Ирон литературæ æмæ литературон ӕвзаджы бындурӕвӕрӕг Хетӕгкаты Къостайы райгуырдыл фӕззӕджы ӕххӕст кӕны 160 азы æмæ ацы аз Къостайы азæй кæй расидтæуыд, уый сæраппонд республикæйы уагъд цæуынц алыгъуызон мадзæлттæ. Иу ахæм мадзал ацы бонты уагъд æрцыд Къостайыхъæуы дæр.
Уыцы бон уӕлдай хъӕлдзӕгдӕр хуыз уыд, Къостайыхъӕуы астӕуккаг скъоламӕ чи ӕрбацыд, уыдонӕн Зӕгъын хъӕуы, бӕрӕгбонон мадзал кӕй ацыд бӕрзонд ӕмвӕзадыл ӕмӕ ууыл та ахуыргӕнинӕгтимӕ зӕрдиагӕй бакуыстой скъолайы ирон ӕвзаг ӕмӕ литературӕйы ахуыргӕнджытӕ Плиты Заирӕ ӕмӕ Хъуылымбегты Маринӕ. Мадзалмӕ фӕуазӕг сты нӕ республикӕйы Культурӕйы министр Зассеты Жаннӕ, районы адӕмон ахуырады хайады сӕргълӕууӕг Лолоты Владимир, стӕй районы цалдӕр скъолайы ахуыргӕнджытӕ ӕмӕ ахуыргӕнинӕгтӕ, хъӕубӕстӕ.
Къоста бирæварсон курдиаты хицау уыд, дардыл ӕххӕссыд йӕ зонд.Ӕрмӕст нын диссаджы уацмыстӕ нӕ ныууагъта, канд уыдонӕй нӕ самадта йӕхицӕн кады мӕсыг. Къостайы курдиатӕн хорз аргъгӕнӕн ис йӕ ӕгъуыстаджы конд нывтӕй, уыдоны дӕр ӕвдыста йӕ адӕмы цардуаг ӕмӕ ирд фӕд ныууадзынц аивадуарзджыты зӕрдӕты. Афтӕ ма къаддӕр нӕ арӕхсат зарын ӕмӕ кафынмӕ дӕр. Мадзал дӕр уымӕн уыд алывӕрсыгӕй ӕххӕст, кӕстӕртӕ сӕ арæхстдзинад æвдыстой ӕмдзӕвгӕтӕ дзурын, зарын, кафын ӕмӕ ныв кӕнынæй. Мадзаламонӕг ӕрдзырдта, Къостайы райгуырӕн хъӕу Нар ӕмӕ Цъунарӕн цы иудзинад ис, ууыл. Цӕвиттон, ардыгӕй рацыдысты ахӕм мыггӕгтӕ: Бигъуылатӕ, Гоцъитӕ, Мамитӕ, Хаситӕ, Хетӕгкатӕ. Сӕ нымӕц цъус кӕй уыд, уымӕ гӕсгӕ сӕ ног цӕрӕн бынат схуыдтой Цъуснар, ома, Цъунар. Базонгӕ ма сæ кодта, фӕстӕдӕр ацы хъӕумӕ ӕндӕр бынӕттӕй цӕрынмӕ чи ӕрлыгъд, коллективизацийы рӕзт, фыццаг трактор сӕ къухты цӕй фӕрцы бафтыд ӕмӕ ӕндӕр ахӕмты тыххӕй.
Скъоладзаутӕ Бӕззаты Сӕрмӕт, Тараты Иренӕ, Хуыбиаты Дауыт, Тегкаты Дауыт ӕмӕ æндæртæ аив радзырдтой Къостайы фыст уацмыстӕ. Йӕ хайадисджытыл хорз тӕл-мӕнтӕ ныууагътой, 7-ӕм ӕмӕ 8-ӕм кълӕсты ахуыргӕнинӕгтӕ Джиоты Линӕ ӕмӕ Миланӕ «А-лол-лай»-ы инсценировкӕ кæй равдыстой, уымæй. Тынг зӕрдӕмӕдзӕугӕ уыдысты, музыкӕйы ахуыргӕнӕг Къӕбысты Сӕрмӕты разамындӕй ахуыргӕнинӕгтӕ 5-ӕм, 6-ӕм ӕмӕ 7-ӕм кълӕсты ахуыргӕнинӕгтӕ Бӕззаты Альмӕ, Джергаты Альбинӕ, Мӕлдзыгаты Алинӕ, Джиоты Миланӕ, Мӕлдзыгаты Эдуард, Бӕззаты Сӕрмӕт сӕххӕст кодтой зарджытӕ: «Ирыстон», «Балцы зарӕг», «Усгуры мӕт», «Курӕм Хуыцауӕй». Тегкаты Радим ма скрипкӕйыл аив ацагъта Къостайы фыст уацмысыл æвæрд музыкæмӕ гӕсгӕ мелоди дӕр.
Сценӕмӕкӕсджыты зӕрдӕтӕ сӕ аив ралӕудӕй барухс кодтой хъӕууон Культурӕйы хӕдзары (сӕ аивадон къухдариуӕггӕнӕг Лолоты Дуня) кафджыты къорд . Уыдон та сӕххӕст кодтой ахӕм кӕфтытӕ, куыд ирон дзыллон кафт «Симд», «Чызджыты лирикон», «Кӕсгон кафт» ӕмӕ «Къахфындзтыл кафт».
Юбилейон мадзалы тыххӕй хъарм ныхӕстӕ загъта Культурӕйы министр Зассеты Жаннӕ ӕмӕ банысан кодта, цымыдисон ӕмӕ зӕрдӕмӕдзӕугӕ кӕй рауад сӕ бӕрӕгбонон изӕр, раарфӕ кодта, сæ аивадæй сӕ чи бахъӕлдзӕг кодта, уыдонӕн ӕмӕ сын йӕ цӕст бауарзта дарддӕры ӕнтыстытӕ.
Кӕронбӕттӕны ӕрбацӕуджытӕ базонгӕ сты, нывгӕнӕн скъола-студийы, стӕй ма Хелцуа, Зар ӕмӕ Сатихъары ӕвзонг курдиӕтты куыстытимӕ ӕмӕ сыл ныууагътой хорз тӕл-мӕнтӕ. Къостайы уацмысты мотивтӕм гӕсгӕ конд нывтӕ «Марходарӕг», «Лӕскъдзӕрӕн», «Къоста-нывгӕнӕг», «Дон-хӕссӕг», «Зымӕг» ӕмӕ ӕндӕрты бындурыл уыдысты ахуыргӕнинӕгты нывтӕ. Цхинвалы районы ахуырады хайады сӕргълӕууӕг раарфӕ кодта уӕлахиздзаутӕн ӕмӕ сӕ схор-зӕхджын кодта Кады грамотӕтӕ ӕмӕ лӕвӕрттӕй.
ХУЫБИАТЫ Никъала
Comments are closed, but trackbacks and pingbacks are open.