лæвæрд цæуынц рейтингон очкотæ, кæцытæ бар дæттынц XI-æм Æппæтдунеон хъæзтыты хайад райсынæн. Уыдон уагъд цæудзысты 2022 азы 7-17 июлы АИШ-ы.

 

ГРЕКЪАГ-РОМАГ ХЪÆБЫСХÆСТ

Ирон богалтæн дыууæ майданы рамбулын бантыст грекъаг-ромаг хъæбысхæстæй г.Ейскы уагъдцæуæг И.М.Поддубныйы номарæн турниры. 82 кг уæзы категорийы уæлахиздзау ссис Джиоты Дмитри. Иннæ ирон богал Чертхъоты Уырызмæгæн та 63 кг уæзы категорийы бантыст бронзæйон призер суæвын.

ФУТБОЛ

Дзæуджыхъæуы футболон командæ «Алани» дарддæр дæр рухс кæны йæ табугæнджыты зæрдæтæ. Национ футболон къорды 16-æм туры алайнæгтæ Грознæйы фысымиуæг кодтой чемпионаты лидер «Оренбург»-æн. Дыууæ командæ дæр кæрæдзийы кулдуæртты рæз сывзæрын кодтой тæссаг уавæртæ. Фæлæ-иу сæ не спайда кодтой. Æрмæстдæр 77-æм минутыл хъазты иунæг иу пурти бакъуырын бантыст дзæуджыхъæуккæгтæн. Расгуыхт Николай Гиоргобиани. Афтæмæй 1:0 хыгъдæй уæлахиз бафтыд «Алани»-йы къухты. Уый фæрцы алайнæгтæ турнирон таблицæйы схызтысты дыккаг бынатмæ. «Оренбург»-ы баййафыны тыххæй ма сæ хъæуы дыууæ окчкойы.

Ныр радон туры Ирыстоны сæйраг футболон командæ 13-æм октябры хъаздзæн Тольяттийы «Акрон»-имæ.

ХУРИТЫ Батрадз