Хъайтарты уынджы 118-æм бирæуæладзыгон хæдзары цæрджытæ 2008 азæй фæстæмæ æнхъæлмæ кæсынц, цæмæй сын сæ бæстыхай сцалцæг кæной.
Хæдзары цæрджытæ куыд зæгъынц, афтæмæй ардæм æрбалыгъдысты 1983 азы æмæ кæд уый стыр æмгъуыд нæу, уæддæр сæ корпус ныртæккæ ис æдзæллаг уавæры. 2008 азы хæсты Гуырдзыстоны хотыхджын æфсæдтæ уæззау артиллерийы æхстыты бын фæкодтой бирæуæладзыгон хæдзары. Цы 60 фатеры дзы ис, уыдонæй басыгъд 17.
Хæсты фæстæ æндидзынгæнæн куыстытæм куы бавнæлдтой, уæд æрывнæлдтой ацы хæдзары æмбæрзт раивынмæ дæр. Фæлæ куыстытæ æбæрæг аххосæгтæм гæсгæ ныддаргъ сты æмæ бирæ рæстæг баззад æнæмбæрзтæй. Къæвдайы дæттæ фæцыдысты фатертыл æмæ тынг разиан кодтой, хæстæй ма цы фатертæ аззадысты æнæхъыгдард, уыдоны дæр. Афтæ сæ цардысты сæ хицæуттæ.
Хæдзары уавæр сбæрæг кæныны тыххæй иу æмæ дыууæхатт хуынд не ‘рцыд Арæзтады министрады хъæппæрисæй Цæгат Ирыстонæй экспертон къамис. Уыдон-иу æрвылхатт дæр радтой ахæм хатдзæг, ома, хæдзар у аварион æмæ йын сцалцæггæнæн нал ис.
Хæдзар аварион кæй у, уый бæлвырд уыд, фæлæ йæ хъысмæт уæддæр скъуыддзаг нæ цыд. Цæрджытæй бирæтæ бафæлладысты æнхъæлмæ кæсынæй æмæ сæхи фæрæзтæй сцалцæг кодтой сæ фатертæ. Бирæ фæрацу-бацу кодтой хæдзары цæрджытæ алы инстанцитæм, фæлæ азæй-азмæ истой иу дзуапп, ома, багæдзæ кæнын хъæуы.
Æмæ мæнæ ацы бонты ацы хæдзары цæрджытæн Республикæйы сæргъ-лæууæг фехъусын кодта æхсызгон хабар, ома, Хъайтарты уынджы 118 хæдзар арæзт æрцæудзæн ногæй æмæ цалынмæ арæзт цæуа, уæдмæ та раконд æрцæудзысты, Гуыбаты æфсымæрты уынгыл цы ног хæдзæрттæ арæзт цæуы, уыдонæй сæ иумæ.
УАЗÆГТЫ Марфа
Comments are closed, but trackbacks and pingbacks are open.