Нæ фæивта политикæйы сюжет

Уæлахиз кæны комик

Дунейы политикон царды дæр диссæгтæ вæййы, æмæ уымæн æвдисæн уыдыстæм, Украинæйы президенттæм æвзæрстыты фыццаг туры рæстæджы. Куыд зонæм, афтæмæй Украинæйы архайæг президент Петр Порошенкоимæ иумæ æвзæрстыты дыккаг турмæ ахызт зынгæ комик Михаил Зеленский. Уый зындгонд у йæ саразгæ юмористон, сатирикон, комикон фæлгæндзтæй «95 квартал», зæгъгæ, уыцы къордимæ иумæ. Цы комикон фæлгæндзтæ сарæзта, уыдон се ‘ппæт дæр баст уыдысты йæ бæстæйы политикон, экономикон æмæ культурон цардимæ. Зæгъæм, «Порошенкойы зиан», зæгъгæ, уыцы равдысты уый дзырдта, нæ президент раджы аивгъуыдта, зæгъгæ. Афтæ ма хъыг кодта, бирæ ныфсæвæрдтæ дзы кæй фехъуыстой, фæлæ ма дзы ноджыдæр бирæ фехъуыстаиккой, куынæ аивгъуыдтаид, уæд. Афтæмæй хъазгææмхасæнæй уый адæмы рæгъмæ хаста украинæйаг адæмы царды риссаг фарстытæ суанг дины фарстыты онг дæр.

Растыл нымайы фыдгæнæджы

Ныридæгæн интернеты хызæджы фæзынд ахæм хъуыдытæ, зæгъгæ, æнкъард нал кæндзысты адæм. Иуæрдыгæй раст дзурынц, уымæн æмæ ахæм хъæлдзæг æмæ цыргъзонд президент фæстæ нæ баззайдзæн адæмы хъæлдзæг дарыны хъуыддаджы. Фæлæ йæхæдæг Зеленский, Гуырдзыстоны раздæры президент Михаил Саакашвили, йæ фыдракæндтæ йын ферох кæнгæйæ,  кæй нымайы фæлтæрд политикыл, уый адæймаджы хъуыдытыл æфтауы. Цæвиттон, Зеленский куы базыдта, Саакашвили Украинæмæ уазæгуаты æрцæуинаг у, уæд загъта, тынг æхсызгон мын уыдзæн йе ‘рцыд, ахæм фæлтæрд политикы зондамынд махæй алкæмæн дæр пайда уыдзæн, зæгъгæ. Йæ ацы ныхæстæй бæлвырд у, Украинæйы политикон фæндаджы ногæй кæй ницы уыдзæн. Кæд æмæ уый Хуссар Ирыстоны 2008 азы августы цы тугкалд æрцыд æмæ уый размæ Гуырдзыстоны хицауад ирон адæмæн цы фыдмитæ фæкодтой, уыдон фæлтæрддзинад æмæ зондджындзинадыл нымайы, уæд йæхæдæг дæр ахæм амæлттыл æлгъ кæцæй кæндзæн.

Арæх ивы политикты хъуыды

Æниу политикты зонд æмæ ахаст фæззыгон арвау фæлывд у, чизоны æмæ уый дæр фæстæдæр йæ хъуыдытæ фæива. Хъыгаг уый у, æмæ æвæлтæрд политиктæ адæмы хъизæмæрттыл сæхи кæй фæлтæрынц.

Иу ахæм фæлвых политик ма разынд Гуырдзыстоны ног президент Саломе Зурабишвили. Цалынмæ уый Гуырдзыстоны президент не сси, уæдмæ йæ азымджын кодтой, йæ чиныг «2003-2008 азты трагеди»-йы августы цауты тыххæй азым Михаил Саакъашвилийыл кæй æвæрдта. Уымæй дарддæр ма йæ ныхмæлæууæг кандидаты фарсхæцджытæ æдзух азымы дардтой Уæрæсейы ‘рдæм здæхт цæстæнгасы тыххæй. Фæстæдæр президент куы сси, уæд цæхгæр фæзылд йæ хъуыды æмæ загъта: «Уæрæсеимæ ныхас кæнынмæ мах цæттæ не стæм». Ацы хъуыддаджы йемæ разы нæу Нино Бурджанадзе. Уый зæгъы: «Саломе Зурабишвили ныртæккæ йæхи равдисынмæ хъавы, Уæрæсейы ныхмæвæрд хъуыдыйыл хæст цыма у. Йæ хъусынгæнинаг фидæны Уæрæсеимæ нæ ахастыты тыххæй уыдзæн сагъæссаг Гуырдзыстонæн. Ногæй та рæстæг сафдзыстæм».

Нæ ивы Гуырдзыстоны ахаст Ирыстонмæ

Уæрæсемæ Гуырдзыстоны президенты ахаст бæлвырд у, фæлæ сусæггаг нæу йæ ахаст Хуссар Ирыстонмæ дæр. Ныртæккæ бирæтæ дзурын райдыдтой, ома, цы пайда у, Гуырдзыстон йæ къух æрфысса æви нæ, Хуссар Ирыстоны ныхмæ тыхæй не спайда кæныны тыххæй гæххæттыл, уæддæр уыцы сразыдзинад æнцонтæй фехалдзысты, зæгъгæ. Чизоны уый раст у, фæлæ йыл къух кæй нæ фыссынц, уый у ирон адæммæ сæ ахастæн æвдисæн. Ацы ахаст та æнæ паддзахады разамынады фæндонæй нæ равзæрид. Иумæйагæй та Гуырдзыстоны президент ногæй ницы æрбахаста Гуырдзыстоны ахастмæ ирон адæммæ. Раздæрау гуырдзиаг-ирон арæнтыл цæуы провокацитæ, рæвдз цæуынц НАТО-йы æфсадимæ иумæйаг ахуыртæ, Гуырдзыстоны информацион фæрæзтæ Республикæ Хуссар Ирыстоны нымайынц æнæзакъоныл, хонынц æй Гуырдзыстоны регионтæй иу, сæ ныгуылæйнаг хъузонтæ домынц Уæрæсейæ, цæмæй Хуссар Ирыстоны хæдбардзинады банымад аивтой, æмæ афтæ дарддæр.

Нæ уадзынц сæ ныхилын нæ хæдбардзинадмæ

Хуссар Ирыстоны хæдбардзинадмæ Гуырдзыстоны Хицауад сæ ныхилын кæй нæ уадзынц, уый фæдыл йæ хъуыды загъта РХИ-йы Президент Бибылты Анатоли: «Хуссар Ирыстон никуы уыди Гуырдзыстоны сконды, æгæрыстæмæй Уæрæсейы паддзахы хицауады рæстæджы дæр. Цы бар дары Гуырдзыстон Ирыстонмæ? Ницы! Кæд Ирыстоны кой кæнæм, уæд кæцæй æрцыдысты Хуссар æмæ Цæгат Ирыстон? Зонут, уæддæр æмæ уæддæр уый уыди, дих чи æрцыд, уыцы иу Ирыстон!».

Махæн нæхи фæндаг ис

Афтæмæй дунеон политикæйы архайджытæ ивынц, фæлæ йæ сюжет баззади æнæивгæйæ. Æмæ Бибылты Анатоли куыд зæгъы, афтæмæй махæн нæхи фæндаг ис, Уæрæсеимæ интеграцийы фæндаг. Чи тыхсы æмæ æнцой кæмæн нæй, уый та цæуы æнцой агурæг.

Куыд зонæм, афтæмæй 21 апрелы уыдзæн Украинæйы президентон æвзæрстыты дыккаг тур. Цымыдисон у, архайæг президент фæуæлахиз уыдзæн, æви Украинæйы президент худæг лæг суыдзæн. Æниу дзы худæгæй цы уыдзæн, уый дæр та йæ раздзæуæгау Уæрæсеимæ ныхмæлæуды фæндагыл куы слæууа, уæд. Уымæй дарддæр ма Гуырдзыстоны политикон  къахдзæфтæ растыл куы нымайа, уæд сæ æххæст дæр куы скæна йæ адæмы ныхмæ, уымæй дæр тæссаг у. 

Годжыцаты Нелли